1 TUI 21
21
Sa vakamatei ko Nepoci, me nei Eapi na nona were ni vaini, 1-16. Sa tukuna ko Ilaija na cudru i Jiova vei Eapi kei Jesepeli, 17-29.
1Sa oti na veika oqo, sa dua na were-ni-vaini nei Nepoci na kai Jesirieli, ka tiko mai Jesirieli, ka sa voleka ki na vale vakaturaga i Eapi, na tui Samaria. 2A sa vosa vei Nepoci ko Eapi, ka kaya, Mo solia vei au na nomu were-ni-vaini, me noqu were ni rourou, ka ni sa voleka ki na noqu vale: ia ka'u na solia vei iko me kenai sau e dua na were-ni-vaini e vinaka cake; ia kevaka ko sa vinakata me kenai voli nai lavo, ka'u na solia vei iko. 3A sa kaya vei Eapi ko Nepoci, Me kakua sara vei au e na vuku i Jiova, me'u solia vei iko na nodra i votavota na noqu qase.
4A sa la'ki curu ki nona vale ko Eapi, a sa yalobibi ka yaloca e na vuku ni vosa ka vosataka vua ko Nepoci na kai Jesirieli, ni sa kaya ko koya, Au na sega ni solia vei iko na nodra i votavota na noqu qase. A sa davo sobu e na nonai mocemoce, ka vagolea tani na matana, a sa bese ni kana. 5A sa lako mai vua ko Jesepeli na watina, ka kaya vua, A cava e rarawa kina na lomamu, ka ko sa sega kina ni kana? 6A sa kaya vua ko koya, Ni ka'u a vosa vei Nepoci na kai Jesirieli, ka kaya vua, Mo solia vei au na nomu were-ni-vaini me kenai sau nai lavo; ia kevaka ko sa vinakata, ka'u na solia vei iko e dua na were-ni-vaini me kenai sau: a sa kaya ko koya, Au na sega ni solia vei iko na noqu were-ni-vaini. 7A sa kaya vua ko Jesepeli na watina, O iko, ko sa sega li ni lewa e Isireli edaidai? mo tu cake mo kana, ka me marau na yalomu: koi au, au na solia vei iko na were-ni-vaini nei Nepoci na kai Jesirieli. 8A sa vola ko koya e dua nai vola e na yaca i Eapi, ka dregata ka tabaka e na nona mama, ka vakauta nai vola kivei ira na qase kei ira na tamata turaga e na nona koro, era tiko vata kei Nepoci. 9A sa vola ko koya e nai vola, ka kaya, Dou kacivaka e dua na lolo, ka vakatikori Nepoci e na tikina cecere vei ira na tamata: 10ia dou lesia e le rua na tamata, erau luve ni vu-ni-ca, me tu e matana, ka me beitaki koya, me rau kaya, Ko a vosavakacacataka na Kalou kei na tui. Ia dou qai kauti koya ki nai bili, ka vakavirika e na vatu, me mate sara ko koya.
11Ia ko ira na nona lewa ni koro, na qase, kei ira na tamata turaga era tiko e nona koro, era sa cakava me vaka sa talaki kina vei ira ko Jesepeli, ka me vaka sa volai e nai vola ka vakauta vei ira ko koya. 12Era sa kacivaka e dua na lolo, ka vakatikori Nepoci e na tikina cecere vei ira na tamata. 13A sa curu kina e le rua na tamata, erau luve ni vu-ni-ca, a rau sa tiko e matana: ia erau sa beitaki Nepoci koi rau na tamata ca, e na matadra na tamata, ka rau kaya, Sa vosavakacacataka na Kalou kei na tui ko Nepoci. Erau sa qai kauti koya ki nai bili ni koro, ka vakavirika e na vatu, a sa mate kina ko koya. 14Era sa qai talaki vei Jesepeli, ka kaya, Sa lauviri e na vatu ko Nepoci, a sa mate ko koya.
15Ia ni sa rogoca ko Jesepeli sa lauviri e na vatu ko Nepoci, ka sa mate, sa kaya vei Eapi ko Jesepeli, Mo ia, mo la'ki taukena na were-ni-vaini nei Nepoci na kai Jesirieli, ko ya ka bese ni solia vei iko me kenai sau nai lavo; ni sa sega ni bula ko Nepoci, sa mate ga. 16Ia ni sa rogoca ko Eapi sa mate ko Nepoci, sa ia ko Eapi me lako sobu ki na were-ni-vaini i Nepoci na kai Jesirieli, ka me taukena.
17A sa yaco vei Ilaija na kai Tisipa na vosa i Jiova, ka vaka, 18Mo ia, mo lako sobu mo tavaki Eapi na tui Isireli, o koya sa tiko mai Samaria: raica, sa tiko e na were-ni-vaini i Nepoci, ko ya sa lako sobu kina me taukena: 19ia mo vosa vua, ka kaya, Sa vosa vakaoqo ko Jiova, O sa ia oti na veivakamatei, ka qai lako mo taukena talega, oi? ia mo vosa vua, ka kaya, Sa kaya vakaoqo ko Jiova, E na tikina era a dramica kina na dra i Nepoci na koli, era na dramica talega kina na nomu dra ko ira na koli, io na nomu dra.
20A sa kaya vei Ilaija ko Eapi, O sa kunei au beka ko iko, na noqu meca? A sa kaya ko koya, Io, au sa kunei iko; ni ko sa volitaki iko mo caka ca e na mata i Jiova. 21Raica, ka'u na vakayacora na ca vei iko, ka kauta tani na nomu kawa, ka muduka tani vei Eapi na tagane kecega, ko koya sa sogolati, kei koya sa lako voli, vei ira na Isireli. 22Ia ka'u na cakava na nomu mataqali me tautauvata kei na mataqali i Jeropoami, na luve i Nipati, ka tautauvata kei na mataqali i Pasa, na luve i Eaija, e na vuku ni nomu i valavala ko sa vakacudrui au kina, ka sa vakaivalavalacataki ira na Isireli. 23Ia e na vuku i Jesepeli, sa vosa ko Jiova, ka kaya, Ena kani Jesepeli mai na bai ni Jesirieli ko ira na koli. 24O koya sa mate vei Eapi e na koro, ena kania ko ira na koli; kei koya sa mate e na were, ena kania ko ira na manumanu vuka.
25(Ia ka sa sega e dua me tautauvata kei Eapi, me volitaki koya me caka ca e na mata i Jiova, o koya ka vakauqeta ko Jesepeli na watina. 26A sa kitaka na ka vakasisila sara ko koya, ni sa muria na veimatakau, me vaka na ka kecega sa cakava ko ira na Amoraiti, o ira ka vakaseva ko Jiova e matadra na Isireli.)
27Ia ni sa rogoca na vosa oqo ko Eapi, sa dresulaka na nonai sulu, ka vakaisulutaki koya e nai sulu taga, ka lolo, ka koto e nai sulu taga, ka lako voli vakamalumalumu. 28A sa yaco mai na vosa i Jiova vei Ilaija na kai Tisipa, ka kaya, 29O sa raica, se segai, ni sa vakamalumalumutaki koya vei au ko Eapi? ia ni sa vakamalumalumutaki koya vei au, ka'u na sega ni vakayacora na ca e na nona gauna; e na gauna ga ni luvena ka'u na vakayacora na ca vei ira na nona mataqali.
Currently Selected:
1 TUI 21: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific