JOB 1
1
Yá̰a̰ kə́ ta kəga dɔ ń nāā Job ní
1Kété ní dəngam kógə̄ḿ ndi dɔ nang kə́ Us tə́, a ɓāŕnən̄ na i Job. Ni i de kə́ najə̄ gətóo dɔn tə́. I de kə́ súmūú ō, i de kə́ ɓōĺ ndíĺ Nə́ɓā ō, i de kə́ nge mbātə́ rāā yá̰á̰ kə́ majaĺ ō. 2Ngánən kə́ dəngam gə̄ i sīrí ō, kə́ dəyá̰ gə̄ i mətá ō. 3Batə̄ yān gə̄ i dūbú sīrí ō, jámbal gə̄ i dūbú mətá ō, man̄g gə̄ kə́ kadə naā tə́ jōó jōó i ɓú mí ō, kó̰o̰ kərō gə̄ i ɓú mí ō, ngé kəla yān gə̄ i ngá̰ý ō. Deē ngeé ń toō i de kə́ bo tɔȳ gotə de gə̄ malang kə́ dām̄ kə́ gír ɓē tə́.
4Ngánən kə́ dəngam gə̄ ḭḭn̄ ɓáa a aw̄n̄ i ɓē naá kəsa yá̰á̰ kə́ rāā ngá̰ý tītə̄ yá̰a̰ kəsa kə́ ndɔ̄ pétə́ tə́ beē. Nin̄ a rāān̄ yá̰a̰ kəsa ní i kə ndɔ̄n yādə́ gēé, ba a ɓārə́n̄ ngákó̰ó̰də́ kə́ dəyá̰ kə́ mətá gə̄ loo kəsa yá̰á̰ ní tə́ kadə̄ əsan̄ sedə́ ō, a̰ȳn̄ yá̰a̰ sedə́ ō. 5Ré əsan̄ yá̰á̰ gír gān̄g anī, Job ɓāŕdə́, ba rāā yá̰á̰ kə́ yā kunəń majaĺ dɔdə́ tə́ kɔ̄ɔ́ kadə̄ nin̄-unjə̄n̄neé njáý njáý. Ni a ḭḭ dɔɔ́ i kə gír looí ɓatə yā ndējə̄ Nə́ɓā yá̰a̰ tun̄ kə́ róō horoó kə taá tām̄ yā ngánən gə̄ tə́ kógə̄ḿ kógə̄ḿ. Tɔdɔ̄ ni-əda kə̄ kemən tə́ na: Majanī ngánə́ḿ gə̄ rāān̄ yá̰á̰ kə́rēý kə́ gōtə́ aĺ, aláa ndɔ̄lə́n̄ Nə́ɓā kemdə́ tə́! Job a rāā i beé dejə.
6Ndɔ̄ kógə̄ḿ tə́ anī de gə̄ kə́ dɔ rā̰ tə́ yā Nə́ɓā reēn̄ kɔjə Kɔ́ɔ̄ɓē gotə yá̰a̰ gə̄ ń rāān̄ yá̰á̰ tə́ ní, anī Sətan, nge sekə́ de gə̄, reē ra ta kum Kɔ́ɔ̄ɓē tə́ sedə́ ō. 7Kɔ́ɔ̄ɓē dəjən na: Ḭ́ḭ i rá? Anī ni-tél əda Kɔ́ɔ̄ɓē na: M-ḭ́ḭ i njə̄rāá dɔ nang tə́. 8Anī Kɔ́ɔ̄ɓē dəjən na: Á̰a̰ nge kəla yāḿ Job a? De kə́ tītə̄n gətóo dɔ nang tə́. Ni i de kə́ najə̄ gətóo dɔn tə́ ō, i de kə́ súmūú ō, i de kə́ ɓōĺ ndíĺ Nə́ɓā ō, i de kə́ nge mbātə́ rāā yá̰á̰ kə́ majaĺ ō. 9Banī nge sekə́ de gə̄ tél əda Kɔ́ɔ̄ɓē na: Job ɓōĺ ndíĺ Nə́ɓā i gíŕ yá̰á̰ kógə̄ḿ tə́ aĺ bátə́ a? 10Ḭ̄ ə̄nī ndogə̄ kógə̄ḿ dɔn tə́ ī-ngɔ̄mnəń ō, ī-ngɔ̄məń de kə́ ta kújə yān tə́ gə̄ ō, yá̰a̰ kənge yān gə̄ ō aĺ a? Ḭ̄ ī-rāā adə̄ kəla yān teē yá̰a̰, adə̄ yá̰a̰ kul̄ yān gə̄ taān̄ loo kem ɓēé malang. 11Banī ī-nāā kəla jīí kɔdəń yá̰a̰ kənge yān á̰a̰ā̰, mā m̄-ger̄ majə kadə̄ a ra ta kumií tə́ yā ndɔ̄líiń. 12Anī Kɔ́ɔ̄ɓē tél əda nge sekə́ de gə̄ na: Majə, yá̰a̰ kənge yān malang ní, m-ə́ya̰ m-ādə̄ ī-rāań yá̰á̰ ń kemií ndigə ni. Ba ī-lōō kəla jīí kɔdəń rɔ̄n.
