LEVITIKUS 27
27
Eemhango domaudaneko nodeeshali diyapuki nodoitimulongo
1Omwene okwa popya vali naMoses, 2a lombwele ovana vaIsrael a tye kuvo: “Umwe ngeenge e neudaneko e li wanifile Omwene, ove u nokuyeleka ondado yomunhu; 3opo nee omulumenhu ou a wanifa omido omilongo mbali fiyo omido omilongo hamano, ondado yaye i fike eesekeli doshisiliveli omilongo nhano pasekeli yetwali liyapuki. 4Ndelenee ye ngeenge omukainhu ondado yaye oi fike peesekeli omilongo nhatu. 5Ndele ye ngeenge e nomido nhano fiyo omilongo mbali, opo nee ondado yomulumenhu eesekeli omilongo mbali nondado yomukainhu eesekeli omulongo. 6Ndelenee ye ngeenge e nohani imwe fiyo omido nhano, ondado yaye ngeenge omulumenhu, eesekeli nhano doshisiliveli, ndele ngeenge omukainhu ondado yaye eesekeli doshisiliveli nhatu. 7Ndele ye ngeenge e nomido omilongo hamano ile di dule odo, ngeenge omulumenhu, ondado yaye eesekeli omulongo nanhano doshisiliveli, ndele ngeenge omukainhu eesekeli omulongo. 8Ndelenee ye ngeenge ohepele, ta nyengwa okufuta ondado, e nokutwalwa komupristeli, opo omupristeli a shiive okuyeleka ondado yaye. Omupristeli na yeleke ondado yaye paenghono dokufuta kwaye.
9“Ndele ngeenge oshimuna mwaayo hava yambele Omwene, aishe ei ye te i pe Omwene, i nokukala ya yapulwa. 10Ye ine shi pingakanifa ile e shi lundulule, eshi shiwa ile naashi shii ile eshi shii naashi shiwa. Ndelenee ye ngeenge ta lundulula oshimuna nashikwao, eshi naashinya nashi kale shiyapuki. 11Ndelenee oshinamwenyo eshi sha kelelwa okuyambelwa Omwene, ye ngeenge te shi eta, ye e noku shi tula koshipala shomupristeli, 12nomupristeli e noku shi yeleka ngeenge oshiwa ile oshii. Pakuyeleka kwomupristeli osho shi nokukala. 13Ndelenee ye ngeenge a hala oku shi kulila na wede ko kondado oshititano shondado ei ya yelekwa.
14“Umwe ngeenge a hala okuyapulila Omwene eumbo laye oshali iyapuki, opo nee omupristeli e noku li yeleka ngeenge oliwa ile olii. Omupristeli ngaashi ta yeleke, osho nashi kale. 15Ndelenee ou e li yapula, ngeenge a hala okukulila eumbo laye, e nokuweda ko oshititano shoimaliwa sha yelekwa. Opo nee tali ningi laye mwene.
16“Ndele umwe ngeenge ta yapulile Omwene ombinga imwe yepya laye, ondado yaye nai yelekwe pakukuna ombuto nokutya, eekilograma omilongo mbali domahangu eesekeli doshisiliveli omilongo nhano. 17Ye ngeenge ta yapula epya laye okudja komudo wekuwililo, nali kale ngaashi ondado yalo ya yelekwa. 18Ndelenee epya laye ngeenge te li yapula konima yomudo wekuwililo, omupristeli e noku mu valela oimaliwa pamido odo di li ko fiyo okomudo wekuwililo tau ke uya. Ndele yo i nokukufwa mo mokuyelekwa. 19Ndele ou a yapula epya, ngeenge a hala oku li kulila, na wede ko kondado yalo oshititano shoimaliwa. Ndele lo otali ningi laye mwene. 20Ndelenee ye ngeenge ita kulile epya, ile epya ngeenge e li landifa po komukwao, lo itali ka kulilwa vali. 21Ndelenee epya, eshi tali mangululwa momudo wekuwililo, li nokuyapulilwa Omwene ngaashi epya laye mwene. Lo otali ningi lomupristeli.
22“Ndele ye ngeenge ta yapulile Omwene epya ye e li landa, ndele lo kali fi epya lefyuululo laye, 23omupristeli ne mu valele ondado yalo pakuyeleka fiyo okomudo wekuwililo. Ndele ye e nokufuta ondado ya yelekwa ngaashi oshali iyapuki yOmwene. 24Momudo wekuwililo epya nali alulilwe ou e li landifa po naye, osheshi lo efyuululo laye. 25Ndele aishe ye te i yeleke pe nokuyelekwa pasekeli yetwali liyapuki. Mosekeli imwe omu neegera omilongo mbali.
26“Ndelenee oiveli yoimuna oyOmwene ngaashi oiveli oyaye mwene, nande umwe e i yapule, osho ngeenge ongobe ile odi, osheshi shOmwene. 27Ndelenee sho ngeenge oshomoinamwenyo inai yela, ye ne shi kulile payeleko loye nokuweda ko oshititano shondado, ndele sho ngeenge itashi kulilwa, shi nokulandifwa po pandado ye shi yeleka. 28Ndelenee eshi sha yapulwa, keshe eshi sha yapulilwa Omwene, ngeenge omunhu ile oshimuna ile epya lefyuululo laye, nande oshinini itashi dulika okulandifwa po ile okukulilwa. Aishe ei ya yapulwa oyo oiyapukielela yOmwene. 29Omunhu keshe ou a tokolelwa efyo, ou a fingwa mokati kovanhu, ita kulilwa. Ye e nokudipawa shili.
30“Nosho yo oitimulongo aishe yomepya, yomoilya noyomoiimati yomiti yo oyOmwene. Oyo oiyapuki yOmwene. 31Ndelenee umwe ngeenge a hala okukulila sha shomoitimulongo, ye e nokuweda ko oshititano shomusho. 32Oitimulongo aishe yeengobe noyeedi, heeno, aishe ei tai lifwa, oitimulongo i nokuyapulilwa Omwene. 33Vo vaha konakone yo ngeenge oiwa ile oii, ndele inave i lundulula. Ndelenee ngeenge tave i lundulula, yo pamwe naai ya lundululwa i nokuyapulwa. Itai kulilwa.” 34Oyo hano oipango Omwene e i pa Moses komhunda yaSinai e i lombwele ovana vaIsrael.
Currently Selected:
LEVITIKUS 27: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.