1 OMAFIMBO 29
29
Eeshali da yandjelwa etungo lotembeli
1Ohamba David ya lombwela vali oshiongalele ashishe: “Omumwange Salomo, ou a hoololwa kuKalunga, ye omunyasha noke na eshiivo la wana, noshilonga oshinene, ndelenee ouhamba oo kau fi womunhu, ndelenee owOmwene Kalunga. 2Onghee hano neenghono dange adishe nda ongelela ongulu yaKalunga oshingoldo shoinima yoingoldo, noshisiliveli shoinima yoisiliveli noshikushu shoinima yoshikushu, noshivela shoinima yoivela, nomiti doinima yoiti. Oumanya vaoniks noumanya tava nyaminwa mo noumanya valaula, noumanya vomavala noumanya ve lili nave lili ve nondilo, nomamanya amarmor mahapu. 3Ndele eshi ndi hole ongulu yaKalunga kange, ohandi yandje kongulu yaKalunga oshingoldo noshisiliveli shange mwene, ponho yaaishe oyo nde i tuvikilila ongulu yotembeli, nokutya: 4oitalenti omayovi atatu yoshingoldo shomoingoldo yokuOfir, noisiliveli yoitalenti omayovi aheyali ya yelifwa okukolongifa nayo omakuma ongulu; 5oshingoldo shoinima yoingoldo noshisiliveli shoinima yoisiliveli noyoinima aishe yomake ovanongo. Ope na tuu ou a hala nena eli nehalo liwa okweetela Omwene eeshali nomake e yadi?”
6Opo nee va yandja nehalo liwa ngaha: ovakulunhu vomapata novakulunhu voitukulwalongo yOvaisraeli novaneyovi novanefele nomalenga omoshilonga shohamba, 7va yandjela oshilonga shongulu yaKalunga: oshingoldo oitalenti omayovi atano noimaliwa yoidariki omayovi omulongo. Noshisiliveli oitalenti omayovi omulongo, noshikushu oitalenti omayovi omulongo naahetatu. Noshivela oitalenti omayovi efele. 8Ndele ou kwa li e nomamanya mawa e nondilo, e a yandja komamona ongulu yOmwene, meke lomupashukili Jehiel, Omugerson. 9Novanhu va hafela ehalo liwa lavo, osheshi va yandja kOmwene nomutima aushe nehalo liwa. Nohamba David yoo ya li ya hafa unene.
Eilikano laDavid
10Ndele David okwa hambelela Omwene moipafi yoshiongalele ashishe, ndele David ta ti: “Oove Omwene Kalunga katate Israel, u hambelelwe alushe fiyo alushe! 11Omwene, ounene owoye, neenghonopangelo odoye, noshinge oshoye, nouyelele owoye, nepangelofimano oloye, heeno, aishe yomeulu nokombada yedu oyoye. Oshilongo oshoye Omwene, ndele Oove Omupangeli waaishe! 12Oupuna nefimano tali di kwoove, ndele Ove ho pangele ashishe. Ndele meke loye omu neenghono nepangelonghono. Ndele momapangelelo eke loye hamu di enenepeko neyombamo. 13Ndele paife, Kalunga ketu, hatu ku hambelele ndele hatu fimaneke edina loye noshinge shalo.
14“Osheshi aame omushike, noshiwana shange oshishike, tu dule keenghono detu vene okuyandja eeshali da tya ngaha dehalo liwa? Ndelenee ashishe eshi tashi di kwoove, ndele meke loye twe shi yandja kwoove. 15Osheshi fye ovanailongo nomapongo koshipala shoye ngaashi ootate. Omafiku etu okombada yedu e li ngaashi omudidimbe, ndele pehe na sha, tu tule mo elineekelo letu. 16Omwene Kalunga ketu, oupuna aushe ou twe u ongela, tu tungile edina loye liyapuki ongulu, otau di meke loye, naaushe oo owoye. 17Kalunga kange, ame ndi shi shii, Ove ho panapana omutima, ndele wa hokwa ouyuki. Nomwenyo wa yuka nda yandja oinima aishe ei nehalo liwa. Ndele paife nda tala nehafo nhumbi ovanhu voye, ava ve li po, va yandja kwoove nehalo liwa. 18Omwene, Kalunga kootate Abraham, Isak naIsrael, diinina fiyo alushe ehalo la tya ngaha lomadiladilo omitima dovanhu voye ndele omitima di yukifa kwoove, 19ndele pa omumwange Salomo omutima umwe a diinine oipango yoye neendobwedi doye neenghedimhango doye, opo a ninge ashishe nokutunga ouhamba oo nde u longekida.”
Salomo ta vaekwa, ta ningi ohamba
20Opo nee David a lombwela oshiongalele ashishe: “Paife hambeleleni Omwene, Kalunga keni.” Opo nee oshiongalele ashishe sha hambelela Omwene, Kalunga kooxe. Ndele ve linyongamena ndele tava wile eombe koshipala shOmwene nokoshipala shohamba. 21Ndele efiku la shikula vo ova yambela Omwene omatomenoyambo ndele va etela Omwene omaxwikiloyambo: eengobe deemhedi eyovi limwe, eedi deemhedi eyovi limwe, oudjona eyovi limwe, pamwe noikunwayambo yao, nomatomenoyambo mahapu molwOvaisraeli aveshe. 22Ndele mefiku tuu olo va lya ndele va nwa nehafo linene koshipala shOmwene, ndele va ninga Salomo yaDavid lutivali ohamba, ndele ve mu vaekela Omwene ngaashi ohamba, ndele va vaeka Sadok a ninge omupristeli. 23Osho ngaha hano Salomo a kala omutumba kolukalwapangelo lOmwene ngaashi ohamba ponhele yaxe David. Nokwa li e nelao. NOvaisraeli aveshe va dulika kuye. 24Novakulunhu aveshe novaladi novana voovene vaDavid ve litula mepangelo lohamba Salomo. 25NOmwene okwa nenepeka unene Salomo moipafi yOvaisraeli aveshe ndele Ye e mu pa epangelofimano lo inali kala ko kohamba nande imwe yOvaisraeli ye mu tetekela.
Okufya kwaDavid
26Osho ngaha hano David yaIsai okwa li ohamba yOvaisraeli aveshe. 27Nomafiku oo David a pangela Israel a li omido omilongo nhee. Okwa pangela muHebron omido heyali, nomuJerusalem omido omilongo nhatu nanhatu. 28Nokwa fya moukulupe mouwa, a loloka okukala kombada yedu, e yadi oupuna nefimano, nomona waye Salomo a ninga ohamba ponhele yaye. 29Noinima oyo tai hepaulula David, inya yotete nayo yaxuuninwa, tala, ya shangelwa membo lomahepaululo lomumonikokule Samuel, nomembo lomahepaululo lomuxunganeki Natan nomembo lomumonikokule Gad, 30pamwe noinima youhamba waye aushe noilonga yaye youladi nomafimbo Ovaisraeli naa oilongo aishe.
Currently Selected:
1 OMAFIMBO 29: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.