2 JONI 1
1
Sa volavola vua e dua na marama ko Joni, me vakarota vua, vei ira talega na luvena, me ra muria nai vakavuvuli dina, 1-13.
1Oi au na qase vua na marama sa digitaki tu, kei ira na luvena, o ira kau sa lomana vakaidina; ka sega ni koi au duaduaga, o ira kece talega era sa kila na dina; 2e na vuku ni dina, o koya ka tiko e na lomada, ena tu ga vei keda ka sega ni mudu: 3Me nomudou na loloma, na yalololoma, na vakacegu, mai vua na Kalou ko Tamada, kei na Turaga ko Jisu Karisito, na luve i Tamada, e na dina kei na loloma.
4Au a reki vakalevu niu a kunei ira na luvemu eso era sa dau muria nai vakavuvuli ni dina, me vaka eda sa vakaroti mai vua na Tamada. 5Ia kau sa qai vakamasuti iko, na marama, ia ka sega ni vaka niu sa vola vei iko na vunau vou, oqori ga sa tu vei keda mai nai vakatekivu, me da veilomani. 6Ia oqo na loloma, me da muria na nona vunau. Na vunau oqo, Me vaka na ka dou a rogoca mai nai vakatekivu, mo dou muria tiko.
7Ni ra sa lewe vuqa na dauveivakacalai sa lako voli e vuravura, ko ira era sa sega ni vakatusa ni sa liatamata mai ko Jisu Karisito. O koya oqo na dauveivakacalai kei na meca i Karisito. 8Dou vakaraici kemudou, me kakua ni yali vei kemudou na ka keitou a kitaka, mo dou rawata kecega na kenai sau. 9O koya yadua sa talaidredre, ka sa sega ni tu dei e nai vakavuvuli kei Karisito, sa sega ni tu vei koya na Kalou. O koya sa tu dei e nai vakavuvuli kei Karisito, sa tiko vua na Tamada kei na Luvena talega. 10Kevaka e dua sa lako kivei kemudou, a sa sega ni kauta nai vakavuvuli oqo, kakua ni kauti koya ki vale, se vosavakalougatataka: 11ia ko koya sa vosavakalougatataka sa tautauvata kaya e na nonai valavala ca.
12Sa levu na ka kau sa via vola vei kemudou, ia kau sa sega kina ni vinakata meu vola e na pepa kei na wai ni volavola: ia kau sa nakita meu lako vei kemudou, ka veivosaki e na matanavotu, me levu sara kina na noda marau.
13Sa loloma yani vei iko ko ira na luvena na wekamu yalewa sa digitaki tu. Emeni.
Currently Selected:
2 JONI 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific