Makətūbə̄ yā Jojue 18
18
Túgə̄n̄ wə̄lā tām̄ yā gír ɓē gə̄ ń na̰yn̄ tə́ ní
1Dan ń ngán *Israel gə̄ taān̄ ɓē malang oy anī, kánə̄n̄ naā *Silo, ba udən̄ *kújə kənge naā kemeé. 2Gír ɓē gə̄ kə́ dɔ dáńdə́ tə́ ń əngen̄ dɔ nang aĺ ɓáý ní i sīrí. 3Tā anī Jojue ədadə́ na: Ā ī-ngóōī i bátə́ ndɔ̄ kə́ rá tə́ tá kadə̄ āwī ī-taāī dɔ nang ń Kɔ́ɔ̄ɓē Nə́ɓā yā kaasí gə̄ adə̄sí ní? 4Ī-gə̄raī de gə̄ mətá kə dɔ gír ɓē gēé ādə̄mī. M-ā m-ə́ládə́ kadə̄ aw̄ njə̄rān̄ dɔ nang ní tə́ kadə̄ əndān̄ ma̰ȳ dɔ nang kə́ tām̄ yā gír ɓē yādə́ gə̄ tə́ kə gōó ba tél reē ɔjəmə̄n̄ ké to i ba̰ý wa. 5Nin̄ a gángə̄n̄ dɔ nang ní gír loo sīrí. *Juda gə̄ ndin̄ dɔ nang yādə́ tə́ dām̄ mbɔ́r ɓē kə́ geleé tə́ ō, ngán kaa Jəjep gə̄ a ndin̄ dɔ nang yādə́ tə́ dām̄ mbɔ́r ɓē kə́ ko̰ó̰ tə́ ō 6Á̰a̰ī dɔ nang kə́ gán̄g naā tə́ gír loo sīrí ní ké to i ba̰ý wa, ba ī-ndangiī najə̄ kə́ dɔ tə́ makətūbūú ī-reēiń ādə̄mī. M-ā m̄-túgə̄ wə̄lā ta kum Kɔ́ɔ̄ɓē Nə́ɓā yādə́ tə́ loo ń toō tə́ laā yā kadə̄ń gír ɓē yāsí gə̄ dɔ nang gə̄ ní. 7*Ngán Lebi gə̄ əngen̄ dɔ nang dɔ dáńsí tə́ alé, tɔdɔ̄ yá̰a̰ kənge yādə́ i kəla *tun̄ yá̰a̰ tām̄ yā Kɔ́ɔ̄ɓē tə́. Ba kə́ tām̄ yā Gad gə̄ tə́ ō, Ruben gə̄ tə́ ō, núsə de gə̄ ké gír ɓē yā Manase tə́ gə̄ ō ní, əngen̄ dɔ nang yādə́ gidə bā Jurdḛ kə́ dām̄ kə́ gír ɓē tə́ kɔ̄ɔ́ ɓá. I Moijə kə́ nge kəla yā Kɔ́ɔ̄ɓē nəkɔ́ n adə̄də́ ní.
8De gə̄ ń gə̄rān̄də́ kadə̄ aw̄ əndān̄ ma̰ȳ dɔ nang ní rāān̄ rɔ̄də́ yā kaw̄. Ba pá tə́ kadə̄ aw̄n̄ ní, Jojue ədadə́ na: Āw̄ ī-njə̄rāī dɔ nang ní tə́ kə taá malang, ə̄ndāī ma̰ȳn kə gōó ké to i ba̰ý wa, ba ī-reē ə̄nīmī gotə. M-ā m̄-túgə̄ wə̄lā dɔ tə́ ta kum Kɔ́ɔ̄ɓē tə́ *Silo laā yā Kadə̄ńsí. 9De gə̄ ní aw̄ njə̄rān̄ dɔ nang ní tə́ kə taá malang. Nin̄-ndangən̄ najə̄ kə́ dɔ dɔ nang ń nin̄-gángə̄n̄ naā tə́ gír loo sīrí ní ō, ndangən̄ rī ɓē gə̄ ō, ba tél aw̄n̄ gogə́ rɔ̄ Jojue tə́ gérger kə́ *Silo tə́. 10Jojue túgə̄ wə̄lā ta kum Kɔ́ɔ̄ɓē tə́, adə̄ń ngán *Israel gə̄ núsə dɔ nang gə̄ ní. Ni-adə̄ gír ɓē gə̄ kógə̄ḿ dɔ nang gə̄ ń i kə́ tām̄ yādə́ gə̄ tə́ ní.
Dɔ nang yā Benjamḛ
11Wə̄lā kə́ túgə̄ əhɔ dɔ nang kə́ ta kəga dɔ adə̄ i de kə́ gír ɓē yā Benjamḛ tə́ gə̄ kə dɔ gír kaa yādə́ gēé. Dɔ nang yādə́ ní i dɔ dán dɔ nang yā *Juda gə̄ tə́ kə dɔ nang yā Jəjep gə̄ tə́. 12Dɔ nin̄ loo yādə́ ké dām̄ mbɔ́r ɓē ké ko̰ó̰ tə́ əla gír i bā Jurdḛ tə́, teē kadə Jeriko kə́ dām̄ mbɔ́r ɓē ké ko̰ó̰ tə́ ō, gō nang ké mbalá tə́ ō, ba aw̄ kumən kə̄ no ɓē tə́, aw̄ bátə́ ugə̄ dəla loo kə́ Bet Aben tə́. 13Ra nuú gān̄g Lujə, ba teē kadə Lujə kə́ dām̄ mbɔ́r ɓē kə́ geleé tə́ a ɓārə́n̄ na i Betel ní, gō tə́ anī risə dɔ mbal̄ ń deē ra Bet Horon kə́ ta wóĺ tə́ anī i kə̄ dām̄ mbɔ́r ɓē kə́ geleé tə́ ní ba aw̄ Atarot Adar. 14Ré deē ra mbal̄ ní tə́ anī, dɔ nin̄ ní tūr̄ rɔ̄n aw̄ kumən kə̄ mbɔ́r ɓē ké geleé tə́ aw̄ teē Kiryat Baal ń ɓārə́n̄ na i Kiryat Yearim ní, Kiryat Yearim i ɓē yā ngán *Juda gə̄. Dɔ nin̄ kə́ dām̄ kə́ no ɓē tə́ n noó.
15Dɔ nin̄ kə́ dām̄ mbɔ́r ɓē kə́ geleé tə́ ḭḭ Kiryat Yearim aw̄ kum kə̄ no ɓē tə́ aw̄ teē ta kəɓa man̄ kə́ Nepətoa tə́. 16Ḭḭ loo ń noō tə́ risə aw̄ nja mbal̄ ń ra sɔɔ̄n̄ ta naā kə wól loo kə́ Ben Hinom ní tə́. Ré deē ra wól loo yā Repay gə̄ tə́ anī, mbal̄ ní i kə̄ dām̄ mbɔ́r ɓē kə́ ko̰ó̰ tə́ Dɔ nin̄ ní un gō kadə wól loo kə́ Hinom kə gō kadə mbal̄ yā Yebus gə̄ kə́ dām̄ mbɔ́r ɓē kə́ geleé tə́, ba risə kum kə̄ nang tə́ bátə́ aw̄ ugə̄ En Rogel. 17Loo ń noō tə́ rugə rɔ̄n dām̄ mbɔ́r ɓē kə́ ko̰ó̰ tə́ ba aw̄ kum kə̄ En Semes ō, Gelilot ń ra sɔɔ̄n̄ ta naā kə róbə́ ń əta tan kə̄ dɔɔ́ ta kaw̄ kə̄ Adumim ní tə́ ō. Ḭḭ loo ń noō tə́ risə aw̄ mbal̄ yā Bohan kə́ ngōn̄ Ruben tə́. Bohan i rī ngōn̄ Ruben kə́rēý. 18Gō tə́ anī əya mbal̄ ń ra sɔɔ̄n̄ ta naā kə ndágə loo kə́ Araba ní kə̄ dām̄ mbɔ́r ɓē kə́ geleé tə́ ba teē dām̄ mbɔ́r ɓē kə́ ko̰ó̰ tə́ aw̄ ndágə loo kə́ Araba tə́. 19Dɔ nin̄ ní mān̄ kadə Bet Hogəla kə́ dām̄ mbɔ́r ɓē kə́ ko̰ó̰ tə́, aw̄ ta ngóy bā katə̄ ké dām̄ mbɔ́r ɓē kə́ ko̰ó̰ tə́, loo ń bā Jurdḛ a əsō kum bā katə̄ tə́ tū tə́ ní. Dɔ nin̄ kə́ dām̄ mbɔ́r ɓē kə́ geleé tə́ n noó. 20Dɔ nin̄ kə́ gír ɓē tə́ i bā Jurdḛ.
Dɔ nang ń ngán Benjamḛ gə̄ əngen̄ kə gír kaadə́ gēé ní n noó ō, dɔ ninə̄n gə̄ n noó ō.
21Ɓē gə̄ yā de gə̄ kə́ gír ɓē yā Benjamḛ tə́ i Jeriko ō, Bet Hogəla ō, Emek Kesis ō, 22Bet Araba ō, Semaraim ō, Betel ō, 23Abim ō, Para ō, Opəra ō, 24Kepar Amona ō, Opəni ō, Geba ō, adə̄ ɓē malang i kutə gidə i jōó, naā tə́ kə ngán ɓē gə̄ ń ndin̄ kə gō gidií ní. 25Ɓē kə́ rang gə̄ i Gabaon ō, Rama ō, Beerot ō, 26Misəpe ō, Kepira ō, Mosa ō, 27Rekem ō, Irpeel ō, Tarala ō, 28Sela ō, Elep ō, ɓē yā Yebus gə̄ ń i *Jerusalem ní ō, Gibea ō, Kiryat ō, adə̄ ɓē malang i kutə gidə i sɔ́, naā tə́ kə ngán ɓē gə̄ ń ndin̄ kə gō gidií ní.
Dɔ nang ń ngán Benjamḛ gə̄ əngen̄ kə gír kaadə́ gēé ní n noó.
Currently Selected:
Makətūbə̄ yā Jojue 18: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad