Aj Hebreyib 11
11
Ri cojonic
1Are wa' ri u banic ri ka cojonic: cäkacu'ba' ka c'u'x chi je quebel na ri jastak ri cäkaye'j, xukuje' keta'm pa kanima' chi kastzij e c'o ri jastak ri man queilitaj taj.
2Xek'alajisax ri e ka mam chi utz xquibano rumal rech chi xc'oji' qui cojonic.
3Rumal ri cojonic cäkach'obo chi xtiquiritaj ri uwächulew xukuje' ronojel ri c'olic rumal ri u tzij ri Dios, jeri' chi ri jastak ri man queilitaj taj, xbanbex que ri jastak ri quebilitajic.
Ri u cojonic ri Abel
4Rumal ri cojonic, ri Abel xuya' jun tabal tok'ob cho ri Dios ri utz na chuwäch ri re ri Cain. Rumal ri' ri Dios xuk'alajisaj chi suc' xuc'am c'ut ri u sipanic ri xebuya'o. Jeri' ri Abel, pune' cäminak chic, c'ä c'o cubij chke camic rumal ri u cojonic.
Ri u cojonic ri Enoc
5Rumal ri cojonic, ri Enoc xk'axex chicaj, man xcäm taj. Man xriktaj ta chic, are c'u ri Dios xk'axenic. Aretak c'ä majok cäk'axexic, xk'alajisaxic chi xkaj chuwäch ri Dios.
6We c'u man c'o cojonic, jun man cuya' taj cäkaj chuwäch ri Dios. Rajawaxic c'ut chi apachin ri cäkeb chuwäch ri Dios, chucojo' chi c'olic, xukuje' chi cuya' tojbal que ri winak ri cäquitzucuj ri are'.
Ri u cojonic ri Noe
7Rumal ri cojonic, ri Noe aretak ri Dios xubij apan jastak che ri c'ä majok quebilitajic, xniman che ri Dios, xuban c'u ri jucub che qui colic ri e aj uwo rachoch. Rumal ri cojonic, xuk'alajisaj chi c'o qui mac ri winak ri e c'o cho ri uwächulew, xrechbej c'u ri suq'uil ri cäpe rumal ri cojonic.
Ri u cojonic ri Abraham
8Rumal ri cojonic, ri Abraham aretak xsiq'uixic, xnimanic xbe pa ri c'olbal ri cuc'am na che rechbal. Xel bic, pune' man reta'm ta c'ut jawije' cäbe wi.
9Rumal ri cojonic, xc'oji' pa ri ulew ri u bim ri Dios chi cuya' na che, xc'oji' chila' pa tak lic'om ja, je jas pa jun ulew man rech taj. Je xukuje' xquiban ri Isaac xukuje' ri Jacob, ri xa' junam ruc' ri Abraham ri xbix ri chi'nic chque.
10Ri Abraham reyem c'u jun tinimit ri e c'o cowilaj tak u tac'alibal, ri u banom ri Dios ruc' ri u chomanic xukuje' yacom rumal ri are'.
Ri u cojonic ri Sara
11Xukuje' rumal ri cojonic, xya' che ri Sara chi cäc'oji' ri ral. Xalanic pune' nim winak chic xukuje' ri Abraham, rumal rech chi xucojo chi ri Dios cuya' na che jas ri u bim.
12Rumal ri', che ri jun, ri xa' jubik' cäraj man cäcämic, xeq'uiy wi ulok e q'ui winak, ri man cuya' taj cajilaxic, je jas ri ch'imil re ri caj, je jas ri sanyeb chuchi' ri plo.
Conojel wa' cäcaj jun c'olbal ri utz na
13Conojel we winak ri' xecämic man xequic'amowaj ta c'ut ri jastak ri u chi'm ri Dios; rumal c'u rech chi c'o qui cojonic, xequil apan chi naj, utz c'u qui c'ulaxic xequibano, xquich'ob c'u quib chi man e aj waral taj chi xak e oc'owenelab cho we uwächulew ri'.
14Are c'u ri je cäquibij wa', cäquic'utu chi cäquitzucuj jun qui tinimit chic.
15We ta c'o pa qui jolom ri c'olbal ri xebel wi ulok, xecuin ta ri' xetzelejic.
16Ri e are' c'ut sibalaj cäcaj jun c'olbal ri utz na, are wa' ri aj chicaj. Rumal ri' ri Dios man cäq'uix taj chi cäbinax qui Dios. U suc'umam chi c'u jun tinimit chque.
Ri Abraham xuya' ri Isaac
17 # 11.17-19 “Rumal ri cojonic, aretak ri Abraham xtijtobex rumal ri Dios, ri are' xujach ri Isaac che ri Dios”: Gen 22.1-14. Rumal ri cojonic, aretak ri Abraham xtijtobex rumal ri Dios, ri are' xujach ri Isaac che ri Dios. Ri Abraham ri u c'amom ri chi'nic, xusuc'umaj ri u chi'xic ri Isaac ri u c'ojol ri xa' jun c'olic, jacha' che tabal tok'ob.
18Pune' ri Dios xubij che ri Abraham:
“Che ri Isaac
queq'uiy wi na ri e awija'l.”
19Ri Abraham reta'm chi ri Dios c'o u cuinem che qui c'astajisaxic ri cäminakib; rumal ri' ri Abraham xuc'am chi jumul ri u c'ojol jacha' pa ri cämical, je xux jun c'ambal no'j.
