1 OMAFIMBO 5
5
Oludalo laRuben
1Novana ovamati vaRuben, oshiveli shaIsrael (osheshi ye okwa li oshiveli, ndelenee ye eshi a nyateka omutala waxe, oushiveli waye wa pewa ovana ovamati vaJosef yaIsrael, ndelenee ye ita shangelwa membo leshikulafano lomapata ngaashi oshiveli, 2ndele osheshi Juda okwa li e neenghono mokati kovamwaina, e va dule, ndele umwe womoludalo laye a ninga ohamba, oushiveli wa kala muJosef) 3ovava: Henok naPallu, Hesron naKarmi. 4Ovana ovamati vaJoel: Omona waye Shemaia, omona waye Gog, omona waye Simei. 5Omona waye Mika, omona waye Reaja, omona waye Baal, 6omona waye Beera, ou a twalwa kuTiglat-Pileser, ohamba yaAsiria, moukwatwa. Ye okwa li omukulunhu wOvarubeni. 7Ndele ovamwaina ovalumenhu pepata keshe ngaashi mwa shangelwa membo leshikulafano lomapata pamaludalo avo ovava: Jeiel, omukulunhu, navali Sakaria 8naBela yaAsas yaShema yaJoel. Ye okwa li muAroer fiyo okuNebo nomuBaal-Meon. 9Ndele moushilo okwa twa fiyo mombuwa ei tai hovele momulonga waEufrat. Osheshi oimuna yavo ya hapupala moshilongo shaGilead. 10Ndele pomafiku aSaul va ninga oita nOvahagri, ndele eshi va homona oshilongo shavo, ova nangala omatwali avo kombinga aishe yokoushilo waGilead.
Oludalo laGad
11Novana ovamati vaGad va li moshilongo shaBasan fiyo okuSalka, sha shaama naavo. 12Joel okwa li omukulunhu naSafam omutivali, va shikulwa kuJaenai naSafat, muBasan. 13Novamwaina vavo ovalumenhu pamapata avo, ovava: Mikael naMesullam naSheba naJorai naJaekan naSia naEber, vaheyali. 14Ovo hano ovana ovamati vaAbigail yaHuri yaJaroah naGilead yaMikael yaJesisai yaJagdo yaBus. 15Ahi yaAbdiel yaGuni, okwa li omukulunhu womapata avo. 16Ndele vo va kala muGilead, muBasan nomoipangelwanhele yasho nomomaulifilo aeshe omuSaron fiyo okexulilo lasho. 17Vo aveshe ova shangelwa membo leshikulafano lomapata pomafiku aJotam, ohamba yaJuda, nopomafiku aJerobeam, ohamba yaIsrael.
18Ovana ovamati vaRuben novaGad netata lepata laManasse, nokutya, ovaladi, ovalumenhu ava ve noshikelelifo neongamukonda ndele tava shili outa ndele va ika oita, va li omayovi omilongo nhee naane nomafele aheyali nomilongo hamano ovo ve nokufikama palombwelo leifano. 19Ndele vo ova ninga oita nOvahagri naJetur naNafis naNodab. 20Ndele va mona ekwafo moku va lwifa, nOvahagri va yandjwa momake avo naaveshe ava va li pamwe naavo. Osheshi va ifana Kalunga molwoodi, ndele Ye e va uda, shaashi vo ove mu lineekela. 21Ndele vo ova twala oimuna yavo: eengamelo davo omayovi omilongo nhano, needi omayovi omafele avali nomayovi omilongo nhano neendongi omayovi avali novanhu omayovi efele. 22Osheshi ovo va fya va li vahapu, shaashi oita oya li yaKalunga. Ndele va kala meenhele davo fiyo va twalwa moukwatwa.
Oludalo letata lepata laManasse
23Novana ovamati vometata lepata laManasse va kala moshilongo shaBasan fiyo okuBaal-Hermon nokuSenir nokomhunda yaHermon. Vo ova li vahapu. 24Ndele ava va li ovakulunhu vomapata avo, nokutya: Efer naJisei naEliel naAsriel naJeremia naHodavia naJagdiel, ovalumenhu ovaladi, ovalumenhu ve nedina, ovakulunhu vomapata avo. 25Ndelenee ve liteeka Kalunga kooxe, ndele moluhaelo va shikula oikalunga yoiwana yomedu olo, oyo Kalunga e i taataa komesho yavo. 26Onghee hano Kalunga kaIsrael a pendula omhepo yaPul, ohamba yaAsiria, nokutya omhepo yaTiglat-Pileser, ohamba yaAsiria, oyo ya twala moukwatwa Ovarubeni nOvagad netata lepata laManasse ndele ye va twala kuHalag nokuHabor nokuHara nokomulonga waGosan fiyo onena eli.
Currently Selected:
1 OMAFIMBO 5: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.