Zac 3
3
Ri rukaj achi'el achik'
1Chirij ri jun achi'el achik' ri' k'o chik jun ri xk'utumej chinuwech: Xintz'et ri nimalej sacerdote rubini'an Josué pa'el chuwech ri ru-ángel ri Jehová. Y ri Satanás k'o-apo pa rijkiq'a' richin nusujuj-apo. 2Jak'a ri ángel xubij chire ri Satanás: Ja ri Jehová xkach'olin. Ja ri Jehová ri kan rucha'on chik ri Jerusalem xkach'olin, re achin re' kan achi'el jun rutza'n si' ri xelesex-pe pa q'aq', xcha'.
3Y ri Josué rukusan jun tzieq tz'il-tz'il. 4K'ari' ri ángel xubij chike ri yeto'on richin, chi tikijala' ri rutziaq tz'il ri Josué, y tikiwiqa' rik'in jebelej taq tzieq. Y chire rija' xubij: Ri tz'il atziaq nuk'exewachuj ri amak. Wakami k'a xinwelesaj ri amak, y xkatinwiq rik'in jebelej taq tzieq ri nuk'exewachuj ri ruchojmilal, xcha'.
5Chirij ri' xinbij k'a chi tikiya' jun ch'ajch'oj kuchubel-rujolon. Y kan keri' xkiben. Y rokik xbanatej ronojel re', ri ángel richin ri Jehová pa'el k'a apo chiri'. 6K'ari' ri ángel ri' xubij chire ri Josué: 7Ri Jehová k'iytisanel richin ronojel kere' nubij: Wi rat yabiyin achi'el ninwajo' yin, y wi nataqej ri nupixa' richin ruchojmilal, man xkatinwelesaj ta chupan ri asamaj wawe' pa wachoch. Chuqa' xtachajij ri ruwa-jay richin ri wachoch, y xtinya' k'a q'ij chi xkak'oje' chikikojol ri ángel ri ek'o wawe'. 8Wakami k'a, tawak'axaj rat Josué ri at nimalej sacerdote y ri e awachibil. Roma rix kan ix achi'el jun retal richin ronojel ri xtipe, y yin xtink'en-pe ri nusamajel ri xtetamex ruwech chi ja rija' ri xjotayin-pe. 9Yin Jehová xtinya' jun abej chawech rat Josué. Y chuwech k'a re abej re' ek'o wuqu' wachaj. Y ja yin ri xkitz'iban chuwech ri abej ri'. Xeri', pa jun q'ij xtinwelesaj ronojel ri mak pa ruwi' re jun ruwach'ulew re'. 10Toq xtapon ri q'ij ri', rix kan xke'iwoyoj k'a ri iwachpochel, y xtimol-iwi' chuxe' ri juwi-uva y chuxe' ri ruche'el wíkix. Y kan xkixkikot k'a. Yin Jehová k'iytisanel richin ronojel ri yibin, xcha' ri ángel.
Currently Selected:
Zac 3: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.