2 S 22
22
Bit cham rey David yuj max uj yak'on owal
(Sal 18)
1Max bitnej cham rey David jun bit ti' yet c'ual max col-lay el yuj Jehová bay yul k'ab Saúl c'al yul k'ab juntzanxa yajc'ul. 2Max yalon axca ti' yin is bit bay Jehová:
Ach Jehová, axca tol in nach'en ach, axca tol in cuartel ach, in Colomal ach.
3Ach in Diosal, in mayk'ak'al ach, a en chin col in ba. In taynemal ach, in Colomal ach tol ay epalil. Oj xan c'am chin michchaj yuj eb ajc'ul. Ach in Colomal, ach max in a col bay mac max yochej max in c'ayon elok.
4Ok wal in ba ayach, tol a moj wal a bitnelayi, catawal tu' ok in colchaj yul k'ab eb ajc'ul.
5A is may yet camich max oymoj oc win. Max jay xiwc'ulal win satak eb c'aywajwom xiwil yip.
6A camich axca tol mayal c'aloc lasu win. A yolanil camich axca tol max watx'nej in yalil.
7Max wal in ba bay Jehová yet ayin tok xol in somc'ulal. Max in k'an colwal bay in Diosal. A bay is templo Cham max quin yabej. Max apni waw bay is txiquin Cham.
8Catatu' max ec' jun miman quixcab puch ow. Yelc'ulal max bil xeal-lak satcan. Max cam tziclayi yuj yowal Cham.
9Max eltek mub yul is txam, axa yul is ti' max eltek k'ak'ej tol c'aywajwom. Max eltek jul-lajbok tzak'ak' yul is ti'.
10Max eltek jucnaj Cham bay satcan cax max ayolok. Mimek k'ek asun ayoc yalan yakan.
11Ayaj yiban jun querubín, cax max toj jupupok, max toj batxatxok yiban cak'ek'.
12Axca tol c'uan el bay tu', bay xiwil k'ekk'olinakil. Max c'ubaj el ba xol k'ek asun tol nojnak el yuj aej.
13Yuj jopopial sat Cham max chawaj k'ak'al tzak'ak'.
14A Jehová, Cham Axac'al Ocok, max el yaw axca wal bil c'u bay satcanlak.
15Max yatok is julbal, axa eb ajc'ul max uchchajtok. Max yatok is rayo, max uktelay el eb yuj.
16A yich a' mar max txecloji. Axa xeal yulyibank'inal ti' max jakayi, cax max txecloji yuj can yul is nuk' Jehová, tol ay is may. Yuj c'apax jun cak'ek' puch ow max yatok.
17Max batxbajtek Dios is k'ab ayin tac'al bay satcan tu', axca tol max in yitek Cham bay a' najab miman yich.
18Max in is colcan el Cham bay eb ajc'ul xiwil yip, tol c'am chin is yochej eb, cax yelxac'al tec'an waay eb wintak.
19Max oc bulnaj eb win yet ayin oc yin ok'balc'ulal, palta axa Cham Jehová max oc wetok.
20Max in yican eltek Cham, cax max in yaoncan bay colan. Max in is col Cham, yujtol chin is camc'ulnej.
21A Jehová max yak' in paktzil, atac'ala' in tojolal. Max yak' watx'c'ulal ayin yujtol c'am in mul.
22Yujtol max wikej is beybal Cham, yel wal maj wak' yobc'ulal wion el in ba bay in Diosal.
23A in satak ayic' masanil is cuybej Cham, cax c'amc'al chin el bay is k'anej.
24Watx'c'al in beybal satak Cham. Max in taynej in ba yet c'am chin ayc'ay yin yobtakil.
25Tix wal yuj tu xin, max yak' Jehová paktzil ayin atac'ala' in tojolal, yujtol c'am in mul yul sat Cham.
26Mamin, a mac ikem ayach, chi yunc'al a k'anej bay. Axa mac watx' yochwan, watx' c'apax ochwan bay.
27Watx' a beybal bay mac watx' is beybal, palta cha tx'ox a jelanil yin a tenon ec' nabal eb etnem anima,
28yujtol ach cha col eb ayilwom, cax cheon ay eb lues.
29Mamin Jehová, ach ton ok ak' sakk'inal ayin. Ach in Diosal, ach ok ecan el k'ekk'inal win.
30Yuj a colwal chi wuchcantok eb soldado, cax chin ec'can el yiban murallail conob.
31Yelxac'al tol watx' beybal Jehová Dios. A yalben Cham moj wal tol c'am cabc'ulal yin. Chi colcan el Cham masanil mactxel yipc'ulej yayji Cham yuj.
32Tokwal ay junokxa Dios yintak Jehová. Tokwal ay junokxa colwajwom yintak co Diosal.
33A Dios chi ak'onc'al wip. A Cham chi watx'nen in be.
34Axca bey tx'ucchej, chi yun in bey yuj Cham. Tec'an in waay yuj bay yelxac'al satlak witz.
35A Cham chin k'aytzen yin owal cax chi yak'on wip yin in pakon julbalej tol bronce.
36Ach Mamin chin a c'ubaj, cax chin a coloni. A wal watx'il a c'ul max quin ion aj can.
37Max quin aoc yul jun be lean, yet watx' c'am chin aj jabnajok.
38Max wuktej ec' eb ajc'ul oc win, max ton michchaj eb wuj, cax maj in oc wanajok masantac'al max cam eb wuj.
39Coc'xac'al max wutcantok eb yet watx' manchakxa aj wan eb. A xol wakan max ayc'ay eb.
40Ach ton max ak' wip yet max in ak'wi owal. A eb max caktzaj oc win, max acan oc eb yul in k'ab.
41Ach max a chekcan el eb ajc'ul oc win in satak, a xan max je' wuj in c'ayon el eb c'am chin ocheni.
42Max k'an eb colwal; c'am mactxel max colon el eb. Max yal ba eb bay Jehová, palta maj tak'wok Cham bay eb.
43Max coc'axtok eb wuj, axca wal pokok chi ilaytok yuj cak'ek'. Max in tec'can ay eb, axca wal tec'lay ay tz'otz'ew yulak be.
44Max quin a colcan el bay yowal eb conob, max in acan oc yajawilok mimek conoblak. A eb anima man wojtakok, chin ak'on serbil.
45A yet chi yaben eb wabixal, ikem eb ayin. A eb tx'ok conobal, chi yaoc ba eb yul in k'ab.
46Chi xiwcan aj eb cax chi bilaj eb. Chi eltek eb yul is cuartel.
47Iquis ec' Jehová. ¡Al-layokab watx' k'anej bay in Colomal! ¡Ilayokab can Dios Cham in Colomal yayji!
48Chi paktzej Cham bay eb chin etneni, cax chi yiontek eb conoblak yalan wikbej.
49A Cham chin colon el bay yowal c'ul eb ajc'ul oc win, eb max caktzaj oc win. Mamin, ach ton chin a col bay nak yaxc'ayinak c'ul win.
50Yuj wal tu xin, chi wal watx' k'anej en xol mimek conob, xan chach in bitnej.
51Oj wali xan chi ayc'ay mimek owal wuj ayin rey in, sic'bil in oj ti'. Yinc'al camc'ulalil chach beytok wetok ayin David in ti' c'al yetok winatil yin tojbalk'inal, ẍi David.
Currently Selected:
2 S 22: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989