Filibbi 3
3
Al-tahuura al-sahiihe
1Wa khalaas, ya akhwaani, afraho be Rabbina Isa. Ma gaasi leyi naktib leeku nafs al-cheyy al-awwal ooreetku beyah wa nikarrirah battaan achaan da yabga leeku akiid. 2Awʼu baalku min al-kulaab ! Humman al-yisawwu al-charr. Yafraho be gatiʼiin min al-jisim wa nuguul leeku battaan awʼu baalku minhum ! 3Yuguulu humman al-mutahhariin. Laakin aniina bas al-naas al-mutahhariin be l-sahiih, aniina al-naʼabudu Allah be gudrat al-Ruuh al-Khudduus. Wa nifaachuru be l-Masiih Isa wa abadan ma nintaklu ale jilidna.
4Wa hasab kalaamhum, ana indi hagg nintakil ale jildi. Ayyi naadum al-yuguul hu indah hagg yintakil ale jildah, ana indi hagg ziyaada minnah. 5Ana tahharooni fi l-yoom al-taamin min yoom wildooni. Wa ana min zurriiyit Bani Israaʼiil wa min gabiilat Banyaamiin. Ana Ibraani miya fi l-miya. Wa fi l-cheyy al-bukhuss tabbigiin churuut al-Tawraat, ana min tariigat al-Fariiziiya.#3:5 tariigat al-Fariiziiya Hi tariiga al-naasha munkaribiin ziyaada fi tabbigiin churuut al-Tawraat. 6Wa ana bigiit munkarib bilheen fi diini al-Yahuudi lahaddi haawalt nidammir ummat al-Masiih. Wa hasab kalaamhum fi churuut al-Tawraat, ana bigiit naadum saalih wa ma indi eeb.
Al-Masiih akheer min kulla cheyy
7Laakin kulla cheyy al-awwal jaʼaltah hu indah faayde da, ana khalleetah minni wa jaʼaltah misil cheyy saakit fi chaan al-Masiih. 8Aywa wa ziyaada min da, irfit al-Masiih Isa Rabbi bigat leyi akheer min kulla cheyy wa najʼal kulla cheyy aakhar saakit. Fi chaan al-Masiih, ana khalleet kulla cheyy al-indi. Wa kulla cheyy al-awwal indah leyi faayde, jaʼaltah misil wasakh achaan nalga al-faayde al-kabiire wa hi al-alaakha maʼa l-Masiih. 9Wa nidoor alaakhti maʼaayah tabga kaamile. Wa be misil da, ma najʼal nafsi saalih be tabbigiin churuut al-Tawraat laakin nabga saalih be iimaani be l-Masiih achaan al-derib al-Allah yisawwi beyah al-naas saalihiin, hu derib al-iimaan. 10Wa nijaahid achaan naʼarif al-Masiih tamaam wa niʼiich be gudrat buʼaasah wa nichaarik maʼaayah fi taʼabah. Wa nidoor nabga misil hu bigi fi mootah 11wa khalaas be ayyi daliil, nalhag fi l-akhiir buʼaas al-maytiin. 12Wa ma nuguul tammeet makhsuudi khalaas wa bigiit naadum tamaam. Laakin ana nijaahid le namulkah achaan al-Masiih Isa mallakaani le namluk al-makhsuud da.
Masal Buulus
13Ya akhwaani, abadan ma nukhutt fi fikri kadar ana malakt al-makhsuud khalaas. Laakin nisawwi cheyy waahid bas, nansa al-wara wa nifakkir fi l-giddaam. 14Wa nijaahid achaan nitammim al-makhsuud wa nalga al-jaaʼiza wa hi al-baraka al-Allah yidoor yantiiha le l-naas al-naadaahum fi majdah be l-Masiih Isa. 15Wa khalaas, khalli kullina al-bigiina gawiyiin fi l-iimaan nitaabuʼu nafs al-fikir. Wa kan fikirku chig min al-fikir da, khalli da kula Allah yiwassifah leeku. 16Khalli ayyi waahid yiʼiich hasab maʼrafat al-Masiih al-ligiiha wa yamchi giddaam.
17Ya akhwaani, khalli kulluku titaabuʼu masali wa chiifu adiil al-naas al-aaychiin misilna wa fakkuru fi haalhum. 18Wa gult al-kalaam da achaan fi naas katiiriin yisawwu nufuushum adu le saliib al-Masiih misil ooreetku beyah iddat marraat. Wa battaan niʼooriiku beyah be hizin chadiid wa dumuuʼ. 19Wa fi l-akhiir, humman yamchu fi l-halaak. Butuunhum bigo leehum rabbuhum wa achaan da, yitaabuʼu chahwaathum bas. Al-cheyy al-yiʼayyibhum, da bas al-yifaachuru beyah. Wa uguulhum saabtiin fi khumaam al-dunya bas. 20Laakin jinsiiyitna aniina, hi al-jinsiiya al-samaawiiye. Wa aniina narjo munajjiina al-yaji min al-sama wa khaattiin baalna fi jaytah wa hu Rabbina Isa al-Masiih. 21Wa be gudurtah al-aziime al-yukhutt beeha kulla cheyy tihit hukmah, hu yaji yikhayyir jisimna al-daʼiif wa yajʼalah misil jismah hu al-majiid.
Currently Selected:
Filibbi 3: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.