1 S 7
7
1Max apni oc eb aj Quiriat-jearim bet yiontek eb te caẍail trato Jehová, max yaon octok eb yul yatut cham Abinadab, a tu' ay bay jun tzalan. Max sic'lay el cham Eleazar c'ajol Abinadab tu' yuj eb, yet chi taynej.
Max oc Samuel yajawilalok conob Israel
2Max cancan te caẍail trato Jehová bay Quiriat-jearim yin mimantak tiempoal, axca mi junc'alok abil, masanil conob Israel chi yal ba eb bay Jehová. 3Yuj tu' xan max yal Samuel bay masanil eb yet israelal: Ta wal yetok masanil e c'ul, cax che yaon oc e ba yul k'ab Jehová, yowalil che yieltek e comon dios ayoctok yul e yatut, c'al yechel Astarté, cax chex oc e yiken bay Jehová, asanxanej bay Cham ok ex oc ayilal. Ta axca tu' ok e yutej, ok ex col-lay yuj Cham bay eb filisteo, ẍi cham Samuel.
4Max yiken conob Israel yion el is dios, a ton yechel Baal, c'al yechel Astarté, axac'al bay Jehová max oc eb yin ayilal. 5Max chekon Samuel wajban oc ba masanil conob Israel bay Mizpa, yuj k'anon colchaj eb bay Jehová.
6Max wajban oc ba eb israel bay Mizpa; a yet jun c'ual tu' max yion ajtek eb a' aej cax max secon ay eb sat tx'otx' satak Jehová, c'al yoc eb yin c'ajbanc'ulal, yin tx'oxon masanil conob, tol chi naba c'ul yin is mul. (A bay Mizpa tu' chi beyc'ulnej Samuel yet conob.) 7A yet max yaben aj eb filisteo tol wajan ec' eb israel bay Mizpa, cax max wajban c'apax oc ba eb, axa tit eb yin eb israel tu'. Axa yet max yaben eb israel axca tu', max xiwaj eb. 8Max yalon eb bay cham Samuel: C'am cha bek a k'anon bay Jehová tol chon is col bay eb filisteo ti', ẍi eb conob tu'.
9Yin wal aymanil max yitek cham Samuel jun no yune' calnel chito txutxwi, max yak'on tz'a no' masanil yin xajanbalil bay Jehová, cax max oc ijan k'anon bay Cham ta chi colwaj yin eb. Ayman max tak'wi Jehová bay cham. 10A yet lanan yak'on xajanbal tu', yelc'ulalxac'al chi jayoc eb filisteo yak'on owal yin eb israel, axa Jehová max ak'on mak'waj c'u yin ipejal bay satak eb filisteo, caytu' max yun xiwaj eb, xan max elaj eb satak eb israel. 11Ayman max eltok eb israel yin eb filisteo bay Mizpa, max toj eb yin eb, max ayc'ay eb filisteo cax max uktelay eb, c'al mak'lay cam eb yuj eb israel, masantac'al max apni eb bay Bet-car. 12Max lajwi tu', max sayon cham Samuel jun ch'en ch'en, max yacan ay bay nan xol Mizpa yetok Sen, max yak'on yik Eben-ezer,*fn* max yaloni: Ti wal ayc'al oc Jehová colwaj jetok tinani', ẍi cham.
13A yet jun c'ual tu' max ayc'ay eb filisteo yuj eb israel; yuj tu xin, c'amxa junelokxa max octok eb yul is tx'otx'al eb israel yak'on owal. Yak'ban iquisto cham Samuel ayc'al oc Jehová makon sat eb filisteo tu'. 14A jantak conob Israel, c'al is tx'otx' max yican ec' eb filisteo, chi chatok bay Ecrón, masantac'al chi apni oc bay Gat, max yionpax eb israel junelxa. Axa pax eb amorreo xin, c'am owal nan xol eb yetok israel.
15A yet iquis cham Samuel, juez yayji cham yiban conob Israel. 16Junjun abil chi betic' cham bay Betel, bay Gilgal, c'al bay Mizpa, yuj watx'nen el is k'anej eb anima bay juntzan lugar tu'. 17Lajwi tu', cax chi meltzoj bay Ramá, bayc'alta' cajan; a bay tu' ayic' cham yin yak'on juezal yiban conob Israel. Max watx'nejcan aj jun altar yet Jehová bay tu'.
Currently Selected:
1 S 7: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989