ᓴᒧᐃᓕ ᓯᕗᓪᓖᑦ 6
6
ᐊᖏᕈᑎᐅᑉ ᐃᒃᓯᕐᕕᖓᑕ ᐅᑎᖅᑎᑕᐅᓂᖓ
1ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐱᓕᔅᑍᓂᒦᓚᐅᖅᐳᖅ ᑕᖅᑭᓂᒃ 7ᓂᒃ. 2ᐱᓕᔅᑍᓂᒥᐅᓪᓗ ᕾᖁᔨᓚᐅᖅᐳᑦ ᑐᓂᕐᕈᓯᖅᑎᑦᓯᔨᓂᒃ ᖃᐅᔨᓇᓱᐊᖅᑎᓂᒡᓗ ᐊᐱᕆᓪᓗᒋᓪᓗ, “ᖃᓄᐃᓕᐅᖅᑐᒃᓴᐅᕕᑖ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᓂᒃ? ᐅᖃᐅᑎᓚᐅᖅᑎᒍᑦ ᐅᑎᖅᑎᓐᓂᐊᕈᑦᑎᒍ ᐃᓂᖓᓄᑦ ᓱᓇᒥᒃ ᐃᓚᖃᖅᓗᓂ ᐊᐅᓪᓚᖅᑎᑕᒃᓴᕆᕙᕗᑦ?”
3ᑖᒃᑯᐊ ᑭᐅᕗᑦ, “ᐃᓴᕆᐊᓕᒥᐅᑉ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐊᐅᓪᓚᖅᑎᓐᓂᐊᕈᑦᓯᐅᒃ, ᐃᓚᖃᖏᓪᓗᒍ ᐊᐅᓪᓚᖅᑎᑕᒃᓴᕆᓐᖏᓚᓯ, ᐊᐅᓪᓚᖅᑎᑦᓯᖃᓯᐅᑦᔨᔪᒃᓴᐅᕗᓯᓕ ᐂᑦᑑᑎᓂᒃ ᐸᓯᔭᒃᓴᐅᓂᑦᓯ ᐊᑭᓕᐅᑎᒃᓴᖓᓂᒃ. ᑕᕝᕙ ᑍᒤᓕᐅᕈᑦᓯ ᐋᖅᑭᒃᑕᐅᓂᐊᖅᐳᓯ, ᖃᐅᔨᓂᐊᖅᐳᓯᓗ ᓱᖕᒪᑦ ᑖᑦᓱᒧᖓ ᓱᒋᐊᖅᑕᐅᓐᓂᕐᖕᒪᒑᑦᓯ.”
4ᐃᓄᐃᓪᓗ ᐊᐱᕆᕗᑦ, “ᓱᓇᓃᒃ ᐂᑦᑑᑎᖃᖅᑐᒃᓴᐅᕕᑖ ᐸᓯᔭᒃᓴᐅᓂᑦᑎᓐᓄᑦ ᐊᑭᓕᐅᑎᒃᓴᓂᒃ?”
ᑖᒃᑯᐊ ᑭᐅᕗᑦ, “ᑕᓪᓕᒪᓂᒃ ᒎᓗᓂᒃ ᐋᓐᓂᐊᓇᖅᑐᓐᖑᐊᓂᒃ ᐋᖅᑭᒃᑕᐅᔪᓐᓇᖏᑦᑐᓂᒃ ᑕᓪᓕᒪᓂᒡᓗ ᒎᓗᓂᒃ ᐊᕕᓐᖓᓐᖑᐊᓂᒃ, ᐱᓕᔅᑍᓂᒥᐅᑦ ᐊᖓᔪᖅᑳᖏᑕ ᖃᑦᓯᐅᓂᖏᑦ ᒪᓕᒡᓗᒋᑦ; ᖃᓂᒻᒪᓯᖅ ᐃᓕᑦᓯᓐᓄᐊᓚᐅᕐᖕᒪᑦ ᐊᖓᔪᖅᑳᓕᒫᑦᓯᓐᓄᓪᓗ. 5ᑖᒃᑯᐊ ᓴᓇᓐᖑᐊᖅᑕᒃᓴᕆᕙᓯ ᐋᓐᓂᐊᓇᖅᑐᓐᖑᐊᑦ ᐊᕕᓐᖓᓐᖑᐊᓪᓗ ᐃᓕᑦᓯᓐᓂᒃ ᓱᕅᓚᐅᕐᖕᒪᑕ ᓄᓇᑦᓯᓐᓂᒡᓗ, ᓂᖅᑐᕐᖕᓇᖅᓯᑎᑕᒃᓴᕆᕙᓯᓗ ᐃᓴᕆᐊᓕᒥᐅᑦ ᒎᑎᖓᑦ; ᐃᒻᒪᖄ ᐊᒃᓱᕈᕈᓐᓃᕋᔭᖅᐳᖅ ᓱᒋᐊᖅᓯᔭᕆᐊᒃᓴᖅ ᐃᓕᑦᓯᓐᓂᒃ, ᒎᑎᑦᓯᓂᒃ ᓄᓇᑦᓯᓐᓂᒡᓗ. 6ᓱᖕᒪᑦ ᐆᒻᒪᑎᓯ ᓯᑎᔫᒋᐊᖃᖅᐸᑦ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑎᑐᑦ ᐰᕉᑐᑦ ᐄᑦᔨᑉᑎᒥᐅᑎᑐᓪᓗ ᐆᒻᒪᑎᖏᑦ ᓯᑎᔫᓚᐅᕐᖕᓂᖏᑎᑐᑦ? ᐱᓐᖑᐊᕆᑐᐃᓐᓇᓕᓚᐅᕐᖕᒪᒋᑦ, ᐃᓄᖁᑎᖏᓐᓂᒃ ᐊᐅᓚᖅᑎᑦᓯᓚᐅᖅᑎᓐᓇᒋᑦ, ᑕᕝᕙ ᐊᐅᓪᓚᕈᓇᖅᓯᑎᑦᓯᓚᐅᖅᐳᑦ. 7ᑍᒤᒻᒪᑦ, ᓄᑖᒥᒃ ᑲᓕᒐᓕᐅᓕᕆᑦᓯ ᐊᒃᓴᓗᐊᓕᖕᒥᒃ ᒪᕐᕉᖕᓂᒡᓗ ᐃᒻᒧᒃᓯᐅᒑᖕᓂᒃ ᕿᒧᒋᐅᖅᓯᒪᖏᑦᑑᖕᓂᒃ; ᑖᒃᑯᐊᒃ ᑲᓕᒐᕐᖕᒥᒃ ᐅᓂᐊᖅᑐᒃᓴᓕᐊᕆᓗᒋᒃ, ᓄᕐᕋᖏᒡᓕ ᐅᑎᖅᑎᓪᓗᒋᑦ ᐆᒪᔪᖃᐅᑎᒧᑦ. 8ᐊᑕᓂᐅᓪᓗ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑲᓕᒐᕐᖕᒧᐊᖅᓗᒍ, ᐃᒃᓯᕐᕖᓪᓗ ᐃᓗᓕᓖᑦ ᒎᓗᓂᒃ ᓴᓇᓐᖑᐊᖅᓯᒪᔪᓂᒃ ᐂᑦᑑᑎᒋᓂᐊᖅᑕᑦᓯᓐᓂᒃ ᐸᓯᔭᒃᓴᐅᓂᑦᓯᓐᓄᑦ ᐊᑭᓕᐅᑎᒃᓴᐅᓂᐊᖅᑐᓂᒃ ᑲᓕᒐᕐᖕᒧᐊᖃᓯᐅᑎᓗᒋᑦ. ᑲᓕᒑᕐᓗ ᐊᐅᓪᓚᖅᑎᓪᓗᒍ, ᐃᒻᒥᓂᒃ ᐃᖏᕐᕋᓂᐊᕐᖕᒪᑦ ᐃᓄᖃᖏᓪᓗᓂ. 9ᖃᐅᔨᓴᖅᑐᒃᓴᐅᕗᓯ ᓇᒧᓐᖓᐅᖕᒪᖔᑦ; ᑲᔪᓯᑐᐊᖅᐸᑦ ᓄᓇᓕᖕᓄᑦ ᐱᑦ-ᓯᒥᔅᒧᑦ, ᑐᑭᖃᕐᖕᓂᐊᖅᐳᖅ ᐃᓴᕆᐊᓕᒥᐅᑦ ᒎᑎᖓᑕ ᑕᒪᓐᓇ ᐱᐅᖏᑦᑐᐊᓗᒃ ᐊᑑᑎᓚᐅᖅᑕᕗᑦ ᑎᑭᑎᓯᒪᖕᒪᒍ; ᑲᔪᓯᓐᖏᑐᐊᖅᐸᓪᓕ, ᖃᐅᔨᓂᐊᖅᐳᒍ ᑕᒪᓐᓇ ᖃᓂᒪᓇᖅᑐᖅ ᑖᑦᓱᒪ ᑎᑭᑎᓚᐅᖏᒻᒪᒍ; ᓇᓪᓕᐅᑎᔪᕕᓂᑐᐃᓐᓇᐅᒐᔭᖅᐳᕐᓕ.”
10ᑕᕝᕙ ᐊᖑᑎᑦ ᐱᓇᓱᐊᓚᐅᖅᐳᑦ ᐅᖃᐅᑦᔭᐅᑦᔪᑎᒥᖕᓂᒃ, ᐃᒻᒧᒃᓯᐅᒑᖕᓂᒃ ᒪᕐᕉᖕᓂᒃ ᑎᒍᓯᕗᑦ ᑲᓕᒐᕐᖕᒧᐊᖅᓗᒋᒡᓗ, ᓄᕐᕋᖏᒡᓗ ᐊᖏᕐᕋᐅᑎᓪᓗᒋᒃ. 11ᐊᑕᓂᐅᑉ ᐊᖏᖃᑎᒌᖕᓂᕐᖕᒧᑦ ᐃᒃᓯᕐᕕᖁᑎᖓ ᑲᓕᒐᕐᖕᒧᐊᖅᐹᑦ, ᐃᒃᓯᕐᕕᖕᒥᒡᓗ ᐃᓗᓕᓕᖕᒥᒃ ᒎᓗᓂᒃ ᓴᓇᓐᖑᐊᖅᓯᒪᔪᓂᒃ ᐊᕕᓐᖓᓐᖑᐊᓂ ᖃᓂᒻᒪᓯᓐᖑᐊᓂᒡᓗ ᓴᓂᐊᓄᐊᖅᓯᓪᓗᑎᒃ. 12ᐃᒻᒧᒃᓯᐅᒊᓪᓗ ᐊᐅᓪᓚᖅᐳᑦ ᐊᖅᑯᑎᒃᑯᑦ ᐱᑦ-ᓯᒥᔅᒧᐊᕆᐊᒃᑯᑦ ᑐᕌᑦᓯᐊᖅᓗᑎᒡᓗ ᑲᔪᓯᕗᑦ, ᐊᖅᑯᑎᒥᑦ ᓴᖑᓐᖏᓚᑦ ᑕᓕᖅᐱᖕᒧᓪᓘᓐᓃᑦ ᓴᐅᒥᖕᒧᓪᓘᓐᓃᑦ, ᐱᓕᔅᑍᓂᒥᐅᓪᓗ ᐊᖓᔪᖅᑳᖏᑕ ᒪᓕᓚᐅᖅᐹᑦ ᐱᑦ-ᓯᒥᔅᓯᐅᑉ ᓄᓇᖓᑕ ᑭᒡᓕᖓᓄᑦ ᑎᑭᓪᓗᒍ.
13ᐱᑦ-ᓯᒥᔅᒥᐅᓪᓕ ᐃᓄᖏᑦ ᓂᐊᖂᔭᒃᓴᓕᕆᓚᐅᖅᐳᑦ ᓄᕗᖏᓐᓂᒃ ᐱᔧᓪᓗᑎ ᓇᖅᓴᒥ; ᑕᑯᓴᕋᒥᒡᓗ ᑕᑯᕗᑦ ᐊᖏᕈᑎᐅᑉ ᐃᒃᓯᕐᕕᖁᑎᖓᓂᒃ, ᖁᕕᐊᓱᒻᒪᕆᓚᐅᖅᐳᓪᓗ ᑕᑯᒐᒥᑦᔪᒃ. 14ᑕᕝᕙ ᑲᓕᒐᖅ ᑎᑭᐅᑎᕗᖅ ᐱᕈᖅᓰᕕᖕᒧᑦ ᐱᒋᔭᐅᔪᒧᑦ ᔮᓱᐊᒧᑦ ᐱᑦ-ᓯᒥᔅᒦᑦᑐᒧᑦ, ᑕᕝᕗᓐᖓᕋᒥᓗ ᓄᖅᑲᖅᐳᖅ. ᐅᔭᕋᒡᔪᐊᑉ ᓴᓂᐊᓄᑦ; ᐃᓄᐃᓪᓗ ᑲᓕᒐᖅ ᓱᕋᒃᑎᖅᓗᒍ ᑭᔪᒃᓴᓕᐊᕆᕚᑦ ᐃᒻᒧᒃᓯᐅᒑᒡᓗ ᑐᖁᓪᓗᒋᒃ ᐃᑯᐊᓪᓚᒃᐰᑦ ᑐᓂᕐᕈᑎᒋᓪᓗᒋᒃ ᐊᑕᓂᕐᖕᒧᑦ. 15ᓕᕔᑏᓪᓗ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐲᓚᐅᖅᐹᑦ ᐃᒃᓯᕐᕕᒡᓗ ᒎᓗᓂᒃ ᓴᓇᓐᖑᐊᖅᓯᒪᔪᓂᒃ ᐃᓗᓕᓕᒃ ᐱᖃᓯᐅᑎᓪᓗᒍ, ᐅᔭᕋᒡᔪᐊᓪᓗ ᖄᖓᓄᑦ ᐃᓕᕔᑦ; ᑕᕝᕙ ᐱᑦ-ᓯᒥᔅᓯᐅᑉ ᐃᓄᖏᑦ ᐃᑯᐊᓚᑦᓯᓪᓗᑎᒃ ᑐᓂᕐᕈᓯᓚᐅᖅᐳᑦ ᑐᖁᑦᓯᓪᓗᑎᒡᓗ ᑐᓂᕐᕈᓯᖅᓗᑎᒃ ᐅᓪᓗᒥ ᑕᕝᕙᓂ ᐊᑕᓂᕐᖕᒧᑦ. 16ᐱᓕᔅᑍᓂᒥᐅᓪᓗ ᐊᖓᔪᖅᑳᖏᑦ ᑕᓪᓕᒪᑦ ᑕᑯᓐᓇᓚᐅᖅᐳᑦ ᐱᓂᐊᕐᖕᓂᐅᔪᓂᒃ, ᑭᖑᓂᐊᒍᓪᓗ ᐅᑎᖅᐳᑦ ᐅᓪᓗᒥ ᑕᕝᕙᓂᑦᓮᓐᓇᖅ ᐃᑯᕋᓂᒧᑦ.
17ᐱᓕᔅᑍᓂᒥᐅᑦ ᑐᓂᓯᓚᐅᖅᐳᑦ ᒎᓗᓂᒃ ᑕᓪᓕᒪᓂᒃ ᖃᓂᒪᓯᕐᖕᓂᒃ ᐋᖅᑭᒃᑕᐅᔪᓐᓇᖏᑦᑐᓂᒃ ᓴᓇᓐᖑᐊᖅᓯᒪᔪᓂᒃ ᑖᒃᑯᐊ ᑐᓂᕐᕈᑕᐅᓪᓗᑎᒃ ᐊᑕᓂᕐᖕᒧᑦ ᐊᑭᓕᐅᑎᒃᓴᐅᖁᓪᓗᒋᑦ ᐸᓯᔭᒃᓴᐅᓂᕐᖕᒥᖕᓄᑦ: ᐃᒡᓗᒐᓴᖕᓂᑦ ᐅᑯᓇᓐᖓᑦ ᐱᑎᓪᓗᒋᑦ ᐋᔅᑖᑦ, ᒑᓴ, ᐊᓯᑭᓗᓂ, ᒑᑎ, ᐃᑯᕋᓂᒥᓪᓗ. 18ᑐᓂᓯᓚᐅᕆᕗᓪᓗ ᒎᓗᓂᒃ ᐊᕕᓐᖓᓐᖑᐊᓂᒃ, ᐱᓕᔅᑍᓂᒥᐅᑦ ᐊᖓᔪᖅᑳᖏᑕ ᐊᐅᓚᑕᖏᓐᓂᑦ, ᐃᒡᓗᒐᓴᖕᓂᑦ ᓴᐴᓗᑕᓕᖕᓂᑦ ᓴᐴᓗᑕᖃᖏᑦᑐᓂᓪᓗ ᓄᓇᓕᖕᓂᒃ ᑐᑭᖃᖅᑎᓪᓗᒋᑦ. ᐅᔭᕋᒡᔪᐊᖅ ᔮᓱᐊᑉ ᐱᕈᖅᓰᕕᖁᑎᖓᓃᓚᐅᖅᑐᖅ ᐱᑦ-ᓯᒥᔅᒥ, ᖄᖓᓄᓪᓗ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐃᓕᓚᐅᖅᐹᑦ, ᑖᓐᓇ ᐅᔭᕋᒃᔪᐊᖅ ᑍᑲᓃᖏᓐᓇᖅᐳᖅ ᓱᓕ ᐅᓪᓗᒥᒧᑦ ᐱᓂᐊᕐᖕᓂᐅᓚᐅᖅᑐᖅ ᓇᓗᓁᖅᑕᐅᓯᒪᖁᓪᓗᒍ.
19ᐊᑕᓂᐅᑉ ᐊᖑᑎᑦ ᐃᓚᖏᑦ ᑐᖁᓚᐅᖅᐰᑦ ᐱᑦ-ᓯᒥᔅᒥᐅᑍᑦ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖓᑕ ᐃᓗᐊᓄᑦ ᑕᑯᒋᐊᓚᐅᕐᖕᓂᖏᑦ ᐱᓪᓗᒋᑦ; ᐃᓄᐃᓪᓗ ᕿᒃᓵᓚᐅᖅᐳᑦ ᐊᑕᓂᐅᑉ ᑐᖁᑦᓯᓂᕆᓚᐅᖅᑕᖓ 70ᓂᒃ ᐱᓂᐊᕐᖕᓂᕆᓚᐅᖅᑕᖓᓗ ᐱᑦᔪᑎᒋᓪᓗᒍ.
ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᑭᕆᐊᑦ-ᔨᕆᒧᐊᖅᑕᐅᓂᖓ
20ᐱᑦ-ᓯᒥᔅᓯᐅᑉ ᐃᓄᖏᑦ ᐅᖃᓚᐅᖅᐳᑦ, “ᑭᓇ ᓇᖏᕈᓐᓇᖅᐹ ᐊᑕᓂᐅᑉ ᐃᑦᔪᕐᖕᓁᑦᑑᑉ ᒎᑎᐅᑉ ᓵᖓᓂ? ᓇᒧᑦ ᐊᐅᓪᓚᖅᑎᑦᓱᓐᓇᖅᐸᕘᑦ ᐅᕙᑦᑎᓐᓂᒃ ᕿᒪᕉᑎᖁᓪᓗᒍ?” 21ᑕᕝᕙ ᐅᖃᕆᐊᖅᑐᖅᑐᓂᒃ ᑎᓕᓯᕗᑦ ᑭᕆᐊᑦ-ᔨᕆᐅᑉ ᐃᓄᖏᓐᓄᑦ ᐅᖃᖁᓪᓗᒋᑦ ᐃᒫᒃ, “ᐱᓕᔅᑍᓂᒥᐅᓂᑦ ᐅᑎᖅᑎᑕᐅᖕᒪᑦ ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖁᑎᖓ. ᕾᓗᓯ ᐂᓚᐅᖅᓯᐅᒃ ᐊᖏᕐᕋᐅᑎᓂᐊᕋᑦᓯᐅᒃ.”
Currently Selected:
ᓴᒧᐃᓕ ᓯᕗᓪᓖᑦ 6: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.