Sofonías 2
2
1Akeye aj Judá, akeye minti' in tzaj cych'ixwiye, cychmon oc cyibe 2na'nxtok ttzaj cyi'je aju o bant ti'j, na'nxtok tbaj k'ij ic tza'n mu'p in xi ikan tu'n cyk'ik', na'nxtok ttzaj ttx'u'jil Kman cyi'je, ex na'nxtok tul tk'ijlalil tu'n ttzaj tk'oj Kman cyi'je. 3Cyjyome Kman cycyakile akeye xjal mans ate'ye twitz tx'otx', akeye in che niman ke tmandamyent. Che bete tuj tumel ex che oque mans, mya yajcu che clete tuj ju k'ij oc ttzaj tk'oj Kman.
Aju castiw ctzajel cyibaj ke nasyon
4Minti' xjal cyjel ten tuj tnam Gaza ex cbajel xitj tnam Ascalón; k'ijl che elex lajo'n ke xjal najl tuj tnam Asdod ex te jumajx che elex lajo'n ke najl tuj tnam Ecrón.
Aju castiw ctzajel cyibaj ke nasyon
5Ay bec'bil cywitze akeye xjal aj Creta najlkeye ttzi'yile mar. Akeye aj Canaán najlkeye tuj cytx'otx' aj Filistey; ma tma Kman tu'n tcub cysentense, cbel xitun cytanmiye tu'n ex minti' jun xjal cyjel ten tuj. 6Aju tx'otx' tcub ttzi mar c'oquel te cywabl alumaj, atzun che pol ke pastor, ex c'oquel te cype'n ẍne'l. 7Ke aj Judá che cyjel ank'in, che etzal ti'j tx'otx' lu oc ttzaj Kman Dios onil cyi'j, ex che tel ba'n ic tza'n nej. Atzun ma chixin che cwentil cyi'j ke cyẍne'l, ex che ojlal konic'an cyuj ke ja otok che cyaj colin tuj tnam Ascalón.
8-9Atzun jlu in tma'n Kman aju Tajaw Tcyakil, aju Cydios aj Israel: Ma nbiye aju yasbil cyu'n aj Moab ex aju xmaybil cyu'n aj Amón. Ma che yolin mya ba'n cyi'j ke xjal etzan wu'ne, ma jaw cyniman cyib ex ma che ocx lak'e' tuj cytx'otx' aj Judá. Cyja'tzun in xi nma'ne jun yol wu'nx wibe; icx cbajel cyi'j aj Moab ic tza'n o baj ti'j tnam Sodoma, ex ic cbajel cyi'j aj Amón ic tza'n baj ti'j tnam Gomorra; c'oquel cytx'otx' ic tza'n jun cojbil o'cx ch'i'x at tuj, c'oquel te tkan atz'an, c'oquel te jun lugar jumajx minti' xjal tuj. Ke xjal che cyjel ank'in cyxol keju etzan wu'ne c'eletz cyi'n tcyakilju at cye ex che oquel tajwil cytx'otx'.
10Atzun castiw cbel cyibaj aj Moab ex aj Amón, tu'nju jaw cyniman cyib ex e xmayin cyi'j ke xjal etzan tu'n Kman aju Tajaw Tcyakil. 11Ctzajel nimxix xobajil cyi'j tu'n Kman. Cbel t-xitun cycyakil cydios xjal at twitz tx'otx'; ke xjal tuj tcyakil lugar che c'ulul twitz, ax icx ke xjal ate' cyuj cycyakil nasyon. 12Ax icx cyeye, akeye aj Etiopía, che najele tu'n t-spad Kman. 13Cnajel tx'otx' Asiria tu'n, aju at tuj tbank'ab k'ij, minti' xjal cyjel tk'o'n tuj tnam Nínive ex c'oquel tu'n ic tza'n tzkij tx'otx'. 14Tujtzun che oquex ten ẍne'l ex tcyakil txcaj txcup te tjak' c'ul. Ke ẍin ex ke tol che tal cyibaj ke tkan ja, ck'ajtel cywi' cytzi' ke ventan, ex nojni c'oquel cytzi ja tu'n ttx'akan ti'xti, porque che cyjel k'ancha'lin ke tbanil tze' cyjax twi ja.
15Atzun tnam lu jaw tnimanxix tib ex in ank'intok minti' tbis, ex ke xjal najltok tuj in cyma'ntok cyja': O'cxcu ako'ye ex mi a'l juntl, che chi. Pero ma cyaj ten minti' xjal tuj ex ma tz'oc te cyja txcup te tjak' c'ul. Ke xjal che ic'el bet nikayin ti'j tnam che oquel ten xmayil ti'j ex c'elel cychito'n cyk'ab.
Currently Selected:
Sofonías 2: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993