Makətūbə̄ yā Jojue 21
21
Ɓē gə̄ yā ngán Lebi gə̄
(Á̰a̰ī 1 Yá̰a̰ 6.39-66)
1Ngār gə̄ kə́ dɔ gír kojə yā ngán Lebi gə̄ tə́ aw̄n̄ rɔ̄ Eleajar kə́ nge tun̄ yá̰á̰ tə́ ō, Jojue ngōn̄ Nun tə́ ō, ngār gə̄ yā gír ɓē kə́ rang gə̄ yā ngán *Israel gə̄ tə́ ō, 2kem ɓē kə́ *Silo tə́, dɔ nang kə́ Kanaan tə́, ba ədan̄də́ na: Kété ní Kɔ́ɔ̄ɓē əda Moijə kadə̄ adə̄n̄jí ɓē gə̄ kadə̄ j-ndi tū tə́ ō, loo gə̄ kə́ kə gō gidií gə̄ tām̄ yā yá̰a̰ kul̄ yājí gə̄ tə́ ō. 3Adə̄ ngán *Israel gə̄ gə̄rān̄ ɓē gə̄ kə́ dɔ nang yādə́ gə̄ tə́, kə loo gə̄ kə́ kə gō gidií gə̄ adə̄n̄ ngán Lebi gə̄ tītə̄ ń Kɔ́ɔ̄ɓē ədań ní.
4Túgə̄n̄ wə̄lā anī i de gə̄ kə́ gír kaa yā Kehat tə́ gə̄ n wə̄lā ɔjə dɔdə́ kété ní. Adə̄ núsə́ ngán Lebi gə̄ ń noō ń nin̄ i ngán kaa *Aaro̰ kə́ nge tun̄ yá̰á̰ ní, wə̄lā əhɔ ɓē kutə gidə i mətá gō nang yā de gə̄ kə́ gír ɓē yā *Juda tə́ ō, Simeo̰ tə́ ō, Benjamḛ tə́ ō adə̄də́. 5Ba gotə ngán Kehat gə̄ ní, wə̄lā əhɔ ɓē kutə dɔ nang yā de gə̄ kə́ gír ɓē yā *Epəraim tə́ ō, Dan tə́ ō, dɔ nang yā núsə de gə̄ ké gír ɓē yā Manase tə́ ō adə̄də́. 6Wə̄lā əhɔ ɓē kutə gidə i mətá gō nang yā de gə̄ kə́ gír ɓē yā Isakar tə́ ō, Aser tə́ ō, Nepətali tə́ ō, núsə de gə̄ kə́ gír ɓē yā Manase tə́ ń ndin̄ dɔ nang kə́ Basan tə́ ní ō, adə̄ ngán Gerson. 7Ngán Merari gə̄ əngen̄ ɓē i kutə gidə i jōó kə gír kaadə́ gēé dɔ nang yā de gə̄ kə́ gír ɓē yā Ruben tə́ ō, Gad tə́ ō, Jabulo̰ tə́ ō. 8Ngán Israel gə̄ túgə̄n̄ i wə̄lā n adə̄nəń ngán Lebi gə̄ ɓē gə̄ ń noō malang naā tə́ kə loo gə̄ kə gō gidií gə̄, tītə̄ ń Kɔ́ɔ̄ɓē ədań Moijə ní.
