ᕼᐆᓯᐊᑉ ᐊᒡᓚᖏᑦ 7
7
1“ᐋᖅᑭᒍᒪᒐᓗᐊᕋᒃᑭᑦ ᐃᓴᕆᐊᓕᒥᐅᑦ, ᐱᐅᖏᑦᑐᓂᒃ ᐃᕗᕅᒥᐅᑦ ᐱᓇᓱᐊᕐᖕᓂᖏᑦ ᓴᖅᑭᑉᐳᑦ, ᓴᒥᐊᕆᐊᒥᐅᓪᓗ ᐱᐅᖏᑦᑐᓕᓂᖏᑦ; ᓱᓕᖏᑦᑐᓂᒃ ᐋᖅᑮᖃᑎᖃᖃᑦᑕᖅᐳᑦ, ᑎᒡᓕᒃᑏᑦ ᐃᒡᓗᓄᑦ ᐃᓵᖃᑦᑕᖅᐳᑦ, ᐊᖅᑯᑎᒦᑦᑐᓂᒡᓗ ᑎᒡᓕᒐᕐᕕᖃᖃᑦᑕᖅᓗᑎᒃ. 2ᐃᓱᒪᓚᐅᖅᓯᒪᓐᖏᓚᓪᓘᓐᓃᑦ ᐱᐅᖏᑦᑐᓕᓂᖏᓐᓂᒃ ᐃᖅᑲᐅᒪᒐᔭᕐᖕᓂᓐᓂᒃ; ᐊᔪᖅᑐᓕᓂᕐᖕᒥᖕᓄᑦ ᐃᓗᒪᔭᐅᓕᖅᐳᑦ, ᑮᓇᕐᖕᒪᓗ ᓯᕗᕌᓃᑉᐳᑦ.”
ᓯᓔᕐᕆᒃᓯᓇᓱᐊᕐᖕᓃᑦ ᐊᖓᔪᖅᑳᕐᔪᐊᖃᕐᕕᖕᒦᑦᑐᓄᑦ
3“ᐊᖓᔪᖅᑳᕐᔪᐊᖅ ᖁᕕᐊᓱᒃᑎᑉᐹᑦ ᐱᐅᖏᑦᑐᓕᓂᕐᖕᒥᖕᓄᑦ, ᐊᖓᔪᖅᑳᖁᑎᖏᓪᓗ ᓴᒡᓗᓂᒃᑯᑦ ᓯᓔᕐᕆᕔᑦ. 4ᐊᓯᓐᓂᐊᖅᑏᓐᓇᐅᕗᑦ; ᓂᕿᓕᐅᕐᕕᒃᑐᑦ ᐆᓇᖅᑐᑐᑦ ᑍᒤᑉᐳᑦ, ᓂᐊᖂᔭᓕᐅᖅᑎᒧᑦ ᐃᑯᐊᓪᓚᒃᓴᖅᑕᐅᓚᐅᖏᑦᑐᑐᑦ, ᓂᐊᖂᔭᓕᐊᖓ ᐳᕙᓪᓚᓚᐅᖏᓐᓂᖓᓂ. 5ᐊᖓᔪᖅᑳᕐᔪᐊᑦᑕ ᐊᖓᔪᖅᑳᖁᑎᖏᑕᓗ ᐅᓪᓗᖓᓐᓂ ᖃᓂᒻᒪᒃᐳᑦ ᕔᓂᐅᑉ ᐆᓇᖅᓯᑎᑦᓯᓂᖓᓄᑦ; ᑕᕝᕙ ᐊᒡᒐᓂ ᐃᓴᒃᐰᑦ ᒥᑕᐅᑎᖃᖅᑎᓄᑦ. 6ᓂᕿᓕᐅᕐᕕᒃᑐᑦ ᐆᒻᒪᑎᖏᑦ ᐆᑕᐅᕗᑦ ᐊᑭᕋᖅᑐᕋᓱᐊᕐᖕᓂᕐᖕᒧᑦ; ᐅᓐᓄᐊᓕᒫᖅ ᓂᓐᖓᐅᒪᓂᖏᑦ ᐃᓯᐊᕿᕗᑦ, ᑕᕝᕙ ᐅᓪᓛᒃᑯᑦ ᐃᑯᐊᓪᓚᒃᐳᑦ ᐃᑯᐊᓚᓕᖅᓗᑎᒃ.
7“ᐃᓘᓐᓇᑎᒃ ᐆᓇᒻᒪᕆᓕᕋᒥᒃ ᓂᕿᓕᐅᕐᕕᒃᑐᑦ, ᑕᕝᕙ ᐃᓄᐊᖅᐳᑦ ᐊᐅᓚᑦᓯᔨᒥᖕᓂᒃ. ᐊᖓᔪᖅᑳᓕᒫᖏᑦ ᐃᓄᐊᖅᑕᐅᕗᑦ; ᓇᓪᓕᐊᓐᓄᓪᓘᓐᓃᓪᓕ ᑐᒃᓯᐊᕐᕕᐅᓚᐅᓐᖏᓚᖓ.”
ᐃᓴᕆᐊᓕᒥᐅᑦ ᐃᓅᖃᑎᒌᒡᔪᐊᓪᓗ
8“ᐃᕗᕅᒥᐅᑦ ᐃᓄᖏᑦ ᐃᒻᒥᖕᓄᑦ ᑲᑦᑐᓯᐅᑎᕗᑦ ᐃᓅᖃᑎᒌᒡᔪᐊᓄᑦ; ᓂᐊᖂᔭᑎᑐᑦ ᒧᒥᒃᓯᒪᖏᑦᑐᑎᑐᑦ ᐂᐸᔪᑎᑐᑦ ᑍᒤᑉᐳᑦ. 9ᖃᐅᔨᒪᓐᖏᓚᑦ ᑕᐱᖃᕐᖕᓂᕐᖕᒥᖕᓄᑦ ᓲᖑᓂᒃᓴᖏᑦ ᓄᖑᑕᐅᖕᒪᑕ; ᓂᐊᖁᖏᑦ ᕿᑦᔭᒃᑎᑕᐅᓕᖅᐳᑦ, ᑕᒪᑐᒥᖓᓕ ᖃᐅᔨᓐᖏᓚᓪᓘᓐᓃᑦ. 10ᐃᓴᕆᐊᓕᒥᐅᑦ ᐃᓄᖏᑕ ᐱᐅᔪᕆᓂᖏᑦ ᐃᒻᒥᖕᓄᑦ ᐊᑭᕋᖅᑐᖅᐳᑦ; ᓱᓕᓕ ᐅᑎᓚᐅᓐᖏᓚᑦ ᐊᑕᓂᕐᖕᒧᑦ ᒎᑎᒥᖕᓄᑦ, ᑖᑦᓱᒥᖓᓗ ᕿᓂᓚᐅᕋᑎᒃ, ᑕᒪᒃᑯᐊ ᐊᑐᖅᑎᓪᓗᒋᑦ. 11ᐃᕗᕅᒥᐅᑦ ᑑᕕᑎᑐᑦ ᓯᓔᑦᑐᑎᑐᑦ ᓇᒧᑐᐃᓐᓈᖅᑐᑎᑐᑦ ᑍᒤᑉᐳᑦ, ᐄᑦᔨᑉᑎᒧᑦ ᐃᑲᔪᖅᑕᐅᔪᒪᕗᑦ, ᑭᖑᓂᐊᒍᑦ ᐊᓯᕆᐊᒧᑦ ᐂᓪᓗᑎᒃ. 12ᐃᖏᕐᕋᑎᓪᓗᒋᑦ ᓄᓗᐊᒃᑲ ᐃᓯᕕᑦᓱᒫᖅᐸᒃᑲ ᑖᒃᑯᓄᖓ; ᓄᓗᐊᖅᑎᓪᓗᒋᑦ ᑎᖕᒥᐊᑎᑐᑦ ᖃᖓᑕᑎᓪᓗᒋᑦ ᑲᑕᒃᑎᑕᐅᔪᑎᑐᑦ; ᓱᒋᐊᕈᒫᖅᐸᒃᑲ ᐱᐅᖏᑦᑐᓕᓂᖏᑦ ᐱᓪᓗᒋᑦ.
13“ᑲᑉᐱᐊᓐᓇᒦᒃ ᑖᒃᑯᐊ, ᐅᕙᓐᓂᒃ ᕿᒤᓚᐅᕐᖕᒪᑕ! ᐅᕙᓐᓂᒃ ᐊᑭᕋᖅᑐᓕᓚᐅᕐᖕᒪᑕ, ᐊᓯᕈᖅᑕᐅᔪᒫᓕᖅᐳᑦ! ᐱᐅᓕᔪᒪᓚᐅᕋᓗᐊᖅᐸᒃᑲ, ᐅᕙᓐᓂᒡᓕ ᓴᒡᓗᑦᔪᑎᖃᓚᐅᖅᐳᑦ. 14ᐆᒻᒪᑎᒥᖕᓂᑦ ᐱᔪᒥᒃ ᐱᓇᑎᒃ ᑐᒃᓯᐊᕐᕕᒋᓚᐅᖅᐹᖓ, ᐃᓐᓇᖓᕕᖕᒥᖕᓂᑦ ᐃᓚᓐᓂᖅᓴᖅᓗᑎᒃ ᑐᒃᓯᐊᕐᕕᒋᓚᐅᕋᓗᐊᖅᐹᖓ; ᕿᓄᓪᓗᑎᒃ ᓂᐊᖂᔭᒃᓴᒥᒃ ᕔᓂᒥᒡᓗ ᐃᒻᒥᖕᓂᒃ ᑭᓪᓕᐊᓪᓗᑎᒃ, ᐅᕙᓐᓂᒃ ᐊᑭᕋᖅᑐᓚᐅᖅᐳᑦ. 15ᐱᔭᕆᐅᖅᓴᖅᑎᓚᐅᕋᓗᐊᖅᐸᒃᑲ ᓲᖑᓯᑎᓪᓗᒋᓪᓗ, ᐅᕙᓐᓄᓪᓕ ᐱᐅᖏᑦᑐᒥᒃ ᐊᑭᕋᖅᑐᓕᓚᐅᖅᐳᑦ. 16ᒎᑎᓐᖑᐊᓄᑦ ᓵᖃᑦᑕᖅᐳᑦ; ᐱᑎᒃᓯᐅᕗᑦ ᑐᕚᕆᔭᒃᓴᐅᖏᑦᑐᑦ, ᐊᖓᔪᖅᑳᖁᑎᖏᑦ ᑐᖁᔪᒫᖅᐳᑦ ᓴᕕᒡᔪᐊᓄᑦ ᖃᓂᒃᑯᑦ ᒥᑕᐅᑎᖃᖃᑦᑕᓚᐅᕐᖕᒪᑕ. ᑕᒪᓐᓇᓗ ᐄᑦᔨᑉᑎᒥᐅᓄᑦ ᒥᑕᐅᑕᐅᑦᔪᑎᒋᔪᒫᖅᐹᑦ.”
Currently Selected:
ᕼᐆᓯᐊᑉ ᐊᒡᓚᖏᑦ 7: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.