JOB 16
16
Najə̄ ń Job tūr̄ əda kə tɔ́gɔ́ ní, əda na de kə́ kum tə́ yān na ndi dɔ rā̰ tə́ noō
1Anī Job ɔr̄ najə̄ əda na:
2M-ōō najə̄ kə́ tītə̄ ń noō nja i ngá̰ý.
Sḭḭ̄ malang i ngé sɔl̄ kem de gə̄ kə́ ī-njə́ɓāī loo ngá̰ý.
3Sḭḭ̄ ə́damī na: Najə̄ kə́ kanjə̄ kumən gə̄ ń noō gíŕdə́ a gān̄g i rə́ngáý tə́ ō,
i rí kə́ tōr̄ rɔ̄ḿ n ɔsə seḿ ta tūr̄ kəda beé ō ní.
4Ré yá̰á̰ ń rāām̄ toó i sḭḭ̄ n rāāsí anī,
mā m-ā m-ɔ̄r̄ najə̄ i tītə̄ yāsí beé ō.
M-ā m-ɔ́y najə̄ gə̄ kə̄ naā tə́ yā kɔr̄ sesí majə ngá̰ý ō,
m-ā m̄-wél̄ dɔḿ yā kɔjəń kadə̄ kumḿ o̰o̰m̄ ō,
5m-ā m-ə́la go̰ kemsí tə́ kə najə̄ kə́ taḿ tə́ ō,
taḿ kə́ hɔɔ́lɔ̄ a tél i dáwá kə́ nge rāā kadə̄ kemsí tetə kə̄ nang tə́ ō.
6Ré m-ɔ̄r̄ najə̄ anī, rɔ̄ tōr̄ yāḿ dəba sḛ́ý aĺ ō,
m̄-ndi i taḿ mbóo anī, ni əya̰m̄ aĺ ō.
7Kə́ rɔ̄kum tə́ ɓáa, Nə́ɓā taā tɔ́gə́ḿ malang kɔ̄ɔ́.
De gə̄ ń ndin̄ gīrə̄n̄ gidəḿ ní, ni nujə sedə́ malang kɔ̄ɔ́.
8Dɔ kumḿ ń ī-rāā adə̄ sá̰ā̰ kīdə́ ní tél i yá̰á̰ kə́ kum tə́ yāḿ.
Kun̄g ń m-ūn̄g ní sekə́m̄ ō, əndā najə̄ dɔḿ tə́ ō.
9A̰á̰ā̰, ni ngɔ̄də̄ gōḿ kə wōngōó yā rə́yā̰m̄ naā tə́,
ni ngor gɔgən mur mur dɔḿ tə́,
madə̄ ba̰ā̰ḿ əndā kumən kə́ saan pírírí dɔḿ tə́.
10Ta de gə̄ ra kə wōyōó dɔḿ tə́.
Nin̄ əndan̄ mbɔ́rə́ḿ ō, tájə̄mə̄n̄ ngá̰ý ō, kánə̄n̄ naā kə̄ dɔḿ tə́ ō.
11Nə́ɓā əlam̄ kem jī ngōn̄ kə́ dūú kə́ kur̄ dɔn gətóó tə́.
Ni əlam̄ kem jī de kə́ ngé rāā yá̰a̰ gōtə́ aĺ ngá̰ý gə̄ tə́.
12m̄-ndi loo yāḿ jəke anī, ni-reē mbərem̄,
əhɔm̄ gə́ra gōḿ tə́ ō, nujə seḿ sák sák kɔ̄ɔ́ ō,
gō tə́ anī rāām̄ i yá̰á̰ kə́ yā kadə̄ ni ser kə gərā yān gēé tə́.
13Kum gərā yān gə̄ ń ni túr̄də́ ní gīrə̄n̄ gidəḿ əlan̄ ta naā tə́ gejə.
Ni túrə̄m̄ kə kum gərā yān gēé,
adə̄ kum gərā ɔsə dūnə̄ḿ teē dām̄ kə́rēý tə́
kanjə̄ kadə̄ ni-a̰a̰ kum tō ndoō yāḿ ō, ni-rāā adə̄ ɗa̰ýḿ də̄yā̰ nang tə́ ō.
14Ni-əla ngɔ̄də̄ dɔḿ tə́ tītə̄ nge rɔ̄ɔ̄ kógə̄ḿ ō,
ni əndam̄ ō, adə̄m̄ do ba tél adə̄m̄ do ɓáý to̰ ō.
15M-ūr̄ kūbə̄ kəhɔ ndoō#16.15 Kūbə̄ kəhɔ ndoō: I kūbə̄ kə́ ndo̰ō̰ huyuyu, i kūbə̄ sákə̄. m-ə́la rɔ̄ḿ tə́ m-ūtəń tə́re doo gə̄ ō,
m-ə́la nɔtə noḿ kum bumbə́rú tə́ ō#16.15 Nɔtə nɔ kə́ kəla kum bumbə́rú tə́, ɔ́jə i kadə̄ loo kə́ bo yā deē ō, tɔ́gə deē ō i kə́ gətóo kɔ̄ɔ́..
16m̄-nōō ngá̰ý adə̄ kumḿ kərē kátə́ kátə́ ō,
deē a̰a̰ yo dɔ kumḿ tə́ ger̄ ō.
17Tá jīḿ rāā yá̰á̰ kógə̄ḿ kə dɔ́nɔ́ aĺ ō,
ndɔ̄ȳ yāḿ i kə́ unjə̄ njáý njáý ō.
18Dɔ nang, ɓɔ́ ī-lōō kəga nán̄g kutə̄ń dɔ mósə́ḿ,
ādə̄ de gə̄ oōn̄ kɔŕ yāḿ kə̄ loo gə̄ tə́#16.18 K. 18: Kété ní taān̄ kem kadə̄ mósə de kə́ tɔ̄l̄nən̄ ba əgan̄ nang dɔ tə́ aĺ ní, i mósə́ kə́ a əga kɔŕ kə̄ dɔ Nə́ɓā tə́ ō, gḛy kadə̄ rāān̄ ba̰ā̰n ō.!
19Əla gír ngɔlaā ní, de kə́ kum tə́ yāḿ kógə̄ḿ i dɔ rā̰ tə́ noō.
A̰á̰ā̰, m-āw̄ kə deē kógə̄ḿ dɔɔ́ noō kə́ ni i nge kəda najə̄ kə́ kum tə́ yāḿ.
20Madə̄ taḿ gə̄ mbóon̄ seḿ,
banī m-á̰a̰ loo kə̄ rɔ̄ Nə́ɓā tə́ i kə man̄ nōó kumḿ tə́.
21Ādə̄ de kə́ kum tə́ yāḿ tɔ̄tə̄n̄ naā dɔ najə̄ tə́ kə Nə́ɓāá tām̄ yā deē tə́,
tītə̄ ń deē a rɔ̄ɔń dɔ deē ndul madə̄n tə́ ní.
22A̰á̰ā̰, ādə̄ ni-əla tan tū tə́, tɔdɔ̄ ndɔ̄ḿ gə̄ i kə́ tə́dan̄ kɔ̄ɔ́ ō,
m-ā m-āw̄ i kə̄ dɔ róbə́ kə́ deē ugə̄ tū tə́ a, a tél to̰ aĺ ō.
Currently Selected:
JOB 16: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.