2 YÁ̰A̰ GƏ̄ 34
34
Josias o̰o̰ ɓē ō, tūr̄ gíŕ yá̰a̰ gə̄ ō
(Á̰a̰ī 2 Mba 22.1-2; 23.4-20)
1Dan ń Josias ndi mban̄g ní ɓālə̄n i sɔ́sɔ́. Ni o̰o̰ ɓē Jerusalem ɓāl̄ kutə mətá gidə i kógə̄ḿ. 2Ni-rāā yá̰á̰ kə́ súmūú ta kum Kɔ́ɔ̄ɓē tə́. Un i gō tóo kaan Dabid kanjə̄ tɔ̄ɔ̄ geleé aké ko̰ó̰.
3Kem ɓāl̄ ko̰o̰ ɓē yān kə́ nge ko̰ sɔ́sɔ́ tə́, adə̄ dan ń ni i son̄g deē ɓáý ní, əla gír sāā Nə́ɓā yā kaan Dabid. Ba kem ɓāl̄ ko̰o̰ ɓē yān kə́ nge ko̰ kutə gidə i jōó tə́ anī, ni nujə loo ndɔ̄ȳ gə̄ ō, ró̰ȳ ɓesə̄ kāgə̄ kə́ túdə̄ gə̄ kɔ̄ɔ́ ō, ɓesə̄ kāgə̄ kə́ tɔ́sə̄ kə́ yā ɓōĺ gidə gə̄ ō, ɓesə̄ gində̄ kə́ nō horoó gə̄ ō ní ni nujəń kɔ̄ɔ́. 4Loo tun̄ yá̰a̰ gə̄ ń a tunə̄n̄ yá̰a̰ dɔ tə́ adə̄n̄ ɓesə̄ Baal gə̄ ní, nujən̄neé kɔ̄ɔ́ i ta kumən tə́ ō. Ni nujə loo róō ndujə̄ yá̰á̰ kə́ kotə majə gə̄ kə́ dɔ loo tun̄ yá̰a̰ gə̄ ní tə́ kɔ̄ɔ́ ō. Jén̄g kāgə̄ ɓesə̄ kə́ túdə̄ gə̄ ō, kāgə̄ ɓesə̄ kə́ tɔ́sə̄ kə́ yā ɓōĺ gidə gə̄ ō kɔ̄ɔ́. Ɓesə̄ gində̄ kə́ nō horoó gə̄ ní, ni nujəń kɔ̄ɔ́ ō. Ni tétə̄də́ rárák ba seĺ butə̄də́ dɔ ɓádə de gə̄ ń tunə̄n̄ yá̰a̰ gə̄ adə̄n̄də́ ní tə́. 5Josias róō kə̄ngā ngé tun̄ yá̰a̰ gə̄ dɔ loo tun̄ yá̰a̰ yādə́ gə̄ tə́. Ni tə́go ɓē kə́ Jerusalem ō, ɓē ko̰o̰ kə́ Juda ō, adə̄ unjə̄ njáý njáý i tītə̄ ń noō. 6Ni aw̄ kem ɓē gə̄ yā Manase tə́ ō, Epəraim tə́ ō, Simeo̰ tə́ ō, ɓē gə̄ kə́ Nepətali tə́ gə̄gē, aw̄ gō nang gə̄ kə́ kadədə́ gə̄ tə́ ō. 7Aw̄ nujə loo tun̄ yá̰a̰ gə̄ ō, kāgə̄ ɓesə̄ kə́ yā ɓōĺ gidə kə́ túdə̄ gə̄ ō, ɓesə̄ kə́ rang gə̄ ō ní, ni tétə̄də́ rárák adə̄ ojən̄ butə̄ bét bét ō, nujə loo róō ndujə̄ yá̰á̰ kə́ kotə majə gə̄ kə́ dɔ nang kə́ Israel tə́ malang kɔ̄ɔ́ ō. Gō tə́ anī tél dɔ tə́ reē gogə́ Jerusalem.
