Joel 2
2
Tej cyul tzokpaj ke ẍplon
1Cyk'ajtzan oque chun twi witz Sión; cyk'ajtzan oque te jun tkanil te xobajil twi' ju witz xjan te Kman. Ba'n tu'n cytzaj lu'lun cycyakil aj Judá, porque ma tzul canun ju k'ij te castiw tu'n Kman: 2Jun tk'ijlalil klolj wen, jun tk'ijlalil te k'ek muj ex te xlecun. Ic cyten ke ẍplon ic tza'n txkan soldad nimxix cyipun ex nim cyajlal, ma baj noj cywi' ke witz cyu'n, mer ic tza'n tkan k'ij oc in jawil koptz'aj. Bajx tzaj jun maj icju ex mlay tzaj juntl maj ic tza'n jlu. 3Ic cyten ke ẍplon ic tza'n k'ak' tcyakil in baj naj tu'n; in baj tz'e'y tu'n na'nxtok tpon canun ex cucx tbaj tz'e'y tu'n te tibajxi. Tej cypon canun ke ẍplon, ic tten twitz tx'otx' ic tza'n tkan awal tbanilxix tuj Edén, octzun cypon canun, ic nno'c cyu'n ic tza'n tzkij tx'otx' minti' awal tuj. Misicyer jun in cyaj clet cyu'n. 4Aju cyilbilal ẍplon mer ic tza'n cyilbilal chej ex in che ojkelan wen ic tza'n ke xjal cyjax cyibaj chej. 5Aju tk'ajk'ajel oc cylipan cywi witz mer ic tza'n cyk'ajk'ajel ke carwaj oc cybet tuj k'oj, mer ic tza'n oc in spokokon t-xak tze' oc ttz'e'y tu'n k'ak' ex mer ic tza'n txkan soldad at nim cyipun txolsa'n cyten tu'n cyk'ojin. 6Bi'x in che tzaj lu'lun ke xjal oc cyque'yinte, ex tcyakil cywitz puro spelin nno'c. 7In che ojkelan ic tza'n ke xjal, cyuw cyc'u'j tuj k'oj ex in che jax cywi' ke muro toc ti'jele tnam ic tza'n ke soldad; teyle te junjun in xi ti'n tbe, misicyer jun in xi ti'n juntl be. 8Misicyer jun in jaw tz'ak ti'j juntl tuc'il; teyle junjun k'i'nx tbe; masque in k'ajt cycub plech cyxol, minti' in che baj sputj. 9In che oc tzokpaj ti'j tnam, in che ocx ojkelan twi muro tocsa'n ti'j tnam, in che jax tu'n cyocx cyuj cyja xjal, ex mer ic tza'n elek' ke in che ocx ttzi ventan.
10In tzaj lu'lun tx'otx' cywitz ex bi'x in tzaj yucch cya'j, bi'x nno'c yupj twitz k'ij tuc'ix twitz xjaw, ex minti'tl in che koptz'aj che'w. 11A Kman nejenel cywitz t-soldad ex in binjtz tk'ajk'ajel twi'. Mas cyajlal ke t-soldad ex nim cyipun keju in japun ju tyol cyu'n. Ma'xix toclen ex xobajilxix aju tk'ijlalil tzul tu'n Kman. ¿Alcye jun jacu tzic'x tu'n?
Aju tk'ak'bil tc'u'j Kman
12Atzun ja'lo, cyajtz meltz'aje wuc'ile tu'n tcyakil cyanmiye; cyyo'n cube we'yaj, che ok'e ex che ayayane, chi Kman. 13Cyajtz meltz'aje tuc'il Kman aju Cydiose, tzajx ta'w tuj cyanmiye ex mya tu'n tbaj cysbit'un cyxbalune. Porque ate Kman at xtalbil tuc'il ex at nim tk'ak'bil tc'u'j, nim tpasens ex nim tc'ujlalil ex jacu chewix tc'u'j tu'n mi'n tcub cycastiwoye. 14Mya yajcu cub t-ximan tu'n mi'n tcub tk'o'n cycastiwoye, ex tzul tk'o'n t-xtalbil cyeye cyja': Tzul twitz awal ex ta'l twitz uva tu'ntzun t-xi cyk'o'ne jun oyaj te Kman aju Cydiose.
15Cyk'ajtzan oque chun twi witz Sión, cymanxe cye xjal tu'n tcub cybuyin cyib ex cymanxe cye tu'n tcub cyyo'n we'yaj. 16Cychmon oque ke xjal etzan tu'n Dios, cychmon oque ke tij xjal ex ke c'wa'l, cyuc'ix keju cucx cych'u'n, ex cyuc'ix keju c'itzke cyoclen moje', e cyetz tuj cyja. 17E cyjaw ok' ke pal akeju in che ajben te Kman, e cyjaw ok' t-xol ttzi tja Dios tuc'ix altar, ex cymanx cyja': Najsama Kman aju cyil ke xjal etzan tu'na, mi'n tak'a ambil tu'n cyxmayin xjal cyi'j keju etzan tu'na; miwt cub cyi'j cyu'n mastl nasyon ex miwt cyma ke xjal mya ocslal ti'ja: ¿Jatum ta' Cydios ke xjal lu?
18Tzajtzun tlo'ch tc'u'j Kman tu'n tlaj mya ba'n cybincha xjal ti'j tx'otx' etzan tu'n, ex tzaj tz'e'y tc'u'j cyi'j ke xjal etzan tu'n 19ex tma cyja': Cxel nk'o'ne triw tuc'ix ta'l twitz uva ex tuc'ix cychi'ye aseyt tu'ntzun cynojxixe wen, ex mlay txi nk'o'ne juntl maj ambil tu'n cyxmayinjtze cyu'n ke mya ocslal. 20Che elel wi'ne ke ẍplon cyxole, akeju ma che tzaj tuj tbank'ab k'ij, ex che xel nlajo'ne tuj tzkij tx'otx'. Akeju nejenel cywitz che xel nlajo'ne tuj mar tuj tjawitz k'ij, ex keju lepchix cytzaj cyi'j che xel nlajo'ne tuj nintz mar tuj telex k'ij, aju cyximlal bi'x ck'aytel ex oc che xewtel. Oc nbincha'ye ju nbinchbene ma' t-xilen. 21Aya tx'otx', tzalajxa nim ex mi'n xoba porque che bantel ke binchben ma' cyxilen tu'n Kman. 22Mi'n che xobe akeye txcup te tjak' c'ul, aju cywable tuj c'ul tzul t-xul, ke tze' ctzajel cyk'o'n cywitz ex ke tkan higo tuc'ix tkan uva ctzajel cyk'o'n nim cywitz. 23Che tzalajxe akeye xjal najl tuj tnam Sión, che tzalajxe ti'j Kman aju Cydiose, porque a Kman ma tzaj k'onte jbal cyibaje tujxix tk'ijlalil, aju jbal in cu'tz nej ex aju in cu'tz te tibajxi, ic tza'nxix in cu'tz ojtxi. 24Cjawil cychmo'ne nim twitz triw, nim ta'l twitz uva cchmetel tuj tcubil, ax icx chibj aseyt.
25Nim cxel nk'o'ne cyeye te t-xel ju twitz cyawale o naj cyu'n junjun ẍplon cyuj ke abk'i o che ex, ic cyten ke jlu ic tza'n txkan soldad nim cyajlal tej cytzaj nsama'ne cyi'je. 26Che wa'le ocxi cynoje wen, ex chin jawil cynimsa'ne, akine Cydiose, porque akine in binchante ke binchben ma' cyxilen cyeye. Ex mlay cub juntl maj cych'ixwi ke xjal etzan wu'ne. 27C'elel cynic'e wi'je, akeye aj Israel, akine atine cyuc'ile, akine Dios aju Cymane ex minti' juntl. Mlay cub juntl maj cych'ixwiye, akeye etzan wu'ne.
Tzul tk'o'n Dios aju Xewbaj Xjan
28Te tibajxi tcyakil jlu ctzajel nk'o'ne Nxewe tuj cyanmi cycyakil xjal: Ke cycy'ajale ex ke cyme'jele che oquel te nsanjele tu'n t-xi cypacba'n nyole cye xjal, ke tij xjal cyxole c'elel cynic' ti'j tuj witzic' aju wajbile cye, ex ke cu'xun ate' cyxole at ctzajel yec'un cye mer ic tza'n tuj witzic'. 29Ax icx ctzajel nk'o'ne Nxewe tuj cyanmi ke majen xinak ex ke majen xu'j tuj tk'ijlalil tzul; 30Ctzajel nyec'une nbinchbene ma' t-xilen twitz cya'j, ax icx twitz tx'otx' ctzajel nyec'une chic' ex k'ak' tuc'ix sib in bukin. 31Cmeltz'ajel k'ij tu'n toc te klolj, ex aju xjaw c'oquel que'yin ic tza'n chic'; cbantel jlu na'nxtok tpon tk'ijlalil tu'n tul Kman, jun k'ij ma' toclen ex xobajilxix. 32Pero cycyakil keju in che cubsan twitz Kman che cletel, porque aju colbil atzun ta' twi witz Sión ex tuj tnam Jerusalén, ic tza'n o tzaj ttziyan Kman. Ke xjal sc'o'maj tu'n che ank'il.
Currently Selected:
Joel 2: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993