Yuuhanna 16
16
Al-talaamiiz yatʼabo
1«Ana gult leeku kulla l-kalaam da achaan ma tamurgu min al-derib al-adiil. 2Yaturduuku min buyuut al-sala. Wa yaji wakit waahid ayyi naadum al-yaktulku yifakkir hu gaaʼid yakhdim le Allah. 3Yakrahooku misil da achaan ma irfo abuuyi Allah wa ma irfooni ana kula. 4Laakin gult leeku al-kalaam da achaan wakit al-taʼab yaji foogku, tifakkuru wa taʼarfu kadar ana ooreetku beyah. Wa ana ma ooreetku min al-bidaaya be l-taʼab al-yajiiku achaan awwal ana gaaʼid maʼaaku.
Amal al-Ruuh al-Khudduus
5«Wa hassaʼ ana nigabbil le Allah al-rassalaani wa ma fi naadum minku yasʼalni wa yuguul : ‹Inta maachi ween ?› 6Intu haznaaniin bilheen achaan ana hajjeet leeku be l-kalaam da. 7Laakin nuguul leeku al-hagg, yabga leeku akheer kan namchi. Kan ana ma namchi, al-Muʼaawin ma yaji leeku. Laakin kan ana macheet khalaas, nirassilah leeku. 8Wa wakit hu yaji, hu yiʼarrif le naas al-dunya zunuubhum wa yiʼarrifhum al-haal al-saalhe wa l-hisaab. 9Hu yiʼarrifhum al-zanib achaan ma aamano beyi. 10Hu yiʼarrifhum al-haal al-saalhe achaan ana namchi le abuuyi wa ma tichiifuuni. 11Hu yiʼarrifhum al-hisaab achaan Allah haasab Ibliis sultaan al-dunya khalaas.
12«Indi kalaam ziyaada nidoor nuguulah leeku laakin hassaʼ intu ma tagdaro tahmalooh. 13Wakit Ruuh al-Hagg yajiiku, hu yuguudku fi l-hagg al-kaamil. Al-kalaam al-yuguulah ma jaayi minnah bas laakin hu yuguul kulla cheyy al-yasmaʼah wa yiʼooriiku be l-cheyy al-lissaaʼ ma bigi. 14Hu yimajjidni yichiil min kalaami wa yiʼooriiku beyah. 15Kulla cheyy hana abuuyi hanaayi. Wa achaan da, gult leeku hu yichiil min kalaami wa yiʼooriiku beyah. 16Baʼad chiyya bas, ma tichiifuuni wa baʼad chiyya battaan, tichiifuuni.»
Al-farha gariibe
17Wa waahidiin min talaamiizah hajjo ambeenaathum wa gaalo : «Maala gaal : ‹Baʼad chiyya bas, ma tichiifuuni. Wa baʼad chiyya battaan, tichiifuuni.› Wa maala gaal : ‹Achaan nigabbil le abuuyi.› Chunu maʼana al-kalaam da ?» 18Wa gaalo : «Al-kalaam ‹baʼad chiyya›, da maʼanaatah chunu ? Ma fihimna kalaamah.»
19Wa Isa irif kadar dawwaro yasʼalooh. Wa saʼalaahum wa gaal : «Hal intu gaaʼidiin tichchaawaro ambeenaatku fi kalaami walla ? Hal fihimtu kalaami : ‹Baʼad chiyya bas, ma tichiifuuni wa baʼad chiyya battaan, tichiifuuni› ? 20Asmaʼo nuguul leeku al-hagg, intu tabku wa tahzano wa naas al-dunya yafraho. Sahiih, intu tahzano laakin al-farha tibaddil leeku al-hizin.
21«Kan mara khalbaane wa wakt al-waaluuda ja, hi tatʼab taʼab chadiid. Wa wakit wildat sakhiirha khalaas, hi farhaane wa tansa al-taʼab achaan jaabat naadum fi l-dunya. 22Wa yabga leeku misil da. Hassaʼ tatʼabo laakin ana nigabbil battaan nichiifku wa intu tafraho farha chadiide wa ma fi naadum yichiil minku al-farha di.
23«Wa fi l-yoom al-yaji da, intu ma tasʼalooni cheyy. Asmaʼo nuguul leeku al-hagg, ayyi cheyy al-tasʼalooh min abuuyi be usmi, hu yantiiku. 24Lahaddi al-yoom, intu ma saʼaltu cheyy min Allah be usmi. Asʼalooh wa hu yantiiku achaan tafraho farha chadiide.
25«Ana hajjeet leeku be amsaal laakin fi l-wakit al-yaji, ma nihajji leeku battaan be amsaal laakin niʼooriiku be abuuyi be kalaam waadih. 26Wa fi l-wakit al-yaji, tasʼalo Allah be usmi. Ana ma nuguul kadar ana nasʼal abuuyi fi chaanku. 27Abuuyi zaatah yihibbuku achaan intu habbeetuuni wa aamantu kadar ana jiit min Allah. 28Ana jiit min abuuyi wa dakhalt fi l-dunya. Wa hassaʼ namrug min al-dunya wa nigabbil le abuuyi.»
29Wa talaamiizah gaalo : «Khalaas hassaʼ da hajjeet be kalaam waadih wa ma be amsaal. 30Hassaʼ naʼarfu inta taʼarif kulla cheyy wa kan naadum ma yasʼalak kula, inta taʼarif suʼaalah. Wa achaan da, aniina niʼaamunu kadar inta jiit min Allah.»
31Wa Isa radda leehum wa gaal : «Hassaʼ tuguulu aamantu walla ? 32Laakin wakit waahid yaji wa hassaʼ al-wakit da ja khalaas. Wa fi l-wakit da bas, yichattutuuku ayyi waahid yamchi le beetah. Intu tikhalluuni wiheedi. Laakin be l-sahiih, ana ma wiheedi achaan abuuyi gaaʼid maʼaayi. 33Ana gult leeku kulla l-kalaam da, achaan talgo al-salaam beyi ana. Akiid, fi l-dunya intu tatʼabo. Laakin chiddu heelku achaan ana annasart fi l-dunya.»
Currently Selected:
Yuuhanna 16: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.