Cantares 7
7
Aju tyol xinak
1Tbanilxix che que'yin ke tkana cyuj ke t-xajbiya, ic ttena ic tza'n tme'jel rey. Ke twi t-xixa ic cyten ic tza'n ke adorno k'an pwak tz'umin cywitz binchamaj cyu'n xjal at-xix cynabl ti'j.
2Aju tmuxa mer ic tza'n jun copa se'w tten minti' in cub naj tbanil ta'l twitz uva tuj; aju tc'u'ja mer ic tza'n jun byuj triw ex txolsa'n ke bech ti'jele.
3Ke tima mer ic tza'n cabe tal ttxu masat yo'ẍ.
4Aju tkula mer ic tza'n jun ja ma' twa'l sakxix que'yin; ke tbak' twitza mer ic tza'n cabe pil a' ate' tuj tnam Hesbón, akeju cycub ttxlaj pwert Bat-rabim; aju ttxa'na ic tten ic tza'n ju ja ma' twa'l at twi witz Líbano, aju cyja' in xi tque'yin tumlal tnam Damasco.
5Aju twi'ya ic tten ic tza'n ju witz Carmelo; aju ttzmal twi'ya mer ic tza'n nok' ẍjulin que'yin ex in koptz'aj; tzyu'n rey tu'n ttzmal twi'ya xpaltx'i'n tten.
6Aya xu'j at nimxix nc'ujlalile ti'ja, achbajilxixa ex tbanilxix que'yina.
7Aju twa'la mer ic tza'n twa'l jun palma; ex ke tima mer ic tza'n t-rasimil twitz palma.
8In chin ximane ti'j tu'n njaxe twi tkan palma lu ex tu'n woque te tajwil ke twitz. Ke tima ic cyten ic tza'n ke t-rasimil twitz uva; aju t-xewa mer ic tza'n tc'oc'jal mansan;
9aju tuj ttzi'ya puro chi' ic tza'n ta'l twitz uva tbanilxix, cheba in k'ilin tuj ttzi'ya ex cyxol ke twitz te'ya.
Aju tyol xu'j
10Akine te teju xinak c'ujla'nxix wu'ne; tu'nju at nimxix tgan wi'je nnu'l wuc'ile.
11Chuxa xinak c'ujla'nxix wu'ne, ko' tuj cojbil. C'elex konic'an ku'n cyxol tkan bech nimxix cyc'oc'jal.
12Te prim ko xe'l cyxol tkan uva que'yilte ka at cyxul, ka o pok'chaj cyxmacal, ex ka o che xmacalin ke carnad ẍok'. Atzun cxel nma'ne teya ka c'ujla'nxixa wu'ne.
13Ke twitz mandrágora c'oc'j tic' cyc'oc'jal. Twitz tlamel kja at tcyakil txcaj twitz awal ba'n tlo'njtz; ke twitz awal tzkijsa'n ex twitz awal c'itzke che cub k'i'n, tcyakil jlu ma tz'el npa'ne te teya, aya xinak c'ujla'nxixa wu'ne.
Currently Selected:
Cantares 7: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993