9-10Ngán kaa *Aaro̰ gə̄ ń i de gə̄ kə́ gír kaa yā Kehat kə́ ngōn̄ Lebi ní n wə̄lā ɔjə dɔdə́ kété ní. Rī ɓē gə̄ yā *Juda ō, yā Simeo̰ ō, ń adə̄n̄də́ ní n toó: 11Ta kəga dɔ i Kiryat Arba. Arba i rī kaa Anak gə̄. Rī ɓē ní kə́ ngɔlaā na i Hebron. I ɓē gō nang kə́ mbaláa yā *Juda tə́ Adə̄n̄də́ ɓē ní i naā tə́ kə dɔ nang gə̄ ń gīrə̄n̄ gidə ní. 12Ba ndɔr̄ gə̄ kə ngán ɓē gə̄ ń kə gō gidií ní, adə̄n̄ Kaleb kə́ ngōn̄ Yepune. 13Gō Hebron ń i ɓē ɓɔ̄ɔ̄ rɔ̄ kə́ tām̄ yā ngé tɔ̄l̄ de gə̄ tə́ ní, ɓē gə̄ ń adə̄n̄ ngán *Aaro̰ kə́ nge tun̄ yá̰á̰ ní i Libəna ō, 14Yatir ō, Esətemoa ō, 15Holon ō, Debir ō, 16Asan ō, Yuta ō, Bet Semes ō, adə̄ ɓē gə̄ yā *Juda ō, Simeo̰ ō ń táān̄ ní i ndōhó, naā té kə loo gə̄ kə gō gidií gə̄. 17Ɓē gə̄ yā de kə́ gír ɓē yā Benjamḛ tə́ gə̄ ń táān̄ ní i Gabaon ō, Geba ō, 18Anatot ō, Almon ō, adə̄ ɓē i sɔ́ naā tə́ kə loo gə̄ kə́ gō, gidií gə̄. 19Adə̄ ɓē gə̄ malang ń ngán *Aaro̰ kə́ *ngé tun̄ yá̰a̰ gə̄ əngen̄ ní i kutə gidə i mətá naā tə́ kə loo gə̄ kə́ kə gō gidií gə̄ tām̄ yā yá̰a̰ kul̄ gə̄ tə́.
20Wə̄lā əhɔ ɓē gə̄ kə́ dɔ nang yā *Epəraim tə́ adə̄ ngán kaa Kehat kə́ rang gə̄ kə gír kaadə́ gēé, 21ɓē gə̄ ní n toó: Sisem ń i ɓē ɓɔ̄ɔ̄ rɔ̄ kə́ gō nang kə́ mbalá yā *Epəraim tə́ ní ō, Gejer ō, 22Kibəsaim ō, Bet Horon ō, adə̄ ɓē gə̄ i sɔ́ naā tə́ kə loo kə́ kə gō gidií gə̄. 23Ɓē gə̄ kə́ dɔ nang yā Dan tə́ ń nin̄ əngen̄ ní i Elteke ō, Gibeton ō, 24Ayalon ō, Gat Rimon ō, adə̄ ɓē gə̄ ní malang i sɔ́, naā tə́ kə loo kə́ kə gō gidií gə̄. 25Ɓē gə̄ kə́ dɔ nang yā núsə de gə̄ kə́ gír ɓē yā Manase tə́ ń nin̄ əngen̄ ní i Tanak ō, Ibəleam ō, adə̄ ɓē gə̄ ní i jōó naā tə́ kə loo gə̄ kə́ kə gō gidií gə̄. 26Adə̄ ngán kaa Kehat kə́ rang gə̄ kə dɔ gír kojə yādə́ gēé əngen̄ ɓē malang i kutə kógə̄ḿ naā tə́ kə loo gə̄ kə́ kə gō gidií gə̄. 27Ɓē gə̄ ké dɔ nang yā núsə de gə̄ ké gír ɓē yā Manase tə́ ń adə̄n̄ ngán Lebi gə̄ kə́ gír kaa yā Gerson tə́ ní i Golan ń i ɓē kə́ dɔ nang kə́ Basan tə́ á i ɓē ɓɔ̄ɔ̄ rɔ̄ ní ō, Besətera ō, adə̄ ɓē gə̄ ní i jōó naā tə́ kə loo gə̄ kə́ kə gō gidií gə̄. 28Ɓē gə̄ kə́ dɔ nang yā Isakar tə́ ń əngen̄ ní i Kisiyon ō, Dabrat ō, 29Yarmut ō, En Ganim ō, adə̄ ɓē gə̄ ní i sɔ́ naā tə́ kə loo gə̄ kə́ kə gō gidií gə̄. 30Ɓē gə̄ kə́ dɔ nang yā Aser tə́ ń əngen̄ ní i Misal ō, Abədon ō, 31Helkat ō, Rehob ō, adə̄ ɓē gə̄ ní i sɔ́ naā tə́ kə loo gə̄ kə́ kə gō gidií gə̄. 32Ɓē gə̄ kə́ dɔ nang yā Nepətali tə́ ń adə̄n̄də́ ní i Kedes kə́ dɔ nang kə́ Galile tə́ ń i ɓē ɓɔ̄ɔ̄ rɔ̄ ní ō, Hamot Dor ō, Kartan ō, adə̄ ɓē gə̄ ní i mətá naā tə́ kə loo gə̄ kə́ kə gō gidií gə̄. 33Adə̄ ɓē gə̄ malang ń ngán kaa Gerson gə̄ əngen̄ kə gír kaadə́ gēé ní i kutə gidə i mətá tə́ kə loo gə̄ kə́ kə gō gidií gə̄.
34Ɓē gə̄ kə́ dɔ nang yā Jabulo̰ tə́ ń adə̄n̄ ngán Lebi kə́ rang gə̄ ń i de kə́ gír kaa yā Merari tə́ gə̄ ní i Yokəneam ō, Karta ō, 35Dimna ō, Nahalal ō, adə̄ ɓē gə̄ ní i sɔ́ naā tə́ kə loo gə̄ kə́ kə gō gidií gə̄. 36Ɓē gə̄ kə́ dɔ nang yā Ruben tə́ ń əngen̄ ní i Beser ō, Yahas ō. 37Kedemot ō, Mepat ō, adə̄ ɓē gə̄ ní i sɔ́ naā tə́ loo kə́ kə gō gidií gə̄. 38Ɓē gə̄ kə́ dɔ nang yā Gad tə́ ń adə̄n̄də́ ní i Ramot kə́ dɔ nang kə́ Galaad tə́ ń i ɓē ɓɔ̄ɔ̄ rɔ̄ ní ō, Mahanaim ō, 39Hesəbon ō, Yajer ō, adə̄ ɓē gə̄ ní i sɔ́ naā tə́ kə loo gə̄ ké kə gō gidií gə̄. 40Ɓē gə̄ ń wə̄lā əhɔ adə̄ ngán Lebi kə́ rang gə̄ ń i de kə́ gír kaa yā Merari tə́ gə̄ ní malang i kutə gidə i jōó.
41Ɓē gə̄ kə́ dɔ nang yā ngán *Israel gə̄ tə́ ń adə̄n̄ ngán Lebi gə̄ ní, malang i kutə sɔ́ gidə i sɔ́sɔ́ naā tə́ kə loo gə̄ kə́ kə gō gidií gə̄. 42Adə̄n̄də́ ɓē gə̄ ní kógə̄ḿ kógə̄ḿ i naā tə́ kə loo gə̄ kə́ gō gidií gə̄. Adə̄n̄də́ i tītə̄ ń noō malang.
43Kɔ́ɔ̄ɓē adə̄ ngán Israel gə̄ dɔ nang ń ni-ənī ndūn yā kadə̄ kaadə́ gə̄ ní malang. Nin̄ taān̄ dɔ nang ní ba ndin̄ tū tə́. 44Kɔ́ɔ̄ɓē adə̄ lápə́ya reē dɔ nang yādə́ tə́ malang tītə̄ ń ənīń ndūn adə̄ kaadə́ gə̄ ní. Ni-rāā adə̄ nin̄ tetən̄ madə̄ ba̰ā̰də́ gə̄ malang rɔ̄ɔ̄. Madə̄ ba̰ā̰də́ kógə̄ḿ kə́ asə ra ngan̄g nodə́ tə́ gətóo. 45Najə̄ kə́ majə gə̄ malang ń Kɔ́ɔ̄ɓē əda ngán *Israel gə̄ ní kógə̄ḿ ké to karī gətóo, rāān̄ yá̰a̰ malang.
Currently Selected:
Makətūbə̄ yā Jojue 21: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad