2 PITA 3
3
Sa tukuna ko koya ni na yaco ga na siga ni lewa; ena oti talega ko vuravura kei lomalagi, 110. Sa tukuna nai valavala e kilikili kei ira ni ra sa qai kila na veika oqo, 1118.
1Ai karua ni vola oqo, oi kemudou sa lomani, au sa qai vola vei kemudou, au sa vakauqeta kina na yalomudou e savasava mo dou nanuma kina: 2mo dou vakananuma na vosa era sa vosataka eliu na parofita yalosavasava, kei na neitou vunau nai apositolo ni Turaga nai Vakabula: 3ni dou sa kila mada oqo, ni na lako mai e na gauna emuri sara eso na dauveivakasewasewani, era na dauvakadamurimuria na nodra gagadre ca, 4ka kaya, Evei na vosa ni yalayala ni na lako tale mai ko koya? ni ra sa moce ga na qase, a sa tu dei tiko vakakina na ka kecega me vaka ni sa buli e nai vakatekivu.
5Ia na ka oqo era sa vinakata me ra lecava, ni sa vosa ni Kalou ka tu kina na lomalagi eliu, kei na vuravura sa wase mai na wai, a sa tu e na vuku ni wai; 6a sa vakarusai kina na vuravura sa tu e na gauna ko ya, e na waluvu: 7ia na lomalagi kei na vuravura sa tu edaidai, sa maroroi ga e na vosa talega ko ya, sa maroroi ki na bukawaqa me yaco mada na siga ni lewa kei na veivakarusai ni tamata tawa-lotu.
8Ia koi kemudou sa lomani, mo dou kakua ni lecava na ka oqo, ni sa tautauvata vua na Turaga e dua na siga kei na yabaki e dua na udolu, kei na yabaki e dua na udolu kei na siga e dua. 9Sa sega ni berabera na Turaga ni vakayacora na nona vosa ni yalayala, me vaka era sa nanuma na tamata eso sa berabera: sa vosoti keda ga vakadede, ni sa sega ni vinakata me rusa e dua, me yacova ga na veivutuni ko ira kecega na tamata. 10Ia na siga ni Turaga ena lako mai me vaka na daubutako e na bogi, ena lako tani kina ko lomalagi e na rorogo tatamosamosa, ena waicala talega na veivu ni ka ni sa vakamai, ena kamayavu talega ko vuravura kei na ka kecega sa tu kina.
11Ia ni na takali yani na ka kecega oqo, a cava nai valavala sa kilikili kei kemudou, e nai valavala savasava kei na daulotu, 12ni dou sa dauwaraka ka daugadreva sara na kena yaco mai na siga ni Kalou, ena takali kina ko lomalagi ni sa kama, ena waicala talega na veivu ni ka ni sa vakamai? 13Ia koi keda, me vaka na nona vosa ni yalayala, eda sa waraka na lomalagi vou kei na vuravura vou, sa tiko kina nai valavala dodonu.
14O koya oqo, kemudou sa lomani, ni dou sa waraka na veika vakaoqo, dou gumatua kina me kunei kemudou ko koya e na vakacegu, ni dou sa sega ni tauvi-duka, ka sega ni cala. 15Ka mo dou dinata na vosota vakadede ni noda Turaga me ka eda sa bula kina; me vaka sa vola talega vei kemudou na wekada lomani ko Paula me vaka na vuku sa soli vua; 16me vaka talega e na nonai vola kecega, ni sa tukuna na veika oqo; a sa tu kina na ka eso e dredre me kilai, ia ko ira era sa sega ni vuku ka sega ni lomadei, era sa kauta vakatani, me vaka talega kina nai Vola Tabu kece, me ra rusa kina.
17Ia koi kemudou sa lomani, ni dou sa kila eliu, dou vakaraici kemudou talega, de dou kau vakatani e na nodra dauveivakacalai na tamatai valavala ca, dou na qai bale kina mai na nomudou tu dei. 18Ia dou tubu cake e na loloma, kei na kila na noda Turaga ko Jisu Karisito nai Vakabula. Me ia vua na vakarokoroko e na gauna oqo ka tawa mudu. Emeni.
Currently Selected:
2 PITA 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific