PĀ GƏ̄ 139
139
Kɔ́ɔ̄ɓē, ī-ger̄ najə̄ kə́ dɔḿ tə́ malang
1Pā kə́ kem makətūbə̄ yā ngār yā gōsə̄ gə̄ tə́. I pā yā Dabid.
Kɔ́ɔ̄ɓē, ḭ̄ á̰a̰ loo bátə́ téē kemḿ tə́ ō,
ī-ger̄ najə̄ kə́ dɔḿ tə́ malang ō.
2Ī-ger̄ ta ndiḿ kə̄ nang tə́ ō, ta kḭḭḿ kə̄ dɔɔ́ ō.
Yá̰á̰ ń m̄-sāā rāā ní, ḭ̄ ī-ger̄ kété kɔ̄ɔ́ ɓá.
3Ré mā i ndágá aláa kújú anī, ḭ̄ ī-ger̄ kɔ̄ɔ́ ō,
ī-ger̄ yá̰a̰ rāāḿ gə̄ malang ō.
4M-ə́da najə̄ kógə̄ḿ aĺ ɓáý gə̄gē anī,
najə̄ ń m̄-sāā kɔr̄ ní, ḭ̄ ī-ger̄ kɔ̄ɔ́ malang.
5Ḭ̄ i gōḿ tə́ ō noḿ tə́ ō, ə̄ndā jīí dɔḿ tə́ ō.
6I yá̰a̰ ger̄ kə́ to loo mundə̄ tə́ kə́ tɔȳ dɔḿ,
i dɔɔ́ sa̰y ngá̰ý adə̄ m-ásə kugə̄ gō tə́ alé!
7I loo kə́ rá n kə m-āw̄ tū tə́ tá mā i sa̰y rɔ̄í tə́ ní?
I loo kə́ rá n kə m-ā̰ȳ m-āw̄ tū tə́ tá
mā i sa̰y ta kumií tə́ ní?
8Ré m-āw̄ i dɔ rā̰ tə́ a ḭ̄ i noó ō,
ré m̄-to i ɓádá a ḭ̄ i noó ō!
9Ré m-ḭ́ḭń i bɔ̄gə̄ ta gír loo tə́
yā kaw̄ń ta ngóy dɔ nang tə́ gə̄gē anī,
10jīí ɔrəm̄ ta róbə, jī ko̰í əya̰m̄ dɔɔ́ alé.
11Ré m-ə́da na kə loo kə́ risə til nding kə utə̄ dɔḿ,
loo kə́ unjə̄ kow dɔḿ tə́ kə tél loo kə́ ndɔ̄ɔ́ anī,
12ta kumií tə́ ní loo kə́ risə til nding ndul aĺ ō,
loo kə́ ndɔ̄ɔ́ unjə̄ tītə̄ loo kə́ kadaá ō, loo kə́ risə til nding
unjə̄ kow ō.
13I ḭ̄-n ī-rāā nga dan wurəḿ ní,
i ḭ̄ n ī-rɔ́tə̄m̄ ta naā tə́ kem kó̰ó̰ḿ tə́ ní.
14Kɔ́ɔ̄ɓē, m̄-tɔ̄yī tɔdɔ̄ ī-rāā dā̰ rɔ̄ḿ adə̄ majə to ɓōĺ ngá̰ý.
Yá̰a̰ rāāí to kɔr kum ngá̰ý adə̄ m̄-ger̄ majə.
15Dan ń ī-rāām̄ loo mundə̄ tə́ á,
ī-rɔ́tə̄m̄ ta naā tə́ kem kó̰ó̰ḿ tə́ ní,
dām̄ looḿ kə́rēý kə́ kumií əsō dɔ tə́ aĺ gətóo.
16Kó̰ó̰ḿ un i mósə́ḿ ɓáý anī ḭ̄ á̰a̰m̄ kɔ̄ɔ́.
Ḭ̄ ī-ndang ndɔ̄ḿ gə̄ malang kem makətūbə̄ yāí tə́
kété ta kadə̄ ndɔ̄ gə̄ ní əlan̄ gír ɓáý.
17Yá̰a̰ gə̄ ń ī-nóm̄ rāā ní loo ger̄də́ ngan̄g ngá̰ý tām̄ yāḿ tə́,
kutədə́ i ngá̰ý.
18m̄-sāā tə́dádə́ tā ba kutədə́ tɔȳ kutə nán̄g ngárə̄ḿnjēý.
m̄-ndól̄ anī mā i seí ɓáý to̰.
19Nə́ɓā, majə kadə̄ ī-tɔ̄l̄ de kə́ nge kem ndul kɔ̄ɔ́!
Sḭḭ̄ ngé ɓōkə́ mósə de gə̄ nang tə́ gə̄, āwī sa̰y kɔ̄ɔ́ rɔ̄ḿ tə́.
20Madə̄ ba̰ā̰í gə̄ unən̄ rīí yā góləń loo,
nin̄ ɓārə́n̄ rīí yā rāań yá̰á̰ kə́ majaĺ kə de gēé.
21Kɔ́ɔ̄ɓē, ngé kimí gə̄ ní loo kadə̄ m-īm̄də́ aĺ i ba̰ý?
ngé rɔ̄ɔ̄í gə̄ ní loo kadə̄ m̄-kídə̄də́ aĺ i ba̰ý?
22M-īm̄də́ majə kə nja ngáāá.
Nin̄ télən̄ i madə̄ ba̰ā̰ḿ gə̄.
23Nə́ɓā, ə̄ndā ma̰ȳḿ ō, á̰a̰ ngarā̰ kemḿ ō,
ī-ger̄ najə̄ kə́ dɔḿ tə́ malang ō.
Ī-nāām̄ ba ī-ger̄ gír̄ kə́ kemḿ tə́ gə̄.
24Á̰a̰ā̰ ké m-ún gō ɓesə̄ gə̄ wa,
ɔ́rəm̄ ta róbə ādə̄ m̄-njə̄rā dɔ róbə́ kə́ jóó ń
i róbə yāí ní tə́.
Currently Selected:
PĀ GƏ̄ 139: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.