Ri u cojonic ri Isaac
20Rumal ri cojonic, ri Isaac xebutewichi'j ri Jacob xukuje' ri Esau, xubij chque ri jastak ri quepe na.
Ri u cojonic ri Jacob
21Rumal ri cojonic, ri Jacob aretak xa' co'lman cäcämic, xebutewichi'j ri ralc'ual ri Jose chquijujunal. Xuya' ri u k'ab puwi' ri u jolom ri ch'imiy, xuk'ijilaj ri Dios.
Ri u cojonic ri Jose
22Rumal ri cojonic, ri Jose aretak xa' jubik' cäraj man cäcämic, xuchomaj apan ri quelic bic ri e ralc'ual ri Israel pa ri ulew re Ejipt, xukuje' xuya' takanic jas cäban na chque ri u bakil.
Ri qui cojonic ri u tat u nan ri Moises
23Rumal ri cojonic, aretak xalax ri Moises, cumal ri u tat u nan xcawaj oxib ic', rumal rech chi xquilo chi je'lalaj ac'al. Man xquixe'j ta quib chuwäch ri takanic ri yo'm rumal ri ajawinel.
Ri u cojonic ri Moises
24Rumal ri cojonic, ri Moises aretak nim chic, man xraj ta chic cäc'oji' che ral ri u mia'l ri ajawinel aj Ejipt.
25Xane' xucha' ri u rikic c'ax junam cuc' ri winak re ri u tinimit ri Dios, chuwäch ri u rikic quicotemal pa ri mac, ri xak rech quieb oxib k'ij.
26Xuchomaj chi are nimalaj k'inomal na chi cäyok' rumal rech ri Crist, chuwäch ri k'inomal re Ejipt. Are xril apan ri tojbal re.
27Rumal ri cojonic, xuya' can ri Ejipt, man xuxe'j ta rib chuwäch ri royowal ri ajawinel, xane' co tac'alic je ta ne chi cäril ri Dios ri man quilitaj taj.
28Rumal ri cojonic, ri Moises xuban ri nimak'ij re Oc'owem xukuje' xuchiquicha' ri quic', rech ri tako'n aj caj ri quebucämisaj ri e nabeal man copan ta cuc' ri aj israelib.
Ri qui cojonic ri aj israelib
29Rumal ri cojonic, ri aj israelib xek'ax pa ri Quiäk Plo, je ta ne pa chaki'jalaj ulew. Aretak c'u ri e aj Ejipt, xcaj xek'ax chupam, xebik'tajic.
30Rumal ri cojonic, xtzak ri tapia ri c'o chrij ri Jerico, aretak sutim chi rij wukub k'ij cumal ri aj israelib.
Ri u cojonic ri Rahab
31Rumal ri cojonic, ri Rahab, ri ixok quech nim ch'utin, man xcämisax ta junam cuc' ri man xeniman taj, rumal rech chi xebuc'ulaj ri achijab pa jamaril e solinel ri cäquil ri tinimit.
Ri qui cojonic ri Jedeon, ri Barac, ri Sanson, ri Jepte, ri David, ri Samuel
32¿Jas ta chi c'u ri quinbij? Man cätzijotaj ta ri Jedeon, ri Barac, ri Sanson, ri Jepte, ri David, ri Samuel, xukuje' tak ri e k'axal tak tzij.
Ri qui cojonic ri jujun chic
33Ri rumal ri cojonic jujun xequich'äc ajawibal, xquichacuj suq'uil, xequirik ri chi'm, xequitz'apij u pa qui chi' coj,
34xquichup nimak tak k'ak', xquito' quib chuwäch ri qui ch'ich' ri quecämisanic, xya' chuk'ab chque pa ri qui tukaril, xc'oji' qui chuk'ab pa ri ch'o'j, xequich'äc tak ri cajch'ojab ri qui c'ulel.
35Jujun ixokib xequic'am ri qui cäminakib rumal chi xec'astajic.
E c'o jujun chic xquirik c'ax, man xcaj ta c'ut chi quecol chuwäch ri c'ax, churikic jun c'astajibal ri sibalaj utz na.
36Jujun chic xetz'bex qui wäch, xech'ayic. Niq'uiaj chic xeximic, xeya' pa che',
37xecämisax che abaj, xek'at che jos; xecämisax che ch'ich'. Xak xebinicat pa tak ri c'olbal, qui cojom qui tz'umal chij xukuje' qui tz'umal q'uisic', sibalaj e mebayib, xquirik c'axc'olil, xeban c'ax chque.
38Ri winak re ri uwächulew man takal ta chque quec'oji' ri winak ri' cuc'. Xebinicat pa tak chaki'j uwo sak, pa tak ri juyub, pa tak ri pec, xukuje' pa tak jul chupam ri ulew.
39Conojel wa' rumal ri qui cojonic xek'alajisaxic chi utz qui banom. Man xquirik ta c'u ri u bim ri Dios chi cuya' na,
40rumal rech chi ri Dios xuchomaj ulok jun jasach ri utz na chke ri uj, jeri' chi ri e are' quetz'akatisax na junam kuc' uj.
Currently Selected:
Aj Hebreyib 11: QUICH1
Highlight
Share
Copy
Want to have your highlights saved across all your devices? Sign up or sign in
Biblia Quiché © Sociedades Bíblicas Unidas, 1995.