PĀ GƏ̄ 26
26
De kə́ najə̄ gətóo dɔn tə́ sāā kadə̄ Nə́ɓā rāā seneé
1Pā yā Dabid.
Kɔ́ɔ̄ɓē, ī-gān̄g sarya yāḿ,
tɔdɔ̄ m̄-rāā yá̰a̰ i kə́ gōó ō,
m-ə̄ndā kemḿ dɔí tə́ kanjə̄ kadə̄ kemḿ tɔ́sə̄m̄ ō.
2Kɔ́ɔ̄ɓē, ə̄ndā ma̰ȳḿ ō ī-nāām̄ ō,
á̰á̰ gír̄ kə́ kemḿ tə́ ō.
3Kem majə yāí to i kə̄ ndágá ta kumḿ tə́ ō,
m̄-rāā yá̰á̰ kə́ rɔ̄kum yāí gə̄ ō.
4M-ə́hɔ loo rɔ̄ ngé sor̄ gə̄ tə́ aĺ ō,
m-ə̄ndā njaḿ ɓē yā ngé gól̄ loo gə̄ tə́ aĺ ō.
5M-á̰a̰ ɓūtə̄ ngé rāā majaĺ gə̄ kə kum sə̄ɓāá ō,
m-ə́hɔ loo rɔ̄ ngé kem ndul gə̄ tə́ aĺ ō.
6Kɔ́ɔ̄ɓē, m̄-tə́go jīḿ m-ɔ́jəń kadə̄ najə̄ gətóo dɔḿ tə́,
yā kadə̄ m̄-njə̄rań kə gō gidə loo tun̄ yá̰a̰ yāí
7yā kədaīń na m̄-ger̄ majə kə́ ī-rāā seḿ ō,
yā kɔjəń gotə yá̰á̰ kə́ to kɔr kum gə̄ malang ń ī-rāā ní ō.
8Kɔ́ɔ̄ɓē, kújə́ ń ī-ndi kemeé ní nelə̄m̄ ō,
loo ń kɔsə gɔn yāí i tū tə́ ní nelə̄m̄ ō.
9Ī-lōō ɓoo jīḿ naā tə́ kə ngé rāā majaĺ gēé.
Ī-lōō ɓoo jīḿ naā tə́ kə ngé tɔ̄l̄ de gēé.
10Yá̰á̰ kə́ to yḛr kum tákə̄ jīdə́ ō,
nar kə́ kəndā jī naā tə́ rosə jī ko̰də́ ō.
11m̄-rāā yá̰a̰ malang kə gōó majə.
Ní ɓɔ́, ī-gān̄g dɔḿ!
12m̄-rā i dɔ loo kə́ ngan̄g majə tə́,
adə̄ m-ā m̄-tɔ̄ȳ Kɔ́ɔ̄ɓē dan ngé kán̄ naā gə̄ tə́.
Currently Selected:
PĀ GƏ̄ 26: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.