2 OMAFIMBO 5
5
Eyapulo lotembeli
1Ndele ohamba Salomo eshi ya mana oilonga aishe yotembeli, oya tuvikila momalimba otembeli oinima aishe oyo xe David a yapulila Omwene: oisiliveli noingoldo, noinima ikwao.
2Ndele Salomo okwa ifana muJerusalem ovawiliki vOvaisraeli novakulunhu aveshe vomapata aIsrael, va kufe oshikefa shehangano lOmwene moshilando shaDavid, Sion, ve shi twale motembeli. 3Novalumenhu aveshe Ovaisraeli va ongala koshivilo pohamba mohani onhiheyali. 4Ovawiliki aveshe vaIsrael eshi va ongala muJerusalem, Ovalevi va tumba Oshikefa Shehangano. 5Ndele va eta Oshikefa shOmwene motembeli; Ovapristeli nOvalevi va twala yo Etwali Leongalo noinima aishe iyapuki, ei ya li mo, motembeli. 6Ohamba Salomo noshiongalele ashishe shOvaisraeli osho sha ongala pOshikefa, va kala ofika komesho yasho; ova yamba eedi neengobe dihapu unene, da nyengana okutengenekwa. 7Ovapristeli va twala yo Oshikefa Shehangano lOmwene monhele yasho molupale lomeni longulu, mOuyapukielela, koshi yomavava ovakerubi. 8Ovakerubi ova tandavelifa omavava kombada yonhele yoshikefa, onghee hano ovakerubi va uvika oshikefa nomitengi dasho kombada. 9Nomitengi da li dile, eenhele dado di wetikile komesho yOuyapukielela, ndele hapamwe peli li. Ndele omo di li fiyo onena eli. 10Moshikefa inamu kala sha shimwe, oipelende yomamanya ivali aike, oyo ya tulwa mo kuMoses pomhunda yaHoreb, Omwene eshi a ninga ehangano novana vaIsrael, eshi va dja medu laEgipiti.
11Novapristeli eshi va dja mo motembeli, osheshi ovapristeli aveshe ava va li po ove liyapula, naavo yo vaha li molufo, 12fimbo ovaimbi Ovalevi aveshe kumwe, Asaf, Heman naJedutun, pamwe novana vavo ovalumenhu novamwaina ovalumenhu, va li va djala oikutu yoliina, ve nomanghuma nouxumbafeta neenyalilo, va kala ofika koushilo woaltari, ndele pamwe navo ovapristeli efele nomilongo mbali, va shika omanghuma oivela, 13novashiki vomanghuma oivela novaimbi aveshe kumwe va hovela nondaka imwe okuhambelela nokupandula Omwene, ndele opo vo eshi va yelula ondaka pamwe nomanghuma oivela nomanghuma eembinga noishikomwa, va imba: “Hambeleleni Omwene, osheshi Ye omuwa, osheshi ouwanghenda waye tau kala fiyo alushe!” Ongulu, nokutya ongulu yOmwene ya yadifwa oshilemo. 14Novapristeli va nyengwa okukala ofika nokuwanifa oshilonga shavo omolwoshilemo, osheshi oshinge shOmwene sha yadifa ongulu yaKalunga.
Currently Selected:
2 OMAFIMBO 5: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.