ESDRAS 1
1
Mban̄g Sirus ndigə kadə̄ tél rāān̄ kújə yā Kɔ́ɔ̄ɓē gogə rang
1Kem ɓāl̄ kə́ ta kəga dɔ ń Sirus ndiń mban̄g dɔ ɓē ko̰o̰ kə́ Persə tə́ ní, Kɔ́ɔ̄ɓē gḛy rāā yá̰á̰ ń ni-əndā ta Jeremi nge koō ta tə́ adə̄ əda kété ní. Ni ndól̄ hángal Sirus mban̄g kə́ Persə kadə̄ ənī mbēr̄ ō, ndang makətūbə̄ ō, yā kədań de kə́ kem ɓē ko̰o̰ yān tə́ gə̄ malang na: 2Sirus mban̄g kə́ Persə ɔr̄ najə̄ i beé, əda na: Kɔ́ɔ̄ɓē, Nə́ɓā kə́ dɔ rā̰ tə́, adə̄m̄ ɓē ko̰o̰ gə̄ malang kə́ dɔ nang tə́ ō, nəkɔ́ əndā kəla rāā kújə́ kógə̄ḿ dɔḿ tə́ kadə̄ m̄-rāā m-ādə̄n kem ɓē kə́ Jerusalem kə́ Juda tə́ ō. 3Ní i náā kə́ dansí tə́ n i de kə́ gírən teē dan deē yān gə̄ tə́ ní, anī ādə̄ Nə́ɓā yān i seneé, ba ādə̄ aw̄ Jerusalem kə́ Juda tə́ aw̄ rāā kújə yā Kɔ́ɔ̄ɓē Nə́ɓā yā Israel, adə̄ i Nə́ɓā ń ndi Jerusalem ní. 4Loo malang ń gotə ngán Israel gə̄ ndin̄ tū tə́ ní, ādə̄ de kə́ loo ní tə́ gə̄ adə̄n̄də́ kadə̄ karī gə̄ kə́ rāān̄ kə gində̄ arjā̰a̰á̰ ō, kə lɔ́rɔ́ ō, yá̰a̰ kənge kə́ rang gə̄ ō, yá̰a̰ kul̄ gə̄ ō, yá̰a̰ ndējə̄ kə́ kadə̄ kə gō kem ndigií gə̄ ō, tām̄ yā kújə yā Nə́ɓā kə́ Jerusalem tə́.
5Loo ń noō tə́ ngār gə̄ kə́ dɔ de kə́ gír kojə yā Juda tə́ gə̄ ō, Benjamḛ tə́ gə̄ ō, ngé tun̄ yá̰a̰ gə̄ ō, ngán Lebi gə̄ ō, de gə̄ malang ń Nə́ɓā ndól̄ hángaldə́ kadə̄ aw̄n̄ Jerusalem yā rāā kújə yā Kɔ́ɔ̄ɓē tə́ ní, rāān̄ gō rɔ̄də́ yā kaw̄. 6Madə̄ ɓēdə́ gə̄ rāān̄ sedə́, adə̄n̄də́ ngáń gájə́ yá̰a̰ rāā kəla gə̄ kə́ rāān̄ kə gində̄ arjā̰a̰á̰ ō, kə lɔ́rɔ́ ō, yá̰a̰ kənge kə́ rang gə̄ ō, yá̰á̰ kə́ tayā tayā gə̄ kə́ gātə̄də́ i ngá̰ý gə̄ ō, yá̰a̰ kul̄ gə̄ ō, adə̄n̄də́ yá̰a̰ ndējə̄ gə̄ kə́ nin̄ kɔ́ gə̄ adə̄n̄ kə gō kem ndigə̄ yādə́ tām̄ yā kújə yā Kɔ́ɔ̄ɓē tə́ ō.
7Yá̰a̰ gə̄ kə́ kem kújə yā Kɔ́ɔ̄ɓē tə́ ń Nabukodonosor ɔy Jerusalem aw̄ tə́ndā kem kújə yā nə́ɓā yān gə̄ ń i ɓesə̄ yān gə̄ ní tə́ ní, mban̄g Sirus adə̄ tél sāān̄ nja náḿ naḿ. 8Mban̄g Sirus adə̄ Mitəredat nge ngɔ̄m̄ nar ɔy kɔ̄ɔ́ kem kújə́ ní tə́ ba téləń adə̄ Sesəbasar ngōn̄ ngār kə́ Juda tə́. 9Yá̰a̰ gə̄ ní n toó: Səmbē lɔ́ŕ kə́ laa gə̄ i 30. Səmbē arjā̰a̰ kə́ laa gə̄ i 1 000. Kəyā i 29. 10Səmbē lɔ́ŕ kə́ rúu gə̄ i 30. Səmbē arjā̰a̰ kə́ rúu gə̄ kə́ utə̄n̄ gō madə̄ gə̄ i 410. Yá̰á̰ kə́ rang gə̄ i 1 000. 11Yá̰a̰ malang kə́ rāā kə lɔ́rɔ́ ō, kə arjā̰a̰á̰ ō, i 5 400. Sesəbasar ɔy malang aw̄ń Jerusalem dan ń ngán Israel gə̄ teēn̄neé ɓəloó kɔ̄ɔ́ kem ɓē kə́ Babilon tə́ ní.
Currently Selected:
ESDRAS 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.