Gn 47
47
1Max lajwi tu', max toj José yalon bay cham rey, tol mayal jay is mam, c'al eb nak yuẍtak bay yul yet Gosén, petoj eb bay Canaán, ibil oc is calnel eb, c'al is wacax eb, c'al yetok masanil tzet ay bay eb. 2Cax max sic'on el owan eb nak yuẍtak, yet chi ilaytok eb nak satak cham rey yet chi ojtaknelay el eb nak yuj. 3Max k'anlen cham rey bay eb nak axca ti':
—¿Tzet mulnajilal chi je' e yuj? ẍi cham.
Max tak'wi eb nak:
—A ayon a chekbej on ti' mamin, jobom on calnel axca eb jichmam on. 4Max on jay bay jun lugar ti', yujtol a bay co conob caw wal ay wajil, cax c'amxa bay watx' chi low co calnel on, xan elok wal yin a c'ul tol chon cancan cajan bay Gosén, ẍi eb nak.
5Max lajwi tu' max yalon cham rey bay José:
—Yak'ban max jay a mam yetok eb nak oẍtak etok, 6bekan chi yuncan eb bay tx'otx' Egipto ti'. Ak' tx'otx' Gosén tu' bay eb. A wal tx'otx' tu', caw wal watx' yul yet Egipto ti'; cajayokab eb bay tu'. Ta ay eb nak oẍtak tu' caw jelan yin iloj no' tu xin, chi je' chaoc eb nak yilomalok no' in jobbejal no', ẍi cham rey tu'.
7Max yiontok c'apax José tu' is mam bay satak cham rey, yuj yojtaknelay el yuj cham; cax max yalon cham Jacob watx' k'anej yiban cham rey. 8Max k'anlen cham rey tu' bay:
—¿Jayebxa abil a k'inal? ẍi cham bay.
9Max tak'wi cham bay axca ti':
—Txenixto in c'ual c'al wabilal, asan 130 abil in k'inal ti', toc'al chin ec'jabtok, palta yinc'al yatakilal chi yun yec'tok janic' tiempoal ti' wuj. C'amtoc'al chi ajapnok in k'inal axca wal max yun is yabilal eb wichmam, ẍi cham.
10Max lajwi tu xin, max k'anon can is watx'c'ulal co mam Dios yiban cham rey tu', cax max eltek bay is despacho cham. 11Max lajwi tu', max yak'on José tx'otx' caw wal watx' bay is mam, yetokc'al bay eb yuẍtak bay yul yet Egipto tu', a ton tx'otx' ay is cawilal Ramsés, axca wal max yut yalon cham rey bay. 12Ayc'al oc José tu' yak'on is lobej eb atac'ala' jantak is bisil junjun eb.
Max yaoc José jun ley bay Egipto
13Caw wal ay wajil bay masanil yul yet Egipto, c'am trigo, tol c'al chi te aj can wajil bay tu' c'al yul yet Canaán, jun lajanxac'al chi yun cam anima yuj wajil. 14Masanil ch'en tumin eb aj Egipto, c'al ch'en tumin eb aj Canaán, ch'en chi bet yak'can eb yuj ixim trigo, masanil ch'en tu' chi c'ubaj aj José bay yul is despacho cham rey. 15Axa yet max lajwi aj ch'en tumin bay Egipto, c'al bay Canaán, max toj eb nak aj Egipto tu' yalon bay José:
—A tinani' mamin, na' tzet chi jun on; mayal lajwi co tumin on, ak' tzet chi co lo' on, yet watx' c'am chon cami, ẍi eb nak.
16Max tak'wi cham José bay eb nak axca ti':
—Ta c'amxa e tumin, iektek no' e jobbejal no'; chi je' wak'on e trigo is q'uexelok no', ẍi cham.
17Yuj tu xin, a yet jun abil tu', max yak'on eb nak is chej, is calnel, is wacax, c'al is burro yin q'uexbejal yetok ixim trigo. 18A yuj no' jobbejal no' max ec' jun abil tu', palta ac'ala' wajil. Max toj pax eb nak yalon bay José:
—C'amxa tzet chi je' jeban el on ayach mamin, c'amxa co tumin cax masanil no' co jobbejal no' on, et-xa no' masanil. C'amxa tzet chi je' jak'on ayach, asan mi chi jaoc co ba c'al co tx'otx' yul a k'ab. 19Colwajan jin, yet watx' c'am chon cami, cax c'am chi can co tx'otx' yin nabaxac'al. Watx' chon a manxac'al el yetok co tx'otx' ti', cax chon cancan is chekbejok cham rey, cax yet-xac'al cham tx'otx' tx'otx' bay chon mulnaj tu'. Asan tol chak' co trigo co lo', c'al inat chi jaw bay tx'otx' yet watx' c'am chi can tx'otx' yin tz'inanil, ẍi eb nak.
20Axca tu' max yut manoncan el cham José masanil tx'otx' tx'otx' bay masanil eb nak aj Egipto yet chi occan tx'otx' yetok cham rey. Yuj jun miman wajil xan max txoncantok ba eb yetok tx'otx'. 21Cax masanil eb nak aj Egipto max occan eb nak is chekbejok cham rey tu'. 22Asan tx'otx' yet eb sacerdote, maj manlay el tx'otx' yuj José tu', yujtol chi ak'lay is trigo eb chi lo' yuj cham rey; yuj tu' xan c'am is tx'otx' eb cham tu' max txontok.
23Max yalon José bay eb anima axca ti':
—A tinani' yet exxa cham rey yetokc'al e tx'otx', yujtol max ex in mancan elok. Iektok ixim inat, cax che yawon ixim. 24Atac'ala' jantak che yi' bay tx'otx', cax che yak'on jun yet is so' makan bay cham rey; axa yin canebxa makan ixim xin, a tu' chi eltek ixim inat ok e yaw paxok, ac'ala' a ton ixim ok e lo' c'apax yetok e yuninal, c'al yetok masanil mactxel ayic' e yetok, ẍi cham.
25Yuj tu xin max yalon eb nak axca ti':
—Caw wal watx' a c'ul mamin, man ok on a cha' camok. A tinani', ti' chon occan is chekbejok cham rey, ẍi eb nak.
26Axca tu' max yut yak'on cham José jun ley tu', tol a yet is so' makan sat awoj yet cham rey bay masanil yul yet Egipto. A jun ley tu' aytoc'al ec' tinani'. Asan eb cham sacerdote c'am chi yak' jun tojlabal tu' bay cham rey, yujtol a is tx'otx' eb tu', majta' oc tx'otx' yetok cham rey.
Yalnakcan cham Israel yuj bay ok mukayok
27Masanil eb yuninal cham Israel, max can eb bay Egipto, max makcan eb tx'otx' Gosén. A tu' max aj can is bisil eb bay tu'. 2817 abilto max ec' cham bay Egipto, yuj tu xin ay 147 abil is k'inal.
29A yet toxa chi cam cham Israel chi yabej, cax max yak'on awtelay José, max yalon axca ti':
—Ta ay wal a camc'ulal win, aoctok a k'ab yalan in xub ti', cax chak'on a ti' satak Dios tol chekej tzet ok wal ti'. Yuj wal dios ayach tol c'am chin a muk bay Egipto ti', 30tol a bay is c'atan eb wichmam, a tu' che yitok in mimanil ti' cax chin e mukon bay mukan eb tu', ẍi cham Jacob.
—Axca tu' ok wut xin mam, ẍi José.
31Cax max yalon wal cham Jacob tu' ta chi yak' José tu' is ti' satak Dios, cax chi yak'oni. Axa yay nojnaj cham Israel tu' bay jolom is tx'at, max yalon yuj diosalil bay Dios.
Currently Selected:
Gn 47: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989