1 Crón 28
28
Ri Salomón xuk'ul pixabanik chirij ri rachoch ri Dios
1Ri David xerumol k'a chiri' pa Jerusalem konojel ri k'o más kejqalen ri ek'o chiri' pan Israel: Ri e aj-raqen kichin ri tzobaj, ri aj-samaj richin ri rey, ri e aj-raqen pa kiwi' ri aj-labal, ri samajela' ri ek'o pa kiwi' ronojel ri e richin ri rey, ri ek'o pa kiwi' ri e ralk'ual y ri achi'a' ri maneq xibinri'il chikiwech.
2K'ari' ri David xpa'e-q'anej chikiwech ri winaqi' y xubij: Tiwak'axaj, wach'alal y nuwinaq yin. Yin janila xinrayibej richin ja yin ta xipaban-q'anej ri rachoch ri Dios ri akuchi ta xya'ox-wi ri káxa richin ri rujikibel-tzij y xk'oje' ta q'asen chiri' ri akuchi niq'alajin-wi ri ruq'atbal-tzij ri Dios. Roma ri' xinben yan k'iy samajibel richin xinpaba' ta q'anej. 3Ja k'a ri Dios xubij chuwe chi man ja ta yin ri yipaban-q'anej ri rachoch, roma yin in jun achin richin labal y kan janila kamik nubanalon. 4Jak'a man rik'in ri' ri Jehová ri qa-Dios xirucha' yin chikikojol ri ek'o pa rachoch ri nata' richin xirukusaj kan rey, y ri wijatzul richin jantape'. Rija' xucha' ri qatzobaj Judá richin ja tzobaj ri' ri xtiq'aton-tzij; y chukojol ri qatzobaj xucha' ri aj pa rachoch ri nata'; y chikikojol ri wach'alal xirucha' yin, richin chi xinok rey pa ruwi' chijun re ruwach'ulew Israel. 5Ri Dios e ruya'on e k'iy walk'ual, y chikikojol k'a rije' xucha' ri nuk'ajol Salomón richin nuq'et-tzij pa ruwi' chijun ruwach'ulew Israel. 6Y chuqa' ri Dios xubij chuwe: Ja ri ak'ajol Salomón jari' ri xtipaban-q'anej ri wachoch y ri ruwa-jay, roma ja rija' ri xincha' richin xtok nuk'ajol y yin xkinok rutata'. 7Y kan xtinjikiba' ri ruq'atbal-tzij richin q'asen wi rija' xtutej ruq'ij richin nuben ronojel ri pixa', xcha' ri Dios chuwe.
8Wakami k'a kan chiwech k'a rix y chuwech ri Jehová ri qa-Dios ri yojrak'axaj, ninbij chiwe chi kan titaqej k'a ri nubij ri rupixa' ri Jehová ri qa-Dios, richin keri' kan xtok kan iwichin re jun jebejoj nimalej ruwach'ulew re', y richin xtiya' chik kan chike ri iwalk'ual richin nikichinaj kan rije'. 9Y rat nuk'ajol Salomón, kan tawetamaj ruwech ri qa-Dios, y kan tasamajij rik'in ronojel ri awánima y rik'in kikoten ri nalex-pe pan awánima, roma ri Jehová Dios nutz'et ri qánima y ri qach'obonik. Keri', wi rat kan xtakanoj kan xtawil, rija' kan xtik'oje' awik'in. Jak'a wi rat xa xtamalij kan, rija' kan xkaretzelaj kan richin q'asen. 10Tawetamaj k'a chi ri Jehová ri xacha'on richin napaba-q'anej ri jay richin rija'. Roma ri' tatija' aq'ij y tabana' ri samaj, xcha' ri David chire.
11K'ari' ri David xuya' k'a kan chire ri Salomón ri ruk'ajol, ri wuj ri achoq chuwech rubanon-wi kan ri achike rubanik niban chire ri rachoch ri Dios: Ri jay ri akuchi niban-wi oken, ri jay richin niyak ri samajibel, ri ruka'n wiq jay, y ri jay ri akuchi nik'oje-wi ri káxa. 12Chuqa' xubij kan achike ri rubanik ri ruch'obon ri niban chire ri ruwa-jay, y ri ruch'obon rija' ri rubanik ri xkebek'oje' pa taq ruxikin y ri jay akuchi yeyak-wi ri beyomel richin ri rachoch ri Dios y ri akuchi yeyak-wi ri ch'aqa' chik sipanik. 13Chuqa' xuya' kan ri rubanik ri jay kichin ri sacerdote y ri levita toq yesamej chupan ri rachoch ri Dios, y keri' chuqa' xuya' kan ri rubanik ri akuchi yeyak-wi ri samajibel ri ye'ukusex toq niya'ox ruq'ij ri Dios.
14Chuqa' xuya' kan k'iy q'anapueq y saqipueq richin yeban ri samajibel, ri yek'atzin richin ri ye'ukusex pa samaj toq nikiya' ruq'ij ri Dios: 15Ri candelabro y ri taq lámpara, 16ri mesa ya'on q'anapueq chirij richin ri kaxlan-wey, ri taq mesa ya'on saqipueq chirij, 17ri tenedor, ri nima'q y kokoj taq leq, 18ri porobel-pom, y ri ruwachibel carruaje achoq chupan e ya'on-wi ri querubín, achi'el ri querubín ri ek'o pa ruwi' ri káxa richin ri rujikibel-tzij ri Dios.
19K'ari' ri David xubij chire ri Salomón: Ronojel re' tz'ibatel kan chupan ri wuj ri xuq'alajirisaj chinuwech ri Jehová. 20Kan tatija' k'a aq'ij y kof kak'oje', man tamalij ak'u'x y man taxibij-awi' richin naben re samaj re', roma ri Jehová ri qa-Dios kan xtik'oje' awik'in. Rija' man xkaruya' ta kan, y man xkarumalij ta kan. 21Jare' ri sacerdote y ri levita ri xkesamej chi sol chi sol chupan ri rachoch ri Dios. Y chire ronojel re samaj xtak'ul to'onik kichin ri nima'q taq achi'a' ri k'o ketamabal richin xabachike samaj; y ri e tata'al y chijun ri tinamit kan xtikinimaj ronojel ri xtabij chike, xcha' ri David.
Currently Selected:
1 Crón 28: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.