ኢብራዌ 13
13
ፆሳ ኑኒ ዎቲ ናሼቻናው ቤሲንቶ
1ሂንቴንቱ ኢሻቱዋ ሲቂያዋ ኣጎፒቴ። 2ኢማ ሞኪያዋካ ዶጎፒቴ። ኣዪሲ ጎፔ፥ ያቲያዋን ኢቲ ኢቲ ኣሳይ ኤሬናን ኪታንቻቱዋ ሞኬዳ። #ዶም 18፡1-8፤ 19፡1-3 3ቃሾ ጎሌን ዴዒያዋንቱባ ሂንቴንቱካ ኡንቱንቱና ኢቲፔ ቃሾ ጎሌን ዴዒያዋዳን ቆፒቴ፤ ቃሲ ሂንቴንቱ ሂንቴንቱ ሁጴው ዋዬቲያዋዳን፥ ዋዬቲያዋንቱባ ቆፒቴ።
4ኣኪያዋኔ ጌሊያዋ ኣሳይ ኡባይ ቦንቻናው ቤሴ፤ ቃሲ ኣሲናይኔ ማቻታ ኢቱ ኢቱዋሲ ኣማኔታናው ቤሴ፤ ኣዪሲ ጎፔ፥ ፆሳይ ዎሹማናው ካጄሊያዋንታኔ ዎሹሚያዋንታ ፒርዳና።
5ሚሻ ሲቁዋፔ ሂንቴንታ ናጊቴ፤ ሂንቴንቱሲ ዴዒያዌ ሂንቴንቱሲ ጊዶ። ኣዪሲ ጎፔ፥ ፆሳይ ባሬ ሁጴው፥
«ታኒ ኔና ኡባካ ዬጊኬ
ዎይ ኣጊኬ»
ያጌዳ። #ዛር 31፡6፣ 8፤ ኢያ 1፡5 6ሄዋ ዲራው፥ ኑኒ ፃሊዴ፥
«ጎዳይ ታና ማዲያዋ፤
ታኒ ያዪኬ።
ኣሳይ ታና ኣይ ኦ?»
ያጌቶ። #ማዝ 118፡6
7ፆሳ ቃላ ሂንቴንቱሲ ኦዴዳ ሂንቴንታ ካሌዳዋንታ ሃሳዪቴ፤ ኡንቱንቱ ዋኒ ዴዔዲኖንቶኔ ሃሳዪቴ፤ ቃሲ ኡንቱንቱዋዳን ኣማኒቴ።
8ዬሱሲ ኪሪስቶሲ ዚኖካ ሃቼካ ሜናዉካ ላሜቴና። 9ዱማ ዱማ ኦራ ቲሚርቲያን ዎራ ቦፒቴ። ኑ ዎዛናይ ፆሳ ኣ ኬካቴን ሚኖፔ ሎዖ ጊዲያዋፔ ኣቲን፥ ቁማ ዎጋቶ ኣዛዜቲያዋ ጊዴና፤ ሄዎ ኣዛዜቴዳዋንቱካ ማዴቲቤይኪኖ።
10ኑሲ ያርሺያሳይ ዴዔ፤ ዱንካኒያ ጊዶን ኦያዋንቱ ሄ ያርሺያሳፔ ማናው ኡንቱንቶ ማታይ ባዋ። 11ቄሳቱዋ ኡባቱዋ ካፑ ናጋራ ዲራው፥ ሜሂያ ሱ ያርሻናው ኡባፔ ኣያ ጌሻ ሳዓ ኣፌ፤ ሺን ሄ ሜሂያ ኣሹዋ ቃሲ ዲርሳፔ ካሬና ጉዴ። #ዎግ 16፡27 12ሄዋ ዲራው፥ ዬሱሲካ ቃሲ ናጋራፔ ኣሳ ባሬ ሱን ጌሻናው፥ ካታማ ፔንጊያፔ ካሬና ዋዬቴዳ። 13ሲሚ ኑኒ ኢ ቦሬቴዳ ቦሪያ ኣኪዴ፥ ዲርሳፔ ካሬ ኣኮ ኬሶይቴ። 14ኣዪሲ ጎፔ፥ ኑሲ ሃዋን ሜናው ዴዒያ ካታማይ ባዋ፤ ሺን ኑኒ ያና ካታማ ናጌቶ።
