1 TIMOTEUS 4
4
Eliteeko nepukifo pomafiku axuuninwa
1Ndelenee Omhepo otai popi eendjovo di uditike nawa nokutya, momafiku axuuninwa vamwe otave liteeka po eitavelo, ndele tava ka shikula eemhepo dipukifi nomalongo eendemoni, 2otava pukifwa koihelele yovanaipupulu, ovo va xwikwa eliudo lavo noshixwikifo, 3ovo tava kelele okuhombola nokulya oikulya ya shitwa kuKalunga, i liwe nokupandula kovaitaveli nokwaava va shiiva oshili. 4Osheshi keshe tuu eshi sha shitwa kuKalunga, osho oshiwa, kashi shii okweekelwashi, ngeenge tashi tambulwa nepandulo. 5Osheshi otashi yapulwa keendjovo daKalunga neilikano.
Ediinino letilokalunga
6Hano, ngeenge to dimbulukifa ovamwatate oinima ei, ove to ningi omuyakuli muwa owaKristus Jesus, ndele to lipalula neendjovo deitavelo nodelongo la yuka eli we li shikula. 7Ndelenee eengano da nyata neendjovo dovakainhu di hanyena, ndele ove lideula metilokalunga. 8Osheshi edeulo lokolutu oli nekwafo lixupi, ndelenee etilokalunga otali kwafa moinima aishe, osheshi olo li neudaneko lomwenyo wopaife nowokomesho. 9Ondjovo ei oya yuka noya wana okutambulwa shili; 10osheshi omolwaasho hatu lihepeke nokukondja, shaashi fye otwa tula elineekelo letu muKalunga omunamwenyo, ou Omukulili wovanhu aveshe, ndele unene wovaitaveli.
11Hano, oinima ei va lombwela noku va longa. 12Inapa kala nande umwe ta dini ounyasha woye. Ndele kala omuhopaelelwa wovaitaveli meendjovo nomokweenda, mohole, momhepo, meitavelo nomoukoshoki. 13Fiyo ohandi uya, diinina oku va leshela omishangwa noku va kumaida noku va longa. 14Ino hepifa oshalinghenda i li mwoove, ei we i pewa mouxunganeki, ovakulunhu eshi ve ku tenheka omake avo. 15Aishe ei i diinina, ove u kale muyo, opo okweehena kwoye komesho ku monike kwaaveshe. 16Lipashukila ove mwene nenongeko loye; dama mulo! Osheshi ngeenge to shi ningi, oto lixupifa ove mwene naava tave ku pwilikine.
Currently Selected:
1 TIMOTEUS 4: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.