Loo ń noō tə́ nge sekə́ de gə̄ ɔtə kɔ̄ɔ́ ta kum Kɔ́ɔ̄ɓē tə́.
13Ndɔ̄ kə́rēý tə́ ngáń Job kə́ dəngam gə̄ ō, kə́ dəyá̰ gə̄ ō, ndi a əsan̄ yá̰a̰ ō, a a̰ȳn̄ kasə nduú ō, ɓē ngōkó̰ó̰də́ kə́ nga tɔ́gɔ́, 14anī ngōmbang kəla kógə̄ḿ reē əda Job na: Man̄g gə̄ ra a ndɔrə̄n̄ ō, kó̰o̰ kərō gə̄ ran̄ kadədə́ tə́ a əsan̄ mu ō, 15anī de kə́ Saba tə́ gə̄ əhɔn̄də́ aw̄n̄ sedə́ kɔ̄ɔ́ ō, tɔ̄lə̄n̄ ngé kəla yāí gə̄ kə kaskaraá kɔ̄ɔ́ ō. I mā ngóy n m̄-teē á m̄-reē kadə̄ m-ə́daī ní.
16Ngōmbang kəla ní a ɔr̄ najə̄ kə̄ tan tə́ ɓáý anī, nge kə́ rang reē əda na: Man̄ ndang batə̄ gə̄ ō, ngé kəla yāí gə̄ ō, əla hor dɔdə́ tə́ adə̄ hor ní o̰o̰də́ malang ō. I mā ngóy n m̄-teē á m̄-reē kadə̄ m-ə́daī ní.
17Ni a ɔr̄ najə̄ kə̄ tan tə́ ɓáý anī, nge kə́ rang reē əda na: De kə́ Kalde tə́ gə̄ kə́ ɓūtə̄də́ gír i mətá reē əhɔn̄ jámbal gə̄ aw̄n̄neé ō, tɔ̄lə̄n̄ ngé kəla yāí gə̄ malang kɔ̄ɔ́ kə kaskaraá ō. I mā ngóy n m̄-teē á m̄-reē kadə̄ m-ə́daī ní.
18Ni a ɔr̄ najə̄ kə̄ tan tə́ ɓáý anī, nge kə́ rang reē əda na: Ngání kə́ dəngam gə̄ ō, kə́ dəyá̰ gə̄ ō, ndi a əsan̄ yá̰a̰ ō, a a̰ȳn̄ kasə nduú ō, ɓē ngōkó̰ó̰də́ kə́ nga tɔ́gɔ́, 19anī nél balway kógə̄ḿ kə́ əla kə tɔ́gɔ́ ḭḭ dām̄ kə́ mángá tə́, reē mbəre kújə dām̄ kílən kə́ sɔ́ gə̄ tə́, adə̄ əsō dɔ ngání kə́ balsáa gə̄ ō kə́ mandə gə̄ ō tə́, adə̄ oyn̄ malang. I mā ngóy n m̄-teē á m̄-reē kadə̄ m-ə́daī ní.
20Anī Job ḭḭ dɔɔ́, əhɔ ta kūbə̄ kə́ dɔ madə̄ gə̄ tə́ kə́ rɔ̄n tə́ rə̄yā̰ ō, dəsā dɔn ō. Gō tə́ anī əsō sébə kumən nang tə́ 21ba əda na: m̄-teē kem kó̰ó̰ḿ tə́ i rɔ̄ḿ karī ō, m-ā m̄-tél yā kaw̄ gíŕ nángāá i rɔ̄ḿ karī ō. Kɔ́ɔ̄ɓē adə̄ ō, Kɔ́ɔ̄ɓē taā kɔ̄ɔ́ ō. Ādə̄ de gə̄ tɔ̄ȳn̄ rī Kɔ́ɔ̄ɓē.
22Tū yá̰a̰ gə̄ ń noō tə́ malang ní, Job rāā majaĺ aĺ ō, əndā najə̄ kógə̄ḿ dɔ Nə́ɓā tə́ aĺ ō.
Currently Selected:
JOB 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.