Kâloŋ-ŋa Veerɛi 20
20
Gâloŋ Ɛsekaya è kɔ̀lɛ é ƃálo
(Azaya 38:1-8, 21, 22; Kɔlɔnikɔ Veerɛi 32:24-26)
1Tãi ŋí su, Gâloŋ Ɛsekaya è kɔ̀lɛ kpɔ́ a ŋánaa, naa è làa a guro é sáa. Ɣâla ŋɔlóno kɛ́-nuui Azaya Emɔ ǹóŋ è lì bɔ́ é mó ma ǹyɛɛi, “Yâwɛɛ ǹyɛɛ ífe pâi ƃâloi. Ya pâi saâi. Mɛni ma, fɛ̂ɛ nɔ́ í mɛni-ŋai kɛ́ maa-nɛ̃ɛi í gɛ́i ílɛɛ pâi saâi.” 2Gâloŋ Ɛsekaya è ŋ̀ɛ́i tìnaŋ bɛ́rɛ kâŋ ma pere é Ɣâla fɛli, 3“Yâwɛɛ, ífe nia a gɛɛ ńâai a ƃía, ŋ́gɛ tíi kɛ̀ yɛ̂. Ŋa wɔ́lɔ woo-mɛni kɛ́ yɛ̂ a ńii kélee. Ŋa wɔ́lɔ mɛnii kɛ̂ nyii ƃa nɛ̀ a gɛɛ ǹɛ̂lɛɛi.” Nyíŋi pôlu ma, è wɔ̀lɔ kpɔ́ a ŋánaa.
4Azaya è kùla gâloŋ ŋɛ́i gɛ́ lì. Kɛ́lɛ tãi è kɛ̀ pâi serîi la gâloŋ-pɛrɛ kɛ́tɛi ŋɔgalai sámai, 5Yâwɛɛ è dɛ̀ɛ pôlu Ɛsekaya pɔ́ naa a ŋorɛ̂-wooi ŋí, “Ɛsekaya, íkaa a ŋánûai Eezuɛ láa-tuɛ nuu, ǹyaŋ Ńyãa ƃa Yâwɛɛ Ɣâla nyii ínâŋ pɔlɔi Deeƃé è kɛ̀ vɛ̀lîi. Ŋa ífɛli-wooi mɛ́ni, ǹyaŋ ŋa íkaa íkɛ wɔ̀lɔ ḿâ. Ŋa pâi íƃâloi a gɛɛ fólo saaƃa a tɛ̀ɛ ƃa pâi pɔrîi liî ŋápɛrɛ kɛ́tɛi lá a gɛɛ í ḿvɛli naa. 6Ŋa pâi nɛɛ̂i naa ílɛɛ ɣele ma nîi a kóraŋ puu káo lɔ́ɔlu. Ŋa pâi íŋuŋ-maa ƃôi ka Zerusâlɛŋ taa-leei ŋí Asiria kaloŋ yêei. Ŋa pâi daa-leei ŋí maa-kɔ̃ɔi ŋáƃaa-kɛ-maai mɛni ma da gono-teei ŋá gɛ̀ ŋátii-kɛ-nuui Deeƃé yêei.”
7Nya ƃe Azaya è mò gâloŋ ŋɔtíi-kɛ-ƃelai dîa ǹyɛɛi, “Ka fîi wuru-ƃa kîiŋ ká gbɔrɔ sée gâloŋ ŋɔmũai ma. À kɛ̀ tí, a pâi ƃâloi.” 8Ɛsekaya è Aizia marê kɛ̀ ǹyɛɛ mai, “Le ƃé pâi nɛ̂i ḿâ a gɛɛ Yâwɛɛ a pâi m̀âloi, a gɛɛ fóo saaƃa yée mu ŋa pâi pɔrîi liî ŋɔpɛ́rɛ kɛ́tɛi la a gɛɛ ŋá vɛli naai?”
9Aizia è zu tòo ǹyɛɛi, “Yâwɛɛ a pâi ŋɛi-kɛ-maai lɛ̂i yâ nyii a pâi gɛ̂i a gɛɛ í gɔ́lɔŋ a pâi ŋɔkono têei ŋaa-see kɛ̂i. Ŋa ŋ̀wɛ̂lii ŋá gɔ́lɔŋ íyêei, ƃa ŋ̀wɛ̂lii a gɛɛ ninîŋ vóloi a pâi bîlanii é lí tuɛ-pere a núu kɔ́ɔ siɣêi puu kpaa pôlu-pere?” 10Ɛsekaya è zu tòo, “Naa fíi-kpɛɛi a gɛɛ í gɛ́ ninîŋ é lí tuɛ-pere a núu kɔ́ɔ siɣêi puu! Gɛ́ é lí pôlu-pere a núu kɔ́ɔ siɣêi puu.”
11Aizia è Ɣâla fɛ̀li. Nya ƃe Yâwɛɛ è gɛ̀ ninîŋ é lí pôlu-pere a núu kɔ́ɔ siɣêi puu Gâloŋ Eɣa ŋɔpɛ́rɛi gâla-ŋai ŋá ƃɛ́i núu a kâa tɛ̀ naa gɛ́ lɔi.
Worɛ̂-woo ƃó-ƃela dí kùla Babelɔŋ
(Azaya 39:1-8)
12Tãi tɔnɔi tí yée-mu, Baladaŋ ǹóŋ nyii kɛ̀ a Babelɔŋ kaloŋ è mɛ̀ni a gɛɛ Ɛsekaya è kɛ̀ kɔ̂lɛi. È kɛ̀ tí, è worɛ̂-woo ƃó-ƃela tɛ̀ɛ bɔ́ naa a kɔlɔ-ŋa da sama-sɛŋ. 13Ɛsekaya è ǹyée sèe ŋorɛ̂-woo ƃó-ƃelai mu. È ŋɔtɔ́ɔ-sãai kélee lɛ̀ dîa, ŋɔkánei, gôoi, ŋɔmii-sɛŋ maa-pɔri-sãai, ŋúru-ya kúŋ-nɛ̃ɛ-ŋai da ŋɔkɔ́-kɔ-sãai kélee. Sɛŋ da kélee fé lɛ́ɛ ní ŋɔsãa pûi kɛ́ pɛrɛ-ŋai mu da ŋɔkâloŋ-laai su nyii dífe gáa nii. 14È kɛ̀ tí, Ɣâla ŋɔlóno kɛ́-nuui Aizia è lì Gâloŋ Ɛssekaya pɔ́ naa é marê kɛ́ ǹyɛɛi, “Gbakolo-ŋai ŋí dí kùla mí? Lé ƃé da ŋ̀wɛ̂lii?”
Ɛsekaya è zu tòo, “Dí kùla kwaa kôya ma, Babelɔŋ lɔii su.”
15Aizia è marê kɛ̀, “Lé ƃé í nɛ̀ dîa gâloŋ-pɛrɛ kɛ́tɛi mui?” Ɛsekaya è zu tòo, “Dí zãai kélee kàa. Sɛŋ da kélee fé zãa pûi kɛ́-pɛrɛ-ŋai mu nyii dífe gáa nii. Ŋá gélee lɛ̀ dîa.”
16Nya ƃe Aizia è mò gâloŋ ma, “Ŋwála-wala kélee Ɣâlai ǹyɛɛi, 17tãi káa pâi nyii zɛŋ kélee gáa íkâloŋ-pɛrɛ kɛ́tɛi mui, zɛŋ kélee ínûa pɔlɔ-ŋai da wɔ́lɔ ŋáa tɛ́ gîe ma é seri sâai ŋí mai da pâi liî a gélee Babelɔŋ. Sɛŋ da kélee fé pâi lɛɛ̂i. 18Da pâi liî a ílônii sinaa da-ni Babelɔŋ lɔii su dí díkɛ dítuɛ é sáa. Da pâi dí kɛ̂i a gâloŋ ŋɔtíi-kɛ-ƃela naa gâloŋ-pɛrɛ kɛ́tɛi mu.”
19Gâloŋ Ɛsekaya è kɛ̀ gíli ŋá siâi ǹíi su-pere gɛ́ mò gbîŋ ma, “Kwa pâi nâa kɛ̂i lii-see su, kú kúfii tɔ́ɔ a tãi da tãi nɔ́ ŋ́gaa niî la ɣele mai.” Nya ƃe è mò Aizia ma ǹyɛɛi, “Ŋorɛ̂-wooi í pà la ḿbɔ é kúla Yâwɛɛ yêei, ǹɛ́lɛɛi.”
Ɛsekaya è sàa
(Kɔlɔnikɔ Veerɛi 32:32, 33)
20Mɛni da kpɛ́ni-ŋai kélee Ɛsekaya è gɛ tãi è kɛ̀ la a kâloŋ, ŋɔwála-wala-laai, ǹyá seeu-kɛ-sɛŋ kɛ́tɛi è gbɛ̀tɛi é pɛ́lɛ berei ma è ya-poto tèe la ƃɛ́i yá è kɛ̀ tɛɛ̂i naa gɛ́ pà gâloŋ-pɛrɛ kɛ́tɛi mu da Zerusâlɛŋ, gélee pɔ̃yɛ̂i Zuda kaloŋ-ŋai dímɛni pɔ̂lɔ kɔlɔi su. 21Gâloŋ Ɛsekaya è sàa dí nòo. Dí ǹóŋ-surɔŋ Manasɛ kɛ̀ a kâloŋ bɔ́ɔ ŋá.
Currently Selected:
Kâloŋ-ŋa Veerɛi 20: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia