ᓴᒧᐃᓕ ᓯᕗᓪᓖᑦ 3
3
ᐊᑕᓂᐅᑉ ᓴᖅᑭᓐᓂᖓ ᓴᒧᐃᓕᒧᑦ
1ᓱᕈᓯᖅ ᓴᒧᐃᓕ ᐱᔨᑦᓯᓚᐅᖅᐳᖅ ᐊᑕᓂᕐᖕᒥᒃ ᐃᓔᒧᑦ ᑲᒪᒋᔭᐅᓪᓗᓂ. ᐊᑕᓂᐅᑉ ᐅᖃᐅᓯᖏᑦ ᑐᓴᖅᑕᐅᔪᓐᓇᓚᐅᓐᖏᓚᑦ ᐅᓪᓗᓂ ᑖᒃᑯᓇᓂ, ᑕᑯᑎᑕᐅᔪᖃᓚᐅᖅᓯᒪᓇᓂᓗ ᖃᒻᒥᒃᑯᑦ. 2ᑍᑦᓱᒪᓂᐅᑎᓪᓗᒍ, ᐃᓔ ᑕᐅᑐᑦᓯᐊᕈᓐᓃᓚᐅᖅᐳᖅ, ᓇᓪᓚᖓᑎᓪᓗᒍ ᐃᒡᓗᕈᓯᕐᖕᒥᓂ; 3ᒎᑎᐅᑉ ᓇᓂᕈᐊᖁᑎᖓ ᐃᑯᒪᑎᓪᓗᒍ ᓱᓕ, ᓴᒧᐃᓕ ᓇᓪᓚᖓᓪᓗᓂ ᓯᓂᒐᓱᓕᖅᑎᓪᓗᒍ ᐊᑕᓂᐅᑉ ᑐᐱᖓᓂ, ᑕᕝᕙᓂ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓇᔪᖅᑕᖓᓂ. 4ᐊᑕᓂᐅᑉ ᕾᖁᕚ, “ᓴᒧᐃᓖ! ᓴᒧᐃᓖ!” ᑭᐅᕗᕐᓗ, “ᒫᓃᑉᐳᖓ!” 5ᐅᓪᓚᒡᓗᓂᓗ ᐃᓔᒧᐊᖅᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᑉ ᑭᐅᕚ, “ᕾᖁᓚᐅᓐᖏᓚᒋᑦ; ᓯᓂᒋᐊᖅᑐᒃᑲᓐᓂᓕᕆᑦ.” ᓴᒧᐃᓕᓗ ᐅᑎᕋᒥ ᓯᓂᒐᓱᓕᕆᕗᖅ.
6ᐊᑕᓂᐅᑉ ᕾᖁᒃᑲᓐᓂᖅᐹ, “ᓴᒧᐃᓖ!” ᓴᒧᐃᓕᓗ ᒪᑭᓐᓇᒥ ᐃᓔᒧᐊᖅᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᑉ ᑭᐅᕚ, “ᐃᕐᖕᓃᒃ ᕾᖁᓚᐅᓐᖏᓚᒋᑦ; ᓯᓂᒋᐊᖅᑐᒃᑲᓐᓂᓕᕆᑦ.” 7ᓴᒧᐃᓕᓕ ᓱᓕ ᖃᐅᔨᒪᓚᐅᓐᖏᓚᖅ ᐊᑕᓂᐅᖕᒪᖔᑦ, ᐊᑕᓂᖅ ᐅᖃᓪᓚᓚᐅᖅᓯᒪᖏᒻᒪᑦ ᓱᓕ ᑖᑦᓱᒧᖓ.
8ᐊᑕᓂᐅᑉ ᕾᖁᒋᕚ ᓴᒧᐃᓕ ᐱᖓᔪᐊᓐᓂ; ᒪᑭᓐᓇᒥᓗ, ᐃᓔᒧᐊᖅᐳᖅ, ᐅᖃᐅᑎᓪᓗᒍᓗ, “ᕾᖁᒐᕕᓐᖓ, ᑕᕝᕙᓃᑉᐳᖓ.” ᐃᓔᓕ ᒪᓗᒍᓱᓕᖅᐳᖅ ᐊᑕᓂᐅᑉ ᕾᖁᖕᒪᒍ ᓱᕈᓯᖅ. 9ᑍᒤᒻᒪᑦ ᐃᓔᑉ ᐅᖃᐅᑎᓕᖅᐹ ᓴᒧᐃᓕ, “ᐅᑎᓕᕆᑦ, ᓯᓂᒡᕕᖕᓄᑦ; ᕾᖁᔭᐅᓕᕐᖕᒥᒍᕕᑦ ᐃᒤᓕᓂᐊᓕᖅᐳᑎᑦ, ‘ᐊᑕᓃᖅ ᐅᖃᓕᕆᑦ, ᐱᔩᑦ ᓈᓚᖕᒪᑦ.’” ᓴᒧᐃᓕ ᐅᑎᕋᒥ ᓇᓪᓚᖓᓕᕆᕗᖅ.
10ᐊᑕᓂᕐᓗ ᐅᑎᖅᐳᖅ ᓇᖏᓕᖅᓗᓂᓗ, ᓂᓪᓕᕆᕗᓪᓗ ᓲᕐᓗ ᑍᒤᓚᐅᕋᒥ, “ᓴᒧᐃᓖ! ᓴᒧᐃᓖ!” ᓴᒧᐃᓕ ᐅᖃᖅᐳᖅ, “ᐅᖃᓕᕆᑦ; ᐱᔩᑦ ᓈᓚᖕᒪᑦ.”
11ᑕᕝᕙ ᐊᑕᓂᐅᑉ ᓴᒧᐃᓕ ᐅᖃᐅᑎᕚ, “ᑕᑯᒋᑦ, ᐱᓇᓱᐊᕈᒪᓕᖅᐳᖓ ᐃᓴᕆᐊᓕᒥᐅᓄᑦ, ᓯᐅᑎᓖᓪᓗ ᓇᓪᓕᐊᑦ ᑐᓴᖅᑐᑦ ᖁᐊᖅᓵᕈᒫᖅᐳᑦ. 12ᐅᓪᓗᖅ ᓇᓪᓕᐅᑎᒃᐸᑦ ᐅᖃᐅᓯᕆᓚᐅᖅᑕᒃᑲ ᓇᓚᐅᑦᓯᑎᑦᓱᒫᖅᐸᒃᑲ ᐃᓔᑉ ᐃᓚᖏᓐᓄᑦ, ᐱᒋᐊᕐᖕᓂᖓᓂᑦ ᐃᓱᐊᓄᑦ. 13ᐅᖃᐅᑎᓚᐅᖅᐸᕋ ᐃᓚᖏᑦ ᓱᒋᐊᕐᖕᓂᐊᕐᖕᓂᕋᓕᖅᓗᒋᑦ ᐃᓱᖃᖏᑦᑐᒧᑦ, ᐃᓔᑉ ᖃᐅᔨᒪᓚᐅᖅᐰᖅ ᐱᐅᖏᑦᑐᓕᓂᖏᑦ, ᐃᕐᖕᓂᖏᑦ ᐅᖃᕐᖕᓂᖅᓘᑦᔨᓚᐅᕐᖕᒪᑕ ᒎᑎᒥᒃ, ᐃᓂᖅᑎᓚᐅᓐᖏᓔᓪᓕ. 14ᑍᒤᒻᒪᑦ ᐊᖏᒻᒪᕆᒃᐳᖓ ᓇᓗᓁᖅᓯᓪᓗᖓ ᐃᓔᑉ ᐃᓚᖏᓐᓄᑦ; ᐃᓔᑉ ᐃᓚᖏᑕ ᐱᐅᖏᑦᑐᓕᓂᖏᑦ ᐲᖅᑕᐅᓂᐊᓐᖏᓚᑦ ᑐᖁᑦᓯᓗᓂ ᑐᓂᕐᕈᓯᕐᖕᓂᒃᑯᑦ ᑐᓂᕐᕈᓯᕐᖕᓃᑦ ᐊᓯᖏᑎᒍᓪᓘᓐᓃᑦ ᐃᓱᖃᖏᑦᑐᒧᑦ.”
15ᓴᒧᐃᓕᓕ ᐃᓐᓇᖎᓐᓇᖅᐳᖅ ᐅᓪᓛᒧᑦ ᑎᑭᓪᓗᒍ; ᒪᑭᓐᓇᒥᓗ ᐊᑕᓂᐅᑉ ᐃᒡᓗᖓᑕ ᐅᒃᑯᐊᖏᑦ ᒪᑐᐃᖅᐰᑦ. ᓴᒧᐃᓕᓕ ᓯᕘᕋᓚᐅᖅᐳᖅ ᐅᖃᐅᑦᔨᒋᐊᒃᓴᖅ ᐃᓔᒥᒃ ᑕᑯᑎᑕᐅᑦᔪᑎᒥᓂᒃ. 16ᐃᓔᓪᓕ ᕾᖁᕚ ᐅᖃᐅᑎᓪᓗᒍᓗ, “ᓴᒧᐃᓖ, ᐃᕐᖕᓃᒃ!” ᓴᒧᐃᓕ ᑭᐅᕗᖅ, “ᑕᒫᓃᑉᐳᖓ.”
17ᐃᓔᓪᓗ ᐊᐱᕆᕚ, “ᖃᓄᖅ ᐊᑕᓂᐅᑉ ᐅᖃᐅᑎᓚᐅᖅᐹᑎᑦ? ᐃᔨᖅᓯᒪᕕᒋᑦᑍᓕᓐᖓ. ᒎᑎᐅᑉ ᓱᒋᐊᕈᒫᖅᐹᑎᑦ ᐅᕙᓐᓄᑦ ᐅᖃᖏᒃᑯᕕᑦ ᐅᖃᐅᓯᕆᓚᐅᖅᑕᓕᒫᖏᓐᓂᒃ.” 18ᑍᒤᒻᒪᑦ ᓴᒧᐃᓕᐅᑉ ᐅᖃᐅᑎᓚᐅᖅᐹ ᐅᖃᐅᑎᔭᐅᑦᔪᑎᓕᒫᒥᓂᒃ ᓇᓪᓕᐊᓐᓂᒡᓘᓐᓃᑦ ᐅᖃᖅᑍᓕᒪᓇᓂ. ᐃᓔᓗ ᐅᖃᖅᐳᖅ, “ᐊᑕᓂᐅᕗᖅ; ᑖᑦᓱᒪ ᐱᐅᓂᖅᐹᖑᔪᕆᔭᓂ ᐊᑐᕐᖕᓂᐊᖅᐹ.”
19ᓴᒧᐃᓕᓕ ᐱᕈᖅᐸᓪᓕᐊᓚᐅᖅᐳᖅ, ᐊᑕᓂᐅᓪᓗ ᐃᓚᒋᓚᐅᖅᐹ ᓱᓕᑎᖃᑦᑕᓚᐅᖅᐰᓪᓗ ᓴᒧᐃᓕᐅᑉ ᐅᖃᐅᓯᕆᔭᓕᒫᖏᑦ. 20ᐃᓴᕆᐊᓕᒥᐅᑦ ᐃᓄᓕᒫᖏᑦ ᑖᓐᒥᑦ ᐱᐊᕐᓯᐸᒧᑦ ᖃᐅᔨᒪᓕᓚᐅᖅᐳᑦ ᓴᒧᐃᓕ ᐊᑕᓂᐅᑉ ᐅᖃᖅᑎᒋᓕᕐᖕᒪᒍ. 21ᐊᑕᓂᕐᓗ ᓴᖅᑭᒃᑲᓐᓂᓚᐅᖅᐳᖅ ᓮᓗᐊᒥ, ᑍᑲᓂ ᐊᑕᓂᖅ ᐃᒻᒥᓂᒃ ᓴᖅᑭᑎᓚᐅᖅᐳᖅ ᓴᒧᐃᓕᒧᑦ ᐅᖃᐅᓯᕐᖕᒥᒍᑦ.
Currently Selected:
ᓴᒧᐃᓕ ᓯᕗᓪᓖᑦ 3: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.