Zɔ̂ŋ Maa-ŋuŋ 5
5
Laa-laa ƃa ǹɔii ŋɔyee-tɛɛ-maa
1Ǹúui kélee a lâa la a gɛɛ Zîsɛ káa a Kôrai, maa-nuui káa a Ɣâla ǹóŋ. Ǹúui kélee a nàŋ-nuui wɛ̂lii, è ǹônii wɛ́li ni máŋ. 2Nyíŋi su ƃe kwa gɔ́lɔŋ naa a gɛɛ kú Ɣâla ǹônii wɛ́li ni, tãi kwa Ɣâla wɛ̀li la kú ŋɔtɔ̂ŋ-ŋai mɛi káai. 3Ɣâla ŋɔwɛli-kɛ-maai ká ŋí a gɛɛ kú ŋɔtɔ̂ŋ-ŋai mɛi káa. Ŋɔtɔ̂ŋ-ŋai dífe wiɛ ni. 4Kpɛ́ni fêi, ǹúui kélee gáa a Ɣâla ǹóŋ, ǹyée tɛɛ̂i ǹɔii ma. Ǹyaŋ kúlaa-lai ƃa ǹyee-tɛɛ-maai nyíi ǹɔii yée mɛi ɣálêi. 5Gbɛ̂ɛ ƃe ǹyée tɛɛ̂i ǹɔii ma é kúla ǹúui pôlu ǹaâi la a gɛɛ Zîsɛ káa a Ɣâla Ǹóŋ?
Mɔ̂leŋ ŋɔsêre-faai é pîlaŋ Zîsɛ Kôrai ma
6Zîsɛ Kôrai è pà yá da ŋãa sârai. Yá tɔnɔ nɔ́ fêi, kɛ́lɛ, è pà yá da ŋãa sârai. 7Mɔ̂leŋ ƃa zere-faa kɛ̀, kpɛ́ni fêi, Mɔ̂leŋ ƃa dɔ̃yâi. 8Sere-faa kɛ-ƃela saaƃa ƃe naa. Dia ƃa Mɔ̂leŋ, ǹyái, da ŋãai. Ǹyaŋ zere-faa kɛ-ƃela saaƃai ŋí díwoo káa zu tɔnɔɔ. 9À kɛ̀ kwa núu-kpune ŋɔsêre-faa-kɛɛ sìɣe, Ɣâla ŋɔsêre-faa-kɛɛi kɛ́tɛ̂i é tɛ́ɛ núu-kpune ŋɔi ma. Kpɛ́ni fêi, Ɣâla ŋɔsêre-faa-wooi ká ŋí a gɛɛ a Ǹóŋ maa-sere-faa kɛ́. 10Ǹúui a lâa a Ɣâla Ǹóŋ, sere-faa káa gbonôi. Ǹúui va lâa a Ɣâlai, a gɛ́ a lɛ́ɛ-nuu, kpɛ́ni fêi, vé niî laa ní a Ɣâla ŋɔsêre-faai è gɛ̀ Ǹóŋ mɛni mai. 11Zere-faai ká ŋí a gɛɛ Ɣâla a wɔlɔ-wɔlɔ fulu-laai tɛ́ɛ kúpɔ. Vúlu-laai ŋí káa Ǹóŋ kponôi. 12Ǹúui Nòŋ-nuui káa ǹyêei, fúlu-laa káa ǹyêei. Ǹúui Nòŋ-nuui fé ǹyêei, fúlu-laa fé ǹyêei.
Ŋ̀wɔ́lɔ-wɔlɔ fulu-laai maa-tarei
13Ŋa m̀ɛnii ŋí pɔ̃yɛ kápɔ naa káai kálaâi a Ɣâla Ǹóŋ láai, a gɛɛ ká gɔ́lɔŋ ŋwɔlɔ-wɔlɔ fúlu-laai káa káyêei. 14Nii-kpelêi kúyêei m̀ɛni mai ǹyaa ká ŋí a gɛɛ kwa sɛŋ kélee da fɛ̀li mà yɛ̂ɛ berei ǹîa-mɛnii káa lai, a kúwoo mɛni. 15À kɛ̀ kwa gɔ̀lɔŋ a gɛɛ a kúwoo mɛni sɛŋ kélee mɛni ma kwa vɛli mai, gɛ̀ ní kú gɔ̀lɔŋ zɛŋ kélee kwa vɛ̀li mai, gáa kúyêei. 16À kɛ̀ núu da à marâŋ nuu kàa sɔnyɔ̂ŋ kɛ̂i nyíi vé a núu paa-sɔnyɔ̂ŋ, ka Ɣâla fɛ̀li, ǹyaŋ Ɣâla a pâi fúlu-laa tɛɛ̂i diai pɔ́ dísɔnyɔ̂ŋ fé a núu paa-sɔnyɔ̂ŋ. Sɔnyɔ̂ŋ da káa naa nyíi gáa a núu paa-sɔnyɔ̂ŋ, fé m̀ó ni a gɛɛ núu é Ɣâla fɛli nyíti mɛni ma. 17Mɛni nyɔ́mɔɔ kélee káa a sɔnyɔ̂ŋ, kɛ́lɛ, sɔnyɔ̂ŋ da káa naa nyíi vé a núu paa-sɔnyɔ̂ŋ.
18Ku gɔ̀lɔŋ ǹúui kélee gáa a Ɣâla ǹóŋ va sɔnyɔ̂ŋ kɛ̀, kɛ́lɛ, Ɣâla Ǹóŋ a mɛi kâa, ǹyaŋ ŋ̀wana-lɔ̂ɔ-nuui fa lɛ̂ɣɛ mà.
19Kú gɔ̀lɔŋ kúkaa a Ɣâla pɔ́ɔ, ǹyaŋ ǹɔii kélee káa ŋ̀wana-lɔ̂ɔ-nuui ŋɔwala-walai yée mu.
20Kú gɔ̀lɔŋ Ɣâla Ǹóŋ a pá a mɛni-ŋa-kaa tɛ́ɛ kúpɔ a gɛ́ɛ kú ǹúui kɔ́lɔŋ gáa a dɔ̃yâ-nuui. Ǹyaŋ kúkaa dɔ̃yâ-nuui kponôi, ǹyaa ƃa Ǹóŋ Zîsɛ Kôrai. Ǹyaa ƃa Dɔ̃yâ-Ɣalai da wɔlɔ-wɔlɔ fulu-laai. 21Nîa-pɛlɛɛ, ka kákpîŋ mɛi káa ɣâla-pɔɔkɔ̂ŋ ŋa mɛni ma.
Currently Selected:
Zɔ̂ŋ Maa-ŋuŋ 5: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia