Tɛsɛlôniɛŋ Maa-ŋuŋ 5
5
Ka kákpîŋ kpɛtɛ Kúnuu-namui ŋɔpâi mɛni ma
1Kɛ́lɛ, ŋánûa, ŋele-ŋai ŋí ŋɔtãi ma, vé a sɛŋ a gɛ́ɛ núu da é mɛni da kélee pɔ̃yɛ káa e pîlaŋ dîa. 2Kpɛ́ni fêi, kákelee ká gɔ́lɔŋ a ǹɛ́lɛɛ a gɛ́ɛ Kúnuu-namui ŋɔɣelei a pâi pâi nɔ́ a kpini yɛ̂ɛ ŋúma-nuu. 3À kɛ̀ nûa da mò dîyɛɛ, “Lii-see káa naa da mɛi-kaa-laa,” gɛ̀ ní su-kara a pâi pâi dîa dítɛ̂i-pere yɛ̂ɛ koi-tee a pɛ̂lɛ nɛnî ma, ǹyaŋ dífe pâi pɔ̂ri kulâi zu. 4Kɛ́lɛ, ŋánûa, káfe kpinii, mɛni ma maa-ɣelei ti fe pâi kɛ̂i a gúlaa a káa yɛ̂ɛ ŋúma-nuu. 5Kpɛ́ni fêi, kákelee kákaa a kwaa-ponoɔ-lonii da ɣele-ƃɔ́ɔ-lonii; kúfe a kpini-lonii. 6Mɛni ma kúfe nyíi yɛ̂ɛ berei ǹúu kpeli-ŋai da gɛ̀ lai, kɛ́lɛ, kwaa ku kɛ́ a kúŋɛi ku kɛ́ a kúŋuŋ su séɣeŋɔɔ. 7Kpɛ́ni fêi, diai da nyîi, da nyîi a kpini, diai da lɔɔ kpêlei díkaa lɔɔ kpelêi a kpini. 8Kɛ́lɛ, tãi nɔ́ kúkaa la a ŋele-ƃɔi pɔ́ɔi, kwaa ku kɛ́ a kúŋuŋ su séɣeŋɔɔ, ku laa-la kɔli-kalaŋ da wɛli-kɛ-maa kɔli-kalaŋ pɛlɛ ku-keŋe lá gbaƃɛlɛi é kɛ̂ a ƃalo-laa maa-kili kɛ-zu. 9Kpɛ́ni fêi, Ɣâla fe niî gbɛtɛ ni kúmɛni ma a gɛ́ɛ kulii-ŋwana sɔlɔ ƃo, kɛ́lɛ, a gbɛtɛ kúmɛni ma a gɛ́ɛ ku ƃalo-laa sɔlɔ ƃó Kúnuu-namui Zîsɛ Kôrai sârai, 10nyíi saa kúmɛni ma a gɛ́ɛ a nɛ̃ɛ ma ku kɛ́ niî ɣele ma, kpaa ku saa, kwa dîa-ni ku kɛ́ kwaa tɔnɔ mai. 11Mɛni ma ka kákîe-ni líi kpéle, ka kákîe-ni su kpanaŋ yɛ̂ɛ berei nɔ́ kákaa gɛ̂i lai.
Pɔ̂ɔ a m̀arâai lia-woo ƃôi
12Mɛni ma, ŋánûa, kwa kákpera fêi a gɛ́ɛ ka ƃaa kɛ́-maa tɛɛ díi-kɛ-ƃelai pɔ kásama, nyíi-ŋai díkaa ka-mɛi Kúnuu-namui kponôi, díkɛ kalia-woo ƃoi. 13Ka ƃaa kɛ́-maa tɛ́ɛ dípɔ a zu kɛ́tɛ wɛli-kɛ-maa su dítii mɛni ma. Ka kɛ́ lii-sêe su kákîe-ni sama. 14Kwa kalia-woo ƃôi, ŋánûa, a gɛ́ɛ diai dífe tíi kɛ̂i, ka dília-woo ƃó. Diai dílii toɔɔ̂i pôlui, ku dílii-kpele-woo ƃó. Ka kpɔŋ-maa tɛɛ vii-kpɛɛ-ƃelai pɔ. Lii-kpele é kɛ́ káyêei díkelee mɛni ma. 15Ka gáa a gɛ́ɛ káfe mɛni nyɔ́mɔɔ gba kula a mɛni nyɔ́mɔɔ, kɛ́lɛ, ka kɔ́ a tãi kélee a gɛ́ɛ ka mɛni lɛ́lɛɛ kɛ́ a kákîe-ni da núu kélee. 16Ka lii-nɛ̃ɛ kula a ɣele kélee, 17ka Ɣâla fɛli a tãi kélee, 18ka sɛɣɛi-fei tɛɛ mɛni-sii kélee su; kpɛ́ni fêi, nyíŋi káa a Ɣâla ŋɔnîa-mɛni kámɛni ma Zîsɛ Kôrai kponôi. 19Káfe M̀ɔlêŋ kpera, 20káfe káŋɛi naɣîŋ Ɣâla-woo-ƃoɔ mɛi, 21kɛ́lɛ, ka mɛni kélee maa kpɛ́ɛ; mɛnii nyíi ǹɛ́lɛɛ̂i ka zoŋ a gbanaŋɔɔ, 22ka kasu kula mɛni nyɔ́mɔɔ-sii kélee ma.
23Nii-see-Ɣalai ǹyaa kpîŋ é kámaa wáa pere-sii kélee su; sɔnyɔ̂ŋ fè kɛ̀ kámɔ̂leŋ ma da kákponôi a Kúnuu-namui Zîsɛ Kôrai pá-tãi. 24Ǹúui nyíi kátolîi, zã́âi, ǹyaŋ a pâi gɛ̂i.
Naa-ti-maai kpɛɛ-ŋai da ǹûai
25Ŋánûa, ka Ɣâla fɛli kúmɛni ma.
26Ka kála ti káƃarâai kélee dîa a la-kpɔ see-maa maa waa.
27Ŋa m̀ôi kâa Kúnuu-namui láai su a gɛ́ɛ ka gɔlɔi ŋí lóno káƃarâai kélee dîɛ.
28Kúnuu-namui Zîsɛ Kôrai ŋɔƃɛlɛ-sêei é kɛ́ kâa.
Currently Selected:
Tɛsɛlôniɛŋ Maa-ŋuŋ 5: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia