Ex 3
3
Yawtebal Moisés yuj Dios
1Axa Moisés max ilonc'al no' is calnel cham Jetro*fn* is ni', sacerdote yayji bay tx'otx' Madián. Axa yet jun c'ual xin, yet max toj iloj calnel, max ec'c'altok bay takin tx'otx' masantac'al max apni oc bay yich witz Horeb,*fn* a jun witz tu' a ton bay max tx'ox ba Dios bay. 2A tu' max tx'ox ba cham yángel Jehová yin jun te q'uix chi chaw k'ak'al. Caxc'al ayoc is k'ak'al, palta c'am pax chi tz'a'ay te'. 3Cax max naon Moisés: Caw wal chi c'ayaj in c'ul yuj jun ti', tzet yuj xan tol c'am chi tz'a'ay jun te' tu'. Tekan watx' chi toj wila'. ẍi Moisés.
4A yet max yilon Jehová tol lananc'al jitzontek ba Moisés, cax max k'anjab eltek Cham xol xak k'ak'ej tu':
—Moisés, ẍi Cham.
—Tix in ti', ẍi Moisés.
5Max yalon Cham:
—Manchak a jitzxac'altek a ba cayti'. I el a xanab yujtol ayin ec' ayin ti' bay jun tx'otx' ti', tol lanan in tx'oxon in ba ayach cayti'. 6Ayin ti', is Diosal in a mam, is Diosal in c'apax Abraham, Isaac c'al Jacob, ẍi Cham.
A yet max yaben Moisés axca tu' max makchen el is sat yujtol max xiw yoc t'anan yin Cham. 7Cax max yalon Cham:
—Caw wal chi wil wali tol ok'bal c'ul chi yun eb in conob bay Egipto. Caw wal chi wab yok' eb yuj tzet chi utlay eb yuj eb ayoc yilomalok eb. Wojtak wali, tol caw wal ok'bal c'ul chi yun in conob bay tu'. 8Yuj tu xin, max quin ayolok, cax chi ul in colon el eb yul k'ab eb aj Egipto tu'. Ok wiel eb bay jun lugar tu', cax ok wiontok eb bay jun tx'otx' caw wal watx', lean, caw wal xiwil tzet ay sat tx'otx'. A eb cananeo cajan bay sat jun tx'otx' tu' c'al eb heteo, eb amorreo, eb ferezeo, eb heveo, yetokc'al eb jebuseo. 9Caw wal chi aj yaw eb in conob Israel tewi ayin, yujtol xiwil chi etax eb bay conob Egipto. 10Yuj tu xin chach toj tinani', ach chach watok bay satak reyal Egipto tu', yet chach toj k'anjabok, c'al yuj eon eltek in conob tu' bay Egipto tu', ẍi Jehová.
11Max yalon Moisés bay Cham:
—¿Mac in txel ayin ti' xan ok je' in toj k'anjab satak cham rey cax ok wion eltek eb wet conob Israel? ẍi Moisés.
12Cax max tak'wi Cham bay:
—Manchak ach oc il, ayin ok in oc etok. Ti' chi wak' junok seña ayach, tzetbil tol ayin chach in chektok: A yet mayal ecan eltek in conob bay Egipto tu' cax ok ex jayoc yin ayilal ayin bay jun witz ti', ẍi Cham.
13Max tak'wi Moisés:
—A wal tzet ok yun yeloc jun ti': Ta ayin chin toj k'anjab bay eb wet israelal cax ok walon bay eb tol a co Diosal yetok eb jichmam, a' max in chekontek ayex, ta quin chi bay eb, cax ok mi yalon eb ayin: ¿Tzet bi jun mac chal tu'? ẍi mi eb ayin, ¿Tzet chi wut pax tak'wok in ba? ẍi Moisés bay Cham.
14Cax max tak'wi Cham bay:
—AYIN C'ALTA' EC'OK.*fn* Axca tu' chi yun alon bay eb et conob tu'; a ton jun mac AYC'ALTA' EC' tu', a' chach chekoni, ẍi Cham.
15Maxtoc'al yal Cham bay Moisés:
—Al c'apax bay eb et conob tu': A Jehová co Diosal, yetok eb jichmam: a ton Abraham, Isaac, c'al Jacob, a' max quin chekontek colwaj e yin, cachi bay eb. A jun ti' in bi ayc'al yin tojbalk'inal, a ton in bi ti' ok binaj yuj eb e yinatil yin tojbalk'inal. 16Asi' xin, chi toj a wajban oc eb yicham winakil conob Israel, cax chaloni: A Cham Jehová co Diosal yetok eb jichmam, a ton Abraham, Isaac, c'al Jacob, a' max tx'ox ba ayin, tol max yila' cax chi beyc'ulnen el yin tzet chex utlay bay Egipto ti'. 17Max yalon ayin tol ok ex colil bay ayex oc yin yatakil cayti', cax ok ex yiontok bay jun tx'otx' caw wal watx', caw wal ay yaxil sat, bay ay eb cananeo, heteo, amorreo, ferezeo, heveo c'al eb jebuseo, cachi bay eb. 18Ok cha yab eb yicham winakil conob tu' tzet ok ala', cax ok tok eb etok bay satak reyal Egipto tu', cax chaloni: A Jehová co Diosal ayon hebreo on ti', a' max tx'ox ba ayon. Yuj tu xin, chon a chatok bay takin tx'otx' yet chi jak' xajanbal bay co Diosal on tu'. Ay mi oxebok c'ual tec'banil bay chon toj on tu', cachi. 19Caxc'al chin chek al jun ti', palta wojtak tol man ok ex chalaytek yuj jun rey tu', asan yin ak'bil puralil ok yun e chalay el yuj. 20Yuj tu xin ok in tx'ox wal wipalil bay, ok wak' yailal yiban nación Egipto yuj tzet c'ayubtakxac'al ok wun bay tu', axa e beklay eltek yuj tu'. 21Yetok c'apaxok, ayin ok waoc yin is nabal eb egipcio tol ay e yelapnok yul sat eb, yet watx' yinc'al watx'c'ulalil ok yun ex bekon el eb, cax c'am chex toj yin c'am tzet ok e yitok. 22Junjunc'al eb ix ix israel chi k'an eb tzet yetal bay eb ix cajan is cawilal, ma bay tzanc'al mac ixal cajan bay tu' yet chi yak' eb plata, ma oro, ma pichilej yet che yaoc yetok e yuninal; caytu' ok yun e yion ec' tzet ay bay eb aj Egipto tu', ẍi Cham.
Currently Selected:
Ex 3: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989