Gn 50
50
1Axa toj lak'naj cham José yin is mimanil cham Jacob is mam tu', cax max ok'ajok, max c'oli tz'ubon el is ti' is mam tu'. 2Lajwi tu xin, max chekon cham José eb chi mulnaj bay, tol chi oc ambal yin mimanil is mam tu'. Max alay oc xin yet watx' c'am chi etaxtok. 3Cawinak c'u max yitok yet max alay oc ambal yin mimanil is mam tu', axca ton tu' is c'ual chi yitok yet chi watx'ji junok mimanilej. 70 c'ual wal max cus eb nak aj Egipto tu' yuj is camichal cham Jacob tu'. 4Max lajwi 70 c'ual tu', catatu' max toj cham José k'anjab yetok eb nak ayoc yin opiso yetok cham rey, cax max yaloni:
—Ta watx' in yul e sat, ok'okab e c'ul win, chex toj k'anjab bay satak cham rey, 5yujtol a yet toxa chi cam cham in mam, max yal ayin tol chi wak' in ti', tol chin muk bay jun mukbanil camnak, tol a' max watx'nencanok; tol a tu' ay bay yul yet tx'otx' Canaán. Yuj tu' xan chin tewi yet chi toj in mukcan in mam tu'; asan chi lajwi in mukoncan in mam tu xin, cax chin meltzojtek, ẍi cham José.
6Max tak'wi cham rey bay axca ti':
—Asi', mukcan is mimanil a mam tu', axca wal max yun alon yet max ak'on a ti' bay tu', ẍi cham rey.
7Max lajwi tu xin, max toj cham José mukon can is mam tu'. Masanil eb ayoc yin opiso yetok cham rey, a ton eb ay yikbej yul yet Egipto tu', max toj mukwal yetok cham José. 8Max toj masanil yuninal cham Jacob, c'al yuninal cham José, c'al yuninal masanil eb yuẍtak José tu'. Asanxanej eb coc'al unin max can bay Gosén yetok c'apax no no'. 9Ay pax mac ibil oc is carruaje max toj mukwal tu'; ay c'apax mac ayaj yiban chej max toji, yuj tu' xiwil anima max toj mukonok. 10A yet max apni oc eb bay Goren-ha-atad bay satak eltok a' miman Jordán, a tu' max tx'ox wal eb is cusc'ulal masanil eb mukwajwom tu'. A bay tu' max cancan eb yin ukeb c'ual, a ton yet tu' ayoc cham José yin miman cusc'ulal yuj is mam.
11A yet max yilon eb cananeo bay jun lugar tu' tzet chi yut ba eb aj Egipto yetok is camom, max yalon eb axca ti': A eb aj Egipto ti', caw wal ay is may chi yun yilwi ak'bal eb yin is camnak, ẍi eb. Yuj tu xin, xan max yak' eb nak yik jun lugar tu' Abel-Mizraim.*fn* A tu' ay bay satak eltok a' miman Jordán.
12A masanil tzet max k'ancan cham Jacob bay eb nak is c'ajol, max yikej eb yuneni. 13Ilab tol max yitok eb nak is mimanil bay yul yet Canaán mukon bay ch'en olan ch'en bay Macpela, a ton ch'en manbil yetokc'al tx'otx' tx'otx' yuj Abraham bay nak Efrón hitita. A jun tu' max oc is camposantook eb cham. A jun tx'otx' bay ay ch'en olan ch'en tu', a tu' ay bay cawilal tx'otx' yet camom Mamre. 14Max lajwi mukon cham José is mam tu xin, cax max meltzoj yetok eb yuẍtak c'al yetok masanil eb max tit bay Egipto.
Chi mimanc'ulnej José eb yuẍtak
15A yet max lajwi camtok cham Jacob, max c'oli naon eb nak yuẍtak cham José, max yalon eb nak: A tinani' tekan ok tit yowal nak José ti' jin, tekan ok paktzej nak masanil tzet max jutej, ẍi eb nak. 16Yuj tu' max yatok eb nak k'anej, max yalon eb nak: A yet c'amto chi cam co mam, max yaloncanok, tol chi jal ayach axca ti': 17Chin tewi ayach, tol chak' mimanc'ulal yiban eb nak oẍtak ti', yuj tzet yetal tol yob max yun eb nak en, caytu' max yut yaloncan cham. Yuj tu' xan ayon is chekbej on co Diosal yetok co mam tu', chi jal ayach tol chak' mimanc'ulal jin on bay jantak yobc'ulal max jak' ayach, ẍitok eb nak.
Axa yet chi yalon eb nak chekbej tu' is chekbanil, cax max ok'aj José. 18Axa yet max apni oc eb nak is yuẍtak tu' is satak, max ay nojnaj eb nak sat tx'otx', max yalon eb nak axca ti':
—Ayon ti' wuẍtak, a chekbej jayji on, ẍi eb nak.
19Cax max tak'wi cham José axca ti':
—C'amc'al tzet che na', c'am chi je' waon oc in ba q'uexelok Dios. 20A ayex ti', caw wal yob e nabal, cax max e yun juntzan yobc'ulal tu' win, palta a Dios max q'uexon jun e yobc'ulal tu' yin watx'il, yet chi colchaj xiwilok anima, axca ton wal lanan jilon ti'. 21Yuj tu' xan c'am chex oc il yuj jun tu'. Ok wilc'al tzet ok yun yec' e yuj yetokc'al e yuninal, ẍi cham José bay eb nak.
Yuj tu', max tzalojbi aj c'ul eb nak, yujtol yinc'al camc'ulal max yut k'anjab ba bay eb.
Is camichal José
22Maxtoc'al ayji ec' José yetok eb yican bay Egipto. 110 abil is k'inal cham José yet max cami. 23Maxtoc'al yil cham José tu' yitxiquin is c'ajol Efraín. Cay c'apax tu' eb is c'ajol nak Maquir, is c'ajol Manasés, maxto yil José yoccan eb is tz'akilok yuninal yul yatut.
24A yet jun c'ual, max yalon cham José bay eb is yuẍtak: Janic'xanej wal tiempoal cax chin cami. A Dios ok colwaj e yetok, cax ok ex yion el bay jun lugar ti', cax ok ex yiontok Cham co Diosal bay tx'otx' bay max yaltejcan bay jichmam Abraham, c'al bay co mam icham Isaac, c'al bay co mam Jacob, ẍi José. 25Cax max yalon bay eb is yican tol chi yak' eb nak is ti' bay satak Dios, max yaloni: Wal yel, a Dios ok occ'al e yetok. Ok jay colwaj e yetok. Yet wal ok e yunen axca tu', a yet chex toj tu' che yitok in mimanil ti', c'am che bekcan cayti', ẍi cham José.
26110 abil is k'inal José yet max cam bay Egipto. Watx' max yun yoc ambal yin is mimanil, cax max alay aytok mimanil cham yul is caẍail bay Egipto tu'.
Currently Selected:
Gn 50: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989