Ez 4
4
Re' i Ezequiel xuk'uhtaaj nik' wach noq xchoparik naah i tinamit Jerusaleem
1Re' i Dios je' wili i xuq'or weh: Re' hat rak'uun winaq, cha chop jino'q i nimlaj xaan neenatz'ihb'aaj chuwach i rehtalil i tinamit Jerusaleem. 2Eh neenatz'ihb'aaj chi junsuut i kehtalil i soldado je' i q'aq'inik inki a'n Eh nee neenatz'ihb'aaj i rehtalil chi kotimaj riij chi tz'aq, neenatz'ihb'aaj rehtalil chi k'otooj jul je' rooq ha' chi junsuut, k'uhtb'al reh chi re' i tinamit kotimaj chik riij. 3Eh neenaperaa' jumpehr-oq i ch'ihch' chawach reh chi je' jinaj koraal tz'aq i neenq'atwik chawach i xatz'ihb'aaj wii' rehtalil i tinamit Jerusaleem. Eh naa ayejaam awiib' chi je' cho naa awokiik chi q'aq'inik chinaah i tinamit. Re' re' i rehtalil chi je' re' i naakik'ulum i aj Israel.
4Yu'naak naa ayohkiik chinaah i tz'eet k'uhtb'al reh i kimahk i aj Israel. Eh jarub' q'iij naa ayohkiik chinaah aatz'eet ar naa ak'uhtaam chi je' re' najtiil i ti' k'axik naakik'ulum i aj Israel ruum i kimahk. 5Eh lajeeb' chik ma' kijib' siento q'iij naa ayohkiik panatz'eet, eh re' ju'jun q'iij rehtalil i ju'jun haab' chi ti' k'axik naakik'ulum i aj Israel ruum i kimahk. 6Eh chi riij i re', ka'winaq q'iij naa ayok'aam awiib' pana sak'aaj, re' ju'jun q'iij rehtalil i ju'jun haab' chi ti' k'axik naakik'ulum i aj Judá ruum i kimahk. 7Eh nee ti' ilwik reje Jerusaleem rehtalil chi naa ruchopariik naah kuum i aj ixowaal neenatol i wach atileb', eh neenaq'or keh i ti' k'axik naakik'ulum. 8Re' hin je' naa nanuub'ak'am awach chi k'ahaam reh chi ma' k'ul ta chik nee nasutej awiib' korehtaal inakohlaaj ruk'ulariik i ti' k'axik.
9Yu'naak i hat chamol k'isinoq atrigo, eebada, lentejas, mijo, eh avena, xa jinaj chayeew wii' pan jino'q xun. Ruuk' taqe re' naa ayejaam aakaxlanwi'k re' naa ak'uxum chuwach i lajeeb' chik ma' kijib' siento q'iij noq naa ayohkiik chinaah aatz'eet. 10Re' hat xanaa apajam awa', xa waxiqiib' onse naa ak'uxum chuwach i ju'jun chi q'iij. 11Eh je' wo' hoq ahaa' xanaa wo' apajam xakiib' kulk i naa awuk'em chuwach i ju'jun chi q'iij. 12Re' i naa ak'uxum jinaj chi kaxlanwi'k re' ruuk' i Eebada korjinaq wii', eh ruuk' ruq'aq'al rusaa' tinamit naa achaq'sam. Ar naa achaq'sam aha' naa kaat kilom wii' i tinamit.
13Je' aj wili i naa kik'uxum i aj Israel aha' naakik'amariik reje wii' pan tokoom tinamit. Ch'uwa' wach i naa rojiik kik'uxum, inki weh i Dios.
14Eh re' hin je' wili i xnuq'or reh: QaJaaw Dios, re' hin ma' jank'al ta nutz'aj cho weh i ch'uwa' wach. Eh ma' jank'al taj i nuk'ux weh i chikop xakikimik chi kutkeel, je' wo' taqe chikop xa kikanteesjik kuum i josq'laj chikop, ni xata re' taqe i ch'uwa' wach.
15Re' reh je' wili i xuq'or reh: Wila' ma' nawaaj akojom i rusaa' tinamit chi chaq'teesb'al reh aakaxlanwi'k, neenuyeew q'ab' aweh chi ruuk' i rusaa' wakax neenachaq'saj, inki. 16Eh re' Dios je' wili i xuq'or weh: Hat rak'uun winaq re' hin naa nuye'em i wi'jaleel chikinaah i aj Jerusaleem. Xa naa chik rupajariik i kiwa', eh naa rutib'iik kik'ux. Re' i kihaa' xanaa wo' rupajariik, eh ma' k'isiin ta naa kiyo'jiik. 17Eh noq ma' xta chik i kiwa' kihaa', xak'ul chik naakitz'ehtaam panaq'kiwach, naa kiyo'jiik. Xa re' la' xa ruum wo' i kimahk naa rusahchiik kiwach, inki.
Currently Selected:
Ez 4: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.