Kâloŋ-ŋa Veerɛi 17
17
Dí Osia kɛ̀ a kâloŋ Eezuɛ
1Tãi Eezuɛ kaloŋ Eɣa è kɛ̀ la ŋɔkâloŋ-laai su a kóraŋ buu káo feerɛi, dí Osia kɛ̀ a kâloŋ Zuda. Osia ŋí ǹâŋ láa ƃɛ́ kɛ̀ a Ila. È kɛ̀ a kâloŋ Zuda lɔii mɛi a kóraŋ lɔ́ɔlu mɛi náaŋ. Zeeɛ́ɛ è kɛ̀ Sameria. 2Osia è Yâwɛɛ wóo pìli ǹyaŋ è sɔnyɔ̂ŋ kɛ̀. Kɛ́lɛ vé sɔnyɔ̂ŋ kɛ́ ní yɛ̂ɛ berei Eezuɛ kaloŋ-pɔlɔ-ŋai kɛ̀ dúɛi dí wɔ́lɔ gɛ̀ lai. 3Tãi Osia è kɛ̀ la a kâloŋ, Asiria kaloŋ Sɛmanesɛ è kɔ́ pɛ̀lɛ Eezuɛ lɔii ma. È gâloŋ da ŋɔnûai yée mɛi ɣâle é pɛ́lɛ ǹɔii mɛi. È Gâloŋ Osia kɛ̀ gɛ́ ŋuŋ-fela-fe tɛ̀ɛ bɔ́. 4Kɛ́lɛ tãi da tɛ̀ɛ pôlu ma, Osia fé ŋɔ́nɔ kɛ́ ní ŋuŋ fela-fe tɛɛ̂i. È lì é Ize kaloŋ So marê kɛ́ a gɛɛ é pá é kpɔŋ-maa tɛ̀ɛ bɔ́ é tɔ́ɔ Gâloŋ Sɛmanesɛ ma. Tãi Gâloŋ Sɛmanesɛ è mɛnii ŋí kɔ̀lɔŋ lai, è Osia sòŋ é nɔ́ kpini-pɔrɔŋ.
Sameria wólo mɛni
5Asiria kaloŋ Sɛmanesɛ è kɔ́ pɛ̀lɛ Eezuɛ lɔii ma. È Sameria taa-leei maa tînaŋ dí gɛ́ naa a kóraŋ saaƃa. 6Dí naa yée-mɛi ɣâle a Gâloŋ Osia ŋɔkâloŋ-laa koraŋ ǹɔ́ɔlu mɛi náaŋ. Asiria kaloŋ è Eezuɛ-ŋai sòŋ a kɔ-soŋ-ŋa é lí a dia Asiria lɔii su. È da-ni kɛ̀ dí sée Ala taai su a ŋɔwála-wâla-laai. È gbéli-ŋai kɛ̀ dí sée Abo Ya-leei kɔlɛ Gozaŋ lɔii kpiniŋ su. È gɛ̀ ǹûai kpéli-ŋai dí sée daa-ŋai su ƃɛ́i Midia-ŋai dí kɛ̀ naai.
7Mɛni-ŋai ŋí kélee dí kɛ̀ kpɛ́ni fêi, Eezuɛ-ƃelai dí sɔnyɔ̂ŋ kɛ̀ da dí pôlu tɔɔ Díɣâlai Yâwɛɛ ma nyii díŋuŋ ma ƃò é dí kúla Ize lɔii su ƃɛ́i dí kɛ̀ naa a luɛ-ŋai. Dí kɛ̀ Ɣâla-pɔkɔŋ-ŋa fɛlîi. 8Dí pìlaŋ ǹɔii-ŋûŋ-ŋai tûa-pere-ŋai pôlu nyii-ŋai Yâwɛɛ è dí kpɛ̀ Eezuɛ-ŋai ŋɛ́i-tuɛi. Dí kɛ̀ a dísɔŋ nyɔ́mɔɔ yɛ̂ɛ Eezuɛ kaloŋ-ŋai. 9A gɛɛ Eezuɛ-ŋai dísɔnyɔ̂ŋ kɛ́tɛ kɛ́i, dí kɛ̀ dí loôi Yâwɛɛ Díɣâlai ma. Dí díkpîŋ Ɣâla-pɔkɔŋ fɛli kwaa-ŋa ma kpɛ̀tɛ Eezuɛ lɔii gwaa kélee ma é kúla daa pɛlɛ-pɛlɛi su é lí daa-lee kpaya-kpayai su nyii-ŋai siɣaŋ-ŋa dí kɛ̀ a dí tínaŋɔɔ dîai. 10Dí ɣâla-pɔkɔŋ-ŋa fɛli kwaa-ŋa ma kpɛ̀tɛ da kɔni Ɣâla-teƃele-ŋa ǹyée-ŋai ma da ŋ̀úru kpaya-kpayai niniŋ mu ŋâla-pɔkɔŋ Asira fɛli mɛni ma. 11Dí kɛ̀ liî a sâla-ŋa kuláa díɣâla-pɔkɔŋ fɛli-kwaa-ŋai ma nɔ́ yɛ̂ɛ berei ǹɔii-ŋuŋ kpéli-ŋai dí wɔ́lɔ kɛ̀ gɛ̂i la Yâwɛɛ é lɛ́ɛ pâi dí kpɛ̂i Eezuɛ-ƃelai túɛ Eezuɛ lɔii su. Dí mɛni nyɔ́mɔɔ támaa kɛ̀ nyii-ŋai Yâwɛɛ líi ŋwàna kpɔ́ a zu kɛ́tɛi. 12Berei máŋ Yâwɛɛ è mò la Eezuɛ-ŋai dîa a gɛɛ dífe ɣâla-pɔkɔŋ fɛlii, dífe ŋ̀óo siɣe ni. Dí kɛ̀ nɔ́ gɛ̂i tí.
13È kɛ̀ tí, Yâwɛɛ è ŋɔlóno-ƃelai da ŋɔworɛ̂-woo ƃó-ƃelai tɛ̀ɛ a gɛɛ dí Eezuɛ da Zuda-ƃelai lia-woo ƃò a ŋ̀óo-ŋai ŋí. “Ńyãa, Yâwɛɛ ŋa môi kâa a gɛɛ ká kpéra mɛni nyɔ́mɔɔ-ŋa kɛ́ɛ ma, ká pɛ́lɛ ŋátɔ̂ŋ-ŋai mɛi káa ma da ŋásɛŋ-lɛɛ-ŋai! Ŋá wɔ́lɔ dítɛ̀ɛ kánuu-pɔlɔ-ŋai pɔ́, ǹyaŋ ŋá mò ŋátii-kɛ-ƃelai dîa nyii-ŋai kɛ̀ a ŋálono-kɛ-ƃelai a gɛɛ dí mó kâa, káa máŋ.” 14Kɛ́lɛ Eezuɛ-ŋai dífe woo-mɛni kɛ́ ní. Dí kɛ̀ nɔ́ a díwôlii kpɔ́lɔɔ yɛ̂ɛ dínâŋ-pɔlɔ-ŋai nyii-ŋai dífe fáa ní ma a gɛɛ dí Yâwɛɛ Díɣâla fɛ́li. 15Dífe wɔ́lɔ díwoli tɔɔ ní Yâwɛɛ ma ŋɔlia-woo-ŋai da ŋɔtɔ̂ŋ-ŋai ǹyaŋ dí díyee kùla Gbanaŋ-woo kpanaŋɔɔ lɛ́lɛɛi mu nyii Yâwɛɛ è wɔ́lɔ gɛ̀ dínâŋ-pɔlɔ-ŋai yêei. Dí pɛ̀lɛ ɣâla-pɔkɔŋ kpɛ́ni-kpɛni-ŋa fɛliɛɛ ma ǹyaŋ dia kpîŋ dí kɛ̀ nɔ́ kpɛ́ni-kpɛni. Yâwɛɛ è wɔ́lɔ mò Eezuɛ-ŋai dîa a gɛɛ dífe pìlaŋ mɛni-ŋai pôlu díkɔlɛ ma lɔii-ŋuŋ-ŋai dí kɛ̀ gɛ̂i, kɛ́lɛ Eezuɛ-ƃelai dí díkpîŋ kɛ̀ nɔ́ yɛ̂ɛ dia. 16Eezuɛ-ƃelai dífe díwoli tɔ̀ɔ ní dɔ̂ŋ-ŋai dîa nyii Yâwɛɛ Díɣâlai è dɛ̀ɛ dípɔi. Dí niŋa-loŋ pɔkɔɔŋ feerɛ kpɛ̀tɛ díkpîŋ mɛni ma a kɔli a gɛɛ díkɛ vɛ̀li. Dí wúru kôya tɔ̀ɔ ŋâla-pɔkɔŋ Asira fɛli mɛni ma. Dí kɛ̀ máŋ bɛ̂mɛlɛŋ-kao-ŋai fɛlîi da Bêe ɣala-pɔkɔŋ. 17Da kâa dílônii kùla máŋ a kéreŋ sala ŋâla-pɔkɔŋ-ŋai dîa. Dí kɛ̀ tɛli kpɛ̂i, dí kɛ́ lì tuɛ-mɛni ƃó-ƃela pɔ́naa. Eezuɛ-ŋai díkpîŋ tɛ̀ɛ mɛni nyɔ́mɔɔ kɛ́ mɛni ma nyii-ŋai díwɛli fé kɛ́ ní Yâwɛɛ mai. Dí gɛ̀ ǹíi é ŋwána dîa a ŋánaa. 18Yâwɛɛ líi è ŋwàna kpɔ́ Eezuɛ-ƃelai dîa a zu kɛ́tɛ nyii gɛ̀ é gɛ́ díkula ŋ̀ɛ́i. Dí tɔnɔ da kpîŋ fé lɛ̀ɛ ní naa. Zuda-ƃelai nɔ́ ƃé lɛ̀ɛ dílɔii su.
19Kɛ́lɛ Zuda-ƃelai máŋ dífe Yâwɛɛ Díɣâlai ŋɔtɔ̂ŋ-ŋai mɛi káa ní. Dí mɛni nyɔ́mɔɔ-ŋai maa kɔ̂ri díkɛ dí kɛ̀ nɔ́ yɛ̂ɛ Eezuɛ-ƃelai. 20È kɛ̀ tí, Yâwɛɛ è bôlu fè ǹúui kélee ma kɛ̀ Eezuɛ da ǹɔii sui ǹyaŋ è fàa ma díkpɔara-ƃelai dí díyee mɛi ɣále dí díkula-maa kɛ́.
21Tãi Yâwɛɛ è Eezuɛ lɔii kula la Zuda lɔii mai, Eezuɛ-ŋai dí wɔ́lɔ Neba ǹóŋ Zɛroboaŋ ma a gɛ́ɛ é kɛ̀ a díkâloŋ. Zɛroboaŋ è Eezuɛ-ŋai kɛ̀ dí kpéra Yâwɛɛ fɛliɛɛ ma ǹyaŋ dí sɔnyɔ̂ŋ su kɛ́tɛ kɛ̀. 22Eezuɛ-ƃelai díkɛ̀ nɔ́ Zɛroboaŋ pôlu, dí kɛ́ zɔnyɔ̂ŋ-ŋai kélee kɛ̀ nyii-ŋai è kɛ̀ díkɛ̂i. Dífe dɔnɔ kpîŋ maa laa ní, 23é lɛ́ɛ la zu Yâwɛɛ é dí kpɛ́ ŋɛ́i nɔ́ yɛ̂ɛ berei è wɔ́lɔ dí lia-woo ƃò la ŋɔtíi kɛ́-ƃelai, Ɣâla ŋɔlóno kɛ́-ƃelai sârai. Mɛnii tí ƃé gɛ̀ dí kɛ́ lì a Eezuɛ-ƃelai luɛ-laa su a kɔ-soŋ-ŋa Asiria lɔii su ǹyaŋ naa ƃé díkaa sâa naa.
Asiria-ƃelai dí sèe Eezuɛ lɔii su
24Asiria kaloŋ è nûa kùla nyii-ŋai kɛ̀ daa-lêe-ŋai ŋí sui. Babelɔŋ, Kuta, Ava, Ama da Sɛvavaiŋ é lí a dia é dí kɛ́ dí sée Sameria lɔii su. Dí sèe daa-ŋai su ƃɛ́i Eezuɛ-ŋai dí wɔ́lɔ kɛ̀ naai é pɛ́lɛ dí taa-leei Sameria ma. Dí naa sìɣe a dípɔɔ. 25Tãi ŋɔ̃ya-ŋai ŋí dí sèe la Eezuɛ lɔii su a maa-ŋuŋ, dífe kɛ́ ní Yâwɛɛ fɛlii ǹyaŋ è yala sûlu-ŋa tɛ̀ɛ a gɛɛ dí tóo dísama. Dí ǹûai da-ni pàa. 26Worɛ̂-woo ƃó-nuu è lì Asiria kaloŋ pɔ́ naa é mó ma ǹyɛɛi, “Ǹûai í lì a dia a gɛɛ dí sée Eezuɛ lɔii sui, dífe ǹaa Ɣalai fɛli-pêre kɔ́lɔŋ da ŋɔtɔ̂ŋ-ŋai. Ǹyaŋ è yala sûlu-ŋa tɛ̀ɛ dísama. Díkaa ǹûai paâi.” 27Gâloŋ è zu tòo ǹyɛɛi, “Eezuɛ-ŋai dí sâla-laa soŋ-ƃelai kú pà ƃɛ́ a dia a kɔ-soŋ-ŋai, dɔnɔ tɛɛ pôlu Eezuɛ. A pɔ̂ri kɛ̂i naa é sée dísama é sɛŋ lɛ́ dîa é pîlaŋ ǹɔii tí su ɣalai ma.” 28Dí Eezuɛ sala láa-soŋ-ƃelai dɔnɔ sìɣe zu dí dɛ́ɛ pôlu Eezuɛ. Tãi è sèri pôlu Eezuɛ lɔii sui, è sèe Bɛtɛ taai su ǹyaŋ è sɛŋ lɛ̂ ǹûai dîa berei da pɔ̂ri Yâwɛɛ fɛlîi lai.
29Kɛ́lɛ ǹúu-kpulu-ŋai kɛ̀ daa-ŋai tí su Eezuɛ lɔii su gwaa kélee, dí díkpîŋ ɣala-pɔkɔŋ-ŋa kpɛ̀tɛ, dí maa Ɣâla-pɔkɔŋ-ŋai tí sée Eezuɛ-ŋai díɣâla-pɔkɔŋ-ŋa fɛli kwaa-ŋai ma. 30Ǹûai kùla Babelɔŋ dí ŋâla-pɔkɔŋ Sukɔ-Binɔɔ kpɛ̀tɛ dímɛni ma. Diai kùla Kutai dí ŋâla-pɔkɔŋ Nɛga kpɛ̀tɛ dímɛni ma. Diai kùla Amai dí ŋâla-pɔkɔŋ Asima kpɛ̀tɛ dímɛni ma. 31Diai kùla Avai, dí ŋâla-pɔkɔŋ-ŋai Niɣa da Taata kpɛ̀tɛ dímɛni ma. Diai kùla Sevavaiŋ dí dílônii kùla a kéreŋ-sala díɣâla-ŋai Adiramilɛ da Anaŋmilɛ-ni dîa. 32Ǹûai ŋí dí Yâwɛɛ fɛ̀li máŋ. Dí nûa sii támaa-tamaa kùla dísama dí díkɛ a dísâla láa soŋ-ƃela díɣâla pɔkɔŋ-ŋai fɛli kwaa-ŋai ma a gɛɛ díkɛ sâla kulâi naa dímɛni ma. 33Nya ƃe dí Yâwɛɛ fɛ̀li, kɛ́lɛ dí kɛ̀ nɔ́ díkpîŋ-kpɛtɛ Ɣâla-ŋai fɛlîi máŋ yɛ̂ɛ berei ǹɔii-ŋai dí kùla zui naa tua-pere-ŋai díkɛ̀ lai.
34Díkaa niî dítûa-pere pɔlɔ-ŋai kɛ̂i sâai ŋí ma. Dífa Yâwɛɛ fɛ̀li nɔ́ tí kpaa máŋ dí ŋɔtɔ̂ŋ-ŋai mɛi káa da ŋɔlia-woo-ŋai nyii-ŋai è dɛ̀ɛ Zeeka ŋɔsuui pɔi, nyii è ǹáa maa fâleŋ a Eezuɛ. 35Yâwɛɛ è Kpanaŋ-woo kɛ̀ díyêei é mó dîa ǹyɛɛi, “Káfe Ɣâla da kpɛ́ni-ŋa fɛ̀li. Káfe pìlaŋ káŋume ŋá díŋɛi-tuɛ kpaa máŋ ká tíi kɛ́ dîɛ kpaa máŋ ká sâla-ŋa kula dîa. 36Fɛ̂ɛ ká Ńyãa, Yâwɛɛ Ḿvɛli, Ńyãai ká kùla Ize a ŋáwala-wala-laai. Fɛ̂ɛ ká pîlaŋ ká-ŋume ŋá ŋ́ɛi-tuɛ, ká sâla-ŋa kula mâ Ńyãa tɔnɔ. 37Fɛ̂ɛ ká dɔ̂ŋ-ŋai da nia-woo-ŋai mɛi káa nyii-ŋai ŋá bɔ̃yɛ kámɛni mai. Káfe Ɣâla da kpɛ́ni-ŋa fɛ̀li, 38ǹyaŋ káfe nia Gbanaŋ-wooi ma kwa kâa-ni kú gɛ̀i. Káfe Ɣâla da kpɛ́ni-ŋa fɛ̀li. 39Ńyãa tɔnɔ nɔ́ ƃé ká ḿvɛli, Ńyãai a Yâwɛɛ, Káɣâlai. Ŋa pâi kákulâi kákpɔara-ƃelai yeei.”
40Kɛ́lɛ ǹûai tí dífe díwoli tɔɔ ní, díkɛ̀ nɔ́ dítûa-pere pɔlɔ-ŋai kɛ̂i. 41Ǹûai tí dí Yâwɛɛ fɛ̀li, kɛ́lɛ dí díɣâla-pɔkɔŋ-ŋai fɛ̀li máŋ. É kúla tãi tí ma é tóo sâa ma, dísuui su-ƃelai díkaa nîi mɛni tɔnɔi ŋí kɛ̂i.
Currently Selected:
Kâloŋ-ŋa Veerɛi 17: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia