UNUMERI 4
4
Umsebenzi wemindeni yamaLevi ekufuduseni itende lokuhlanganela
1USomnini wakhuluma noMosi no-Aroni wathi: 2“Emadodaneni kaLevi, bala amaKhehathi ngokwemindeni nangezindlu zaboyise. 3Utlolise ukusukela kwabaneminyaka ematjhumi amathathu ukuya ematjhumini amahlanu, okutjho boke ekufuze balotjhe bebasebenze etendeni lokuhlanganela.”
AmaKhehathi
4“Naku umsebenzi wamadodana kaKhehathi etendeni lokuhlanganela endaweni ecwenge khulu: 5Lokha ikampa yama-Israyeli nayifuduswako, u-Aroni namadodanakhe kufuze bangene ngetendeni behlise isiyaya sendawo ecwenge khulu bese bembesa umfaji wobufakazi ngaso. 6Bazagubuzesa umfaji lowo ngesikhumba esitjhukiweko, godu baleke nangetjhila elihlaza komkayi koke bese bahlomela iingodo zakhona.
7“Endaweni ecwengileko, phezu kwetafula elinezikwa ezibekwa phambi kwakaZimu, abaleke itjhila elihlaza komkayi. Izikwa azihlale zisetafulenapho ngeenkhathi zoke. Ababeke phezu kwetjhilelo izitja ezihlukahlukeneko kanye neenkapho nemijeka yokuvubela umnikelo wewayini. 8Abagubuzese koke lokho ngetjhila elitlerebede bese baleka ngesikhumba esitjhukiweko ngaphezulu, bahlomele neengodo zakhona. 9Bazakuthatha itjhila elihlaza komkayi bembese ngalo ilithi leembani lokukhanyisa neembani zakhona, iincimasibani nezitjana zalo kanye nezitja zamafutha weembani abazisebenzisa kilo. 10Nje-ke ababeke ilithi leembanelo nazo zoke izitja zalo phezu kwesikhumba esitjhukiweko. Koke lokho kukhwezwe phezu kwehlaka. 11Godu bazakwendlala itjhila elihlaza komkayi phezu kwe-aldari legolide, baleke itjhilelo ngesikhumba esitjhukiweko bese balihlomela iingodo zalo. 12Abathathe zoke izitja ezisetjenziswa endaweni ecwengileko bazibeke etjhileni elihlaza komkayi, baleke ngesikhumba esitjhukiweko ngaphezulu bese bazikhweza ehlakeni. 13Abakhuphe umlotha e-aldarini bese balembesa ngetjhila elibubende. 14Babeke phezu kwe-aldarelo zoke iinsetjenziswa zalo okulotjhwa ngazo kilo. Lokhu kufaka hlangana izitja zokutjhisela itjhwalo, iimforogo, iintjhefula, izitja zokunyenyeza, iye, zoke izitja ze-aldari. Abalileke ngesikhumba esitjhukiweko bese balihlomela iingodo zalo. 15U-Aroni namadodanakhe nasele baqedile ukwembesa ipahla yendawo ecwengileko nazo zoke iinsetjenziswa zayo, nakufuzwa ikampa, amadodana kaKhehathi kufuze eze athwale ipahla. Kodwana angathinti izinto ezicwengileko zingakembeswa ukuze angafi. Lezo-ke bekuzizinto zetende lokuhlanganela amadodana kaKhehathi ebekufuze azithwale.
16“U-Elazara umsa ka-Aroni umphristi, nguye ekufuze aqaphele amafutha weembani, amakha wetjhwalo, umnikelo weenthoro wemihla ngemihla kanye namafutha wokuzesa. Godu kufuze abe nelihlo phezu kwethaberinakeli nezintweni zoke ezingaphakathi kwalo, ngitjho nakiyo yoke indawo ecwengileko kanye nezitja zayo.”
17Godu uSomnini wakhuluma noMosi no-Aroni wathi: 18“Qinisekisani bonyana indlu kaKhehathi iyagcineka hlangana namaLevi. 19-20AmaKhehathi gade angakafuzi ukungena ngendaweni ecwengileko bona alunguze izinto ezicwengileko ngitjho nanyana beyingakafuzwa ngombana bekazakufa. Ukuze ahlale agcinekile nakhu okuzakwenziwa: U-Aroni namadodanakhe abawathathe bawatjengise omunye nomunye umsebenzakhe wokuthwala izintwezo ngombana azakuhlongakala lokha natjhidela ezintweni ezicwenge khulu.”
AmaGeritjhoni
21USomnini wakhuluma noMosi wathi: 22“Godu bala amaGeritjhoni ngezindlu zaboyise nangokwemindeni. 23Utlolise ukusukela kwabaneminyaka ematjhumi amathathu ukuya ematjhumini amahlanu, okutjho boke ekufuze balotjhe bebasebenze etendeni lokuhlanganela. 24Naku umsebenzi wemindeni yamaGeritjhoni ekulotjheni nekuthwaleni imithwalo: 25Kuzakufanela bona ithwale amatjhila wethaberinakeli, itende lokulembesa, iinkhumba ezitjhukiweko ezelekwa phezu kwetendelo, itjhila lomnyango wetende lokuhlanganela, 26imilembelembe yesirhodlo, itjhila lokuvala isango lesirhodlo esizombeleze ithaberinakeli ne-aldari, iintambo zesirhodlo kanye nazo zoke iinsetjenziswa zakhona. Koke okuphathelene nokutjhwiweko kumsebenzi yemindeni yamaGeritjhoni. 27Woke umsebenzi wokuthwala uzakwenziwa maGeritjhoni ngomyalo ka-Aroni namadodanakhe. Wena-ke Mosi no-Aroni kufuze nibatjengise koke okumele bakuthwale. 28Lowo-ke kuzakuba msebenzi wemindeni yamaGeritjhoni etendeni lokuhlanganela. Imisebenzayo izakuba ngaphasi kwesandla saka-Itamara, umsa ka-Aroni umphristi.”
AmaMerari
29Godu uSomnini wathi: “AmaMerari nawo uwabale ngokwemindenawo nangezindlu zaboyise. 30Utlolise ukusukela kwabaneminyaka ematjhumi amathathu ukuya ematjhumini amahlanu, okutjho boke ekufuze balotjhe bebasebenze etendeni lokuhlanganela. 31Naku umsebenzi wamaMerari wokuthwala etendeni lokuhlanganela: Akathwale amahlaka wethaberinakeli neenqabo zawo, iinsika, amanzinziso, 32iinsika magegana nesirhodlo namanzinziso wazo, iinkhonkhwani ezibamba isirhodlo, iintambo kanye nazo zoke iinsetjenziswa zakhona. Wena Mosi no-Aroni niyitjho ngamabizo ipahla ekufuze ithwalwe madoda lawo. 33Lowo-ke kuzakuba msebenzi wemindeni yamaMerari etendeni lokuhlanganela. Imisebenzayo izakuba ngaphasi kwesandla saka-Itamara, umsa ka-Aroni umphristi.”
Ukutloliswa kwamaLevi
34UMosi no-Aroni kanye nabarholi bomkhambathi babala amaKhehathi ngokwemindeni nangezindlu zaboyise. 35Batlolisa ukusukela kwabaneminyaka ematjhumi amathathu ukuya ematjhumini amahlanu, okutjho boke ekufuze balotjhe bebasebenze etendeni lokuhlanganela. 36Abatlolisweko ngokwemindenabo baba ziinkulungwana ezimbili namakhulu alikhomba namatjhumi amahlanu. 37Leso-ke bekusibalo semindeni yamaKhehathi agade asebenza etendeni lokuhlanganela nagade atloliswe nguMosi no-Aroni. Kwaba njengombana uSomnini bekayale uMosi.
38Abatlolisweko bamaGeritjhoni ngokwemindeni nangezindlu zaboyise 39ukusukela kwabaneminyaka ematjhumi amathathu ukuya ematjhumini amahlanu, okutjho boke ekufuze balotjhe bebasebenze etendeni lokuhlanganela, 40bebaziinkulungwana ezimbili namakhulu asithandathu namatjhumi amathathu. 41Leso-ke bekusibalo semindeni yamaGeritjhoni agade asebenza etendeni lokuhlanganela nagade atloliswe nguMosi no-Aroni. Kwaba njengombana uSomnini bekayalile.
42Abatlolisweko bamaMerari ngokwemindeni nezindlu zaboyise, 43ukusukela kwabaneminyaka ematjhumi amathathu ukuya ematjhumini amahlanu, okutjho boke ekufuze balotjhe bebasebenze etendeni lokuhlanganela, 44bebaziinkulungwana ezintathu namakhulu amabili. 45Leso-ke bekusibalo semindeni yamaMerari agade asebenza etendeni lokuhlanganela nagade atloliswe nguMosi no-Aroni. Kwaba njengombana uSomnini bekayale uMosi.
46Boke ababalwako bamaLevi abatloliswa nguMosi, u-Aroni nabarholi bama-Israyeli ngokwemindeni nangezindlu zaboyise, 47ukusukela kwabaneminyaka ematjhumi amathathu ukuya ematjhumini amahlanu, okutjho boke ekufuze benze umsebenzi wokuthwala etendeni lokuhlanganela, 48bebaziinkulungwana ezibunane namakhulu amahlanu namatjhumi abunane. 49Ngokuya ngomyalo kaSomnini kuMosi, ngiloyo naloyo wanikelwa umsebenzi nalokho ekumele akuthwale etendeni lokuhlanganela njengokutloliswa kwabo. Kwaba njengombana uSomnini ayale uMosi.
Currently Selected:
UNUMERI 4: SND12
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 2012. Used with permission. All rights reserved.