15ሲሚ ፆሳው ዬሱሳ ባጋና ኡባ ዎዴ ጋላታ ያርሹዋ ኢሞይቴ፤ ሄዋ ጊያዌ ሜቴርሻይ ኣ ሱንው ኢሚያ ጋላታ ጊያዋ። 16ሎዖባ ኦያዋኔ ኢቱ ኢቱዋ ማዲያዋ ዶጎፒቴ። ኣዪሲ ጎፔ፥ ፆሳ ናሼቺያዌ ሄዋ ማላ ያርሹዋ።
17ሂንቴና ካሌያዋንቶ ኣዛዜቲቴ፤ ቃሲ ኡንቱንቱ ኣዛዚያዋካ ኦቴ። ኡንቱንቱ ባሬንቱ ኦዳዋ ፆሳው ኦዳና ዲራው፥ ሂንቴንቱ ሼምፑዋ ሎይ ናጊኖ፤ ሂንቴንቱ ኡንቱንቶ ኣዛዜቶፔ፥ ባሬንቱ ኦሱዋ ናሼቲዴ ኦና፤ ሄዌ ዮፔ፥ ኡንቱንቱ ዪሎቲዴ ኦና፤ ሄዌ ሂንቴንታ ኣይኔ ማዴና።
18ኑሲ ፆሳ ዎሲቴ። ኑኒ ኡባ ዎዴ ሎዖባ ኦናው ኮዪያ ዲራው፥ ኑና ዞሪያ ሎዖ ዎዛናይ ኑሲ ዴዔ። 19ፆሳይ ታና ሂንቴንቱኮ ኤሌካ ዛራና ማላ፥ ፆሳ ሂንቴንቱ ሎይ ዎሳናዳን፥ ታኒ ሂንቴንታ ሎይ ዎሳይ።
ዎሳ
20ሳሮቴ ፆሳይ፥ ኑ ጎዳ ዬሱሳ፥ ዶርሳቱዋ ሄንንቻ ዎልቃማ፥ ሜና ጫቁዋ ሱን ሃይቁዋፔ ዴንዳ። 21ፆሳይ ዬሱሲ ኪሪስቶሳ ባጋና ባሬ ሲንን ባሬና ናሼቺያዋ ሂንቴንታ ኦሲሲዴ፥ ሂንቴንቱካ ኢ ኮዬዳዋ ኦና ማላ፥ ሎዖ ኦሱዋ ኡባን ሂንቴንታ ኢ ጊጊሶ፤ ፆሳይ ሜ ሜናው ቦንቼቶ። ኣሜንዒ።
ቁቴ ቃላ
22ታናዳን ኣማኒያዋንቶ፥ ታኒ ሃ ዳቢዳቢያ ሂንቴንቱሲ ቃንን ፃፌዳ ዲራው፥ ሂንቴንቱ ሃ ዞሪያ ሳሌቴናን ሲሳና ማላ፥ ታኒ ሂንቴንታ ዎሳይ።
23ኑ ኢሻይ፥ ፂሞቶሲ ቃሹዋፔ ቢሌቴዳዋ ኤሪቴ። ኤሌሊ ኢ ሃ ዮፔ፥ ታኒ ኣናና ባዴ ሂንቴንታ ቤዓና።
24ሂንቴና ካሌያ ኡባቱዋኔ ፆሳ ኣሳቱዋ ኡባ ሳሮ ሳሮ ጊቴ። ፃሊያፔ ዬዳ ኣማኒያዋንቱ ሂንቴንታ ሳሮ ሳሮ ጊኖ።
25ኣ ኬካቴይ ሂንቴናና ኡባና ኢቲፔ ጊዶ። ኣሜንዒ።
Currently Selected:
ኢብራዌ 13: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa