NUMERI 3
3
Oludalo laAron
1Noludalo laAron nolaMoses mefiku linya Omwene a popya naMoses komhunda yaSinai, oleli: 2Omadina ovana ovamati vaAron oyaa: Oshiveli Nadab, opo nee Abihu, Eliaser naItamar. 3Oo omadina ovana ovamati vaAron, ovapristeli va vaekwa, ava e va tula mokuyakula moshilonga shoupristeli. 4Ndelenee Nadab naAbihu va fila koshipala shOmwene, vo eshi va twala omundilo umwe koshipala shOmwene mombuwa yaSinai. Ndele vo va li vehe noludalo. Ndelenee Eliaser naItamar ova li va yakula moshilonga shoupristeli moipafi yaxe Aron.
Oshilonga shoupristeli wOvalevi
5NOmwene okwa popya naMoses ndee ta ti: 6“Epata laLevi li ehenifa li kale moipafi yomupristeli Aron, opo vo va shiive oku mu yakula. 7Vo nava diinine oilonga yaye noilonga yeongalo alishe komesho yetwali leongalo, va wanife oiyakulwalonga yetwali liyapuki. 8Ndele vo ve nokukala noshisho shoilongifo aishe yetwali leongalo noponhele yovana vaIsrael okuyakula metwali liyapuki. 9NOvalevi u noku va yandja kuAron nokovana vaye. Vo aveshe vomovana vaIsrael ova yandjwa kuye. 10Ndelenee Aron novana vaye ovamati u noku va yapulila oshilonga shoupristeli. Ndele omuyeni ou ta ehene po, e nokudipawa.”
11NOmwene okwa popya naMoses ndee ta ti: 12“Tala, Ame mwene onda kufa mo Ovalevi movana vaIsrael ponhele yoiveli aishe ei tai yeulula oshidalelo shaina movana vaIsrael, Ovalevi opo va kale vange mwene. 13Osheshi oiveli aishe oyange. Mefiku tuu linya Ame nda dipaa po oiveli aishe medu laEgipiti Ame nde liyapulila oiveli aishe yomuIsrael, yovanhu noyoimuna. Vo ve nokukala vange, Aame Omwene.”
Omapata Ovalevi
14NOmwene okwa popya naMoses mombuwa yaSinai ndee ta ti: 15Vala ovana ovamati vaLevi pamaumbo avo nopamapata avo. Ovalumenhu aveshe ava va wanifa ohani imwe ile va koya po, vo u noku va vala.
16Ndele Moses okwe va vala palombwelo lOmwene ngaashi Ye e mu lombwela. 17Ndele ovana ovamati vaLevi pamadina avo ovava: Gerson, Kohat, naMerari ovo va li ooxekulu yomaludi oo e va lukilwa.
18Nomadina ovana ovamati vaGerson oyaa: Libni naSimei.
19Novana ovamati vaKohat pamapata avo: Amram naIshar, Hebron naUsiel.
20Novana ovamati vaMerari pamapata avo: Mahli naMushi Oo omapata Ovalevi pamaumbo avo.
21MuGerson mwa dja epata lOvalibni nepata lOvasimei. Olo epata lOvagerson. 22Ava va valwa vomuvo ovalumenhu aveshe ava va wanifa ohani imwe ile va koya po, omuvalu wavo u fike pomayovi aheyali nomafele atano. 23Epata lOvagerson li nokwoonga Onhanda konima yetwali liyapuki langhele kouninginino. 24Eliasaf yaLael e nokuninga omukulunhu womaumbo Ovagerson. 25Ovana ovamati vaGerson ve nokukala noshisho shetwali liyapuki netwali oshikututuviko shoipa yeedi noshikututuviko shoipa yonguluve poshivelo shetwali leongalo, 26noiyatafaila ya kambakanifwa yehale lokomesho, noshiidilifoyata shoshivelo shehale lokomesho tashi dingilile etwali liyapuki noaltari neengodi adishe dasho, heeno, aishe ei tai longifwa moshilonga shalo.
27Ndele oludalo la dja muKohat: Epata lOvaamrami nepata lOvaishari nepata lOvahebroni, nepata lOvaussiel. Oo omapata Ovakohati. 28Aveshe ava va valwa ovalumenhu aveshe ava va wanifa ohani imwe naava va koya po, ova li ve fike pomayovi ahetatu nomafele ahamano, ava va li hava diinine oilonga yetwali liyapuki. 29Omapata ovana vaKohat nava onge onhanda kombinga yokoumbuwanhu wetwali liyapuki. 30Ndele Elisafan yaUsiel e nokuninga omukulunhu wongudu yomapata Ovakohati. 31Vo ove nokukala noshisho shoshikefa noshoshitaafula noshoshikwatelwalamba noshoaltari noshoilongifo yetwali liyapuki oyo hai longifwa kovapristeli noshoshitukulifoyata naaishe ei tai longifwa mulo. 32Ndelenee Eliaser, omona womupristeli Aron, e nokuninga omukulunhu wovakulunhu vOvalevi, omupashukili waava hava longo metwali liyapuki.
33Oludalo laMerari olo epata lOvamahli nepata lOvamushi. Oo omapata Ovamerari. 34Ndele ava va valwa muvo ovalumenhu aveshe va wanifa ohani imwe naava va koya po ova li ve fike pomayovi ahamano nomafele avali. 35Ndele Suriel yaAbigail e nokuninga omukulunhu wongudu yomapata Ovamerari. Vo ve nokwoonga onhanda kombinga yokoumbangalanhu wetwali liyapuki. 36Novana ovamati vaMerari va li ve nokukala noshisho shoipilangi yetwali liyapuki neenhikifo dalo neengudi dalo noikwatelwamhadi yalo, noilongifo aishe ngaashi yo oilonga aishe ya li i nokulongwa, 37neengudi dehale lokomesho keembinga adishe noikwatelwamhadi yado neembosha dado neengodi dado.
38Ndelenee komesho yetwali liyapuki, kombinga yokoushilo, kepito letango, oko Moses naAron hava ongo onhanda novana vavo ava hava longo metwali liyapuki nokutya, oilonga ponhele yovana vaIsrael. Ndelenee omuyeni ou ta ehene po, e nokudipawa.
39Ovalevi aveshe, ava va valwa kuMoses nokuAron palombwelo lOmwene, ava va valwa pamapata avo, ovalumenhu aveshe ava va wanifa ohani imwe nova koya po, ova li ve fike pomayovi omilongo mbali naavali.
Ekulilo loiveli yOvaisraeli
40Ndele Omwene okwa lombwela Moses ndee ta ti: “Vala oiveli aishe yovalumenhu vovana vaIsrael, ava va wanifa ohani imwe ile va koya po, ove u shangele mo omuvalu wayo. 41Kufile nge Aame Omwene Ovalevi ponhele yoiveli aishe yoimuna yovana vaIsrael.” 42Ndele Moses okwa vala oiveli aishe yovana vaIsrael, Omwene ngaashi e mu lombwela. 43Noiveli aishe yovalumenhu pakuvala omadina ayo, ei ya wanifa ohani imwe ile ya koya po, oya li pakuvalwa kwayo i fike pomayovi omilongo mbali naavali nomafele avali nomilongo heyali naitatu.
44NOmwene okwa popya naMoses ndee ta ti: 45“Kufa Ovalevi ponhele yoiveli aishe yovalumenhu yovana vaIsrael, noyoimuna yOvalevi ponhele yoiveli aishe yovalumenhu yovana vaIsrael, noyoimuna yOvalevi ponhele yoimuna yavo, Ovalevi opo va shiive okukala vange mwene. Aame omwene. 46Ndelenee ngaashi ekulilo laava omafele avali nomilongo heyali navatatu, ava va xupa po koiveli yovalumenhu vOvaisraeli momwaalu wOvalevi, 47u noku va kufila keshe umwe eesekeli nhano; di kufa pakuyeleka osekeli yetwali liyapuki nokuvala eegera omilongo mbali mosekeli imwe. 48Ndele ove u nokupa Aron novana oimaliwa ngaashi ekulilo laava va xupa mokati kavo.”
49Ndele Moses okwa tambula oimaliwa yoikulila yaava va xupa po komuvalu wovakulilwa vOvalevi, 50ye okwa kufa oimaliwa koiveli yovalumenhu vovana vaIsrael, i fike peesekeli eyovi limwe nomafele atatu nomilongo hamano nanhano pakuyeleka kwosekeli yetwali liyapuki.
51Ndele Moses okwa yandja kuAron novana vaye ovamati oimaliwa yoikulila palombwelo lOmwene, ngaashi Omwene a lombwela Moses.
Currently Selected:
NUMERI 3: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.