Afasus 5
5
Al-haal al-waajbe
1Intu iyaal Allah al-yihibbuku wa achaan da, khalli haalku tabga misil haalah. 2Iichu be mahabba misil mahabbat al-Masiih al-yihibbina beeha lahaddi fadaana be ruuhah. Wa gaddam nafsah hadiiye misil dahiiye al-Allah yarda be riihitha.
3Laakin al-zina wa l-haal al-cheene wa l-tamaʼ, khalli yabgo ma fiihum ambeenaatku marra waahid. Wa ma tihajju fooghum abadan. Dool ma afʼaal hana naas saalihiin. 4Abadan ma tihajju kalaam cheen wa la kalaam hana safaaha wa abadan ma talʼabo ambeenaatku be kalaam fasil. Kulla l-kalaam al-misil da, ma waajib. Fi badalah, hajju be chukur. 5Niʼakkid leeku kan naadum zannaay walla nijis walla tammaaʼ, hu ma yalga cheyy fi mamlakat Allah wa l-Masiih. Al-tamaʼ hu misil ibaadat al-asnaam. 6Ma tikhallu naadum yukhuchchuku be kalaam baatil. Be sabab al-zunuub al-misil dool, Allah yinazzil khadabah foog al-aasiyiin. 7Achaan da, ma tichaarukuuhum fi haalhum.
Ahal al-nuur
8Awwal, intu bas al-dalaam wa laakin hassaʼ, bigiitu nuur be alaakhitku maʼa l-Rabb. Iichu be l-haal al-waajbe le ahal al-nuur. 9Achaan nuur Allah yijiib natiija fi guluub al-naas wa l-natiija di, hi al-kheer wa l-adaala wa l-hagg.
10Aʼarfu tamaam al-cheyy al-yiraddi al-Rabb. 11Ma tichaaruku fi amal hana ahal al-dalaam al-ma yijiib natiija adiile. Akheer takchif al-cheyy al-humman gaaʼidiin yisawwuuh. 12Achaan al-cheyy al-humman gaaʼidiin yisawwuuh be talbiid cheen bilheen lahaddi nakhjalo kan nihajju beyah. 13Achaan ayyi cheyy kan ankachaf fi l-nuur, khalaas yinchaaf. 14Wa ayyi cheyy al-yinchaaf yinʼarif be l-sahiih. Achaan da, nuguulu : «Ya l-naayim, gumm foog ! Gumm min ust al-maytiin wa l-Masiih yidawwi nuurah foogak.»
15Fakkuru tamaam fi haalku. Ma tiʼiichu be haal al-mukhaffaliin laakin be haal al-faahimiin. 16Sawwu al-kheer fi ayyi fursa achaan al-zaman al-gaaʼidiin foogah da fasil. 17Ma tabgo juhhaal laakin afhamo al-cheyy al-yidoorah al-Rabb. 18Ma taskaro be l-khamar achaan al-khamar yisabbib illa l-fasaad. Laakin khalli Allah yamlaaku be l-Ruuh al-Khudduus. 19Achchaajaʼo ambeenaatku be khine wa anaachiid wa chukur min al-Ruuh al-Khudduus. Khannu wa achkuru Rabbina be kulla guluubku. 20Achkuru Allah abuuna fi kulla wakit wa fi kulla cheyy be usum Rabbina Isa al-Masiih.
Wasaaya le l-rujaal wa l-awiin
21Abgo daluuliin ambeenaatku wa khalli ayyi waahid yikarrim al-aakhar fi chaan al-Masiih. 22Asmaʼan, ya l-awiin, khalli ayyi mara tikarrim raajilha misil hi tikarrim al-Rabb. 23Achaan al-raajil hu raʼiis martah misil al-Masiih hu raʼiis ummatah. Wa ummatah hi jismah wa hu zaatah munajji jismah. 24Wa misil ummat al-Masiih tikarrim al-Masiih, khalli ayyi mara tikarrim raajilha fi kulla cheyy.
25Asmaʼo, ya l-rujaal, hibbu awiinku misil al-Masiih yihibb ummatah al-fadaaha be ruuhah 26achaan hi tabga umma khaassa. Hu tahharaaha be khattisiin fi almi wa be kalaam Allah 27achaan yigaddimha le nafsah umma majiide bala najaasa wa la wasakh wa la ayyi cheyy al-yitallifha lahaddi tabga khaassa leyah wa bala ayyi eeb. 28Wa kulla raajil waajib yihibb martah misil yihibb jildah. Al-yihibb martah yihibb nafsah. 29Abadan ma fi raajil al-yakrah laham jismah. Be l-aks, hu yiʼayyichah wa yirayyisah misil al-Masiih yirayyis ummatah. 30Wa ayyi waahid minnina udu min jismah.
31Wa l-Kitaab buguul : <Be sabab da, ayyi raajil yikhalli ammah wa abuuh wa yilimm maʼa martah wa l-naaseen yabgo jisim waahid.>#5:31 Al-kalaam da talgooh fi Takwiin 2:24. 32Al-kalaam da sirr aziim. Ana nuguul leeku al-kalaam da bukhuss al-Masiih wa ummatah. 33Wa bukhussuku intu kula. Ayyi raajil minku waajib yihibb martah misil yihibb nafsah wa ayyi mara waajib tikarrim raajilha.
Currently Selected:
Afasus 5: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.