Ngol ngé tun̄ yá̰a̰ gə̄ teē dɔ makətūbə̄ ndū najə̄ tə́
(Á̰a̰ī 2 Mba 22.3-10)
8Kem ɓāl̄ ko̰o̰ ɓē yā Josias kə́ nge ko̰ kutə gidə i sɔ́sɔ́ tə́ ní, dan ń Josias tə́go ɓē ō, kújə yā Kɔ́ɔ̄ɓē ō oy anī, ni-əla Sapan ngōn̄ Asalia ō, Maseya ngār kem ɓē ō, Yoa kə́ ngōn̄ Yoakaj ń i ngōmbang kəla yā mban̄g ní ō, kadə̄ aw̄ rāān̄ loo kújə yā Kɔ́ɔ̄ɓē Nə́ɓā yān kə́ nujə kɔ̄ɔ́ gə̄. 9De gə̄ ní reē adə̄n̄ Hilkia ngol ngé tun̄ yá̰a̰ gə̄ nar kə́ reēń kem kújə yā Kɔ́ɔ̄ɓē tə́ ń ngán Lebi kə́ ngé ngɔ̄m̄ ta róbə kújə, gə̄ taān̄ jī Manase gə̄ tə́ ō, Epəraim gə̄ tə́ ō, gotə Israel gə̄ tə́ ō, Juda gə̄ tə́ ō, Benjamḛ gə̄ tə́ ō, de kə́ Jerusalem gə̄ tə́ ō ní. 10Télən̄ kə nar ní adə̄n̄ ngé kə́ dɔ kəla tə́ gə̄ ń a rāān̄ loo kə́ nujə gə̄ kə́ tū kújə yā Kɔ́ɔ̄ɓē tə́ ní adə̄ rāān̄neé loo kə́ nujə gə̄ kə́ tū kújə yā Kɔ́ɔ̄ɓē tə́. 11I beé n télən̄neé kə nar ní adə̄n̄ ngé kəja kāgə̄ gə̄ ō, ngé kəndā kújə gə̄ ō, kadə̄ mangən̄neé mbal̄ kə́ tə́gā kadə gə̄ ō, kāgə̄ kə́ njár̄ gə̄ ní ō, yā rāań kújə́ kə́ rang gə̄ ń mban̄g kə́ Juda tə́ gə̄ əya̰n̄ adə̄ nujə kɔ̄ɔ́ ní ō. 12Ngé kəla gə̄ rāān̄ kəla yādə́ kə gōó majə. Ngé kun dɔ kəla gə̄ i ngán Lebi gə̄ adə̄ i Yahat ō, Obadia ō. Nin̄ i de kə́ gír kaa yā Merari tə́ gə̄. Jakari ō, Mesulam ō, i de kə́ gír kaa yā Kehat tə́ gə̄. Gotə ngán Lebi kə́ rang gə̄ kə́ ngé ger̄ kugə yá̰á̰ kə́ ɓār̄ gōsə̄ gə̄ ní, 13nin̄ i dɔ ngé kətō yá̰a̰ gə̄ tə́ ō, dɔ ngé kəla gə̄ tə́ malang kə gō kəla rāādə́ gēé kógə̄ḿ kógə̄ḿ ō. Dan ngán Lebi gə̄ tə́ ní, ngé kə́rēý gə̄ i ngé ndang makətūbə̄ gə̄ ō, kə́rēý gə̄ i ngé ko̰o̰ ɓē gə̄ ō, kə́rēý gə̄ i ngé ngɔ̄m̄ ta róbə kújə gə̄ ō. 14Dan ń a ɔyn̄ nar ń reēn̄neé kem kújə yā Kɔ́ɔ̄ɓē tə́ ní yā rāań kəla anī, Hilkia nge tun̄ yá̰a̰ teē dɔ makətūbə̄ ndū najə yā Kɔ́ɔ̄ɓē ń Moijə adə̄ ní tə́. 15Hilkia əda Sapan nge ndang makətūbə̄ na n-ənge makətūbə̄ ndū najə̄ kem kújə yā Kɔ́ɔ̄ɓē tə́. Gō tə́ anī ni-tél kə makətūbə̄ ní adə̄ Sapan. 16Sapan aw̄ń adə̄ mban̄g ba ɔjən gotə yá̰a̰ gə̄ əda na: Kəla malang ń ādə̄ ngé kəla yāí gə̄ kadə̄ rāān̄ ní, ran̄ ta tə́ a rāān̄ noó. 17Ngé tun̄ yá̰a̰ gə̄ ɔyn̄ nar malang kə́ kem sandúkə ngɔ̄m̄ nar kə́ kem kújə yā Kɔ́ɔ̄ɓē tə́ adə̄n̄ ngé kə́ dɔ kəla tə́ gə̄ ō, ngé rāā kəla gə̄ ō.
18Gō tə́ anī Sapan nge ndang makətūbə̄ əda mban̄g na Hilkia nge tun̄ yá̰a̰ na adə̄n makətūbə̄ kógə̄ḿ. Sapan tə́da makətūbə̄ ní adə̄ mban̄g.
Josias mēr̄ kaw̄ koō ta Kɔ́ɔ̄ɓē tə́
(Á̰a̰ī 2 Mba 22.11-20a)
19Dan ń mban̄g oō najə̄ gə̄ kə́ kem makətūbə̄ ndū najə̄ ní tə́ oy anī, rə́yā̰ kūbə̄ gə̄ kə́ rɔ̄n tə́ kɔ̄ɔ́ 20ba əda Hilkia ō, Ahikam ngōn̄ Sapan ō, Abədon ngōn̄ Mika ō, Sapan nge ndang makətūbə̄ ō, Asaya nge kəla yā mban̄g ō na: 21Āwī āw̄ ōōī ta Kɔ́ɔ̄ɓē tām̄ yāḿ tə́ ō, tām̄ yā gotə Israel gə̄ ń na̰yn̄ ní tə́ ō, Juda gə̄ tə́ ō, sɔɔ̄ń najə̄ gə̄ yā makətūbə̄ ń teēn̄ dɔ tə́ ní. Tɔdɔ̄ wōn̄g ń rāā Kɔ́ɔ̄ɓē sejí ní i wōn̄g kə́ ngá̰ý, tām̄ kaají gə̄ rāān̄ yá̰á̰ ń Kɔ́ɔ̄ɓē əda ní alé, tɔdɔ̄ rāān̄ yá̰a̰ malang ń i kə́ ndang kem makətūbə̄ ń toō tə́ ní alé.
22Hilkia ō, de gə̄ ń mban̄g gə̄rādə́ ní ō, aw̄n̄ ɓē Hulda nge koō ta kə́ dəyá̰. Hulda ndi i ngōn̄ ɓē kə́ kijə tə́ Jerusalem. Ngán Salum i nge ngɔ̄m̄ kūbə̄ kə́ táĺ gə̄ kə́ kem kújə yā Kɔ́ɔ̄ɓē tə́. Ngáń ní i ngōn̄ Tokatə kə́ ngōn̄ Hasəra. De gə̄ ní ədan̄ nge koō ta kə́ dəyá̰ ní yá̰a̰ gə̄ ń rāān̄ yá̰á̰ ní. 23anī ni-tél ədadə́ na: Kɔ́ɔ̄ɓē, Nə́ɓā yā Israel əda na: Āw̄ ə́daī deē ń əlasí rɔ̄ḿ tə́ ní na, 24najə̄ ń Kɔ́ɔ̄ɓē əda ní n toó: M-ā m̄-reē kə yá̰á̰ kə́ to kum kaȳ aĺ dɔ ɓē kə́ Jerusalem tə́ ō, dɔ de kə́ kemeé gə̄ tə́ ō. Tām̄ m-ā m̄-rāā kadə̄ ndɔ̄ĺ gə̄ malang ń ndangən̄ kem makətūbə̄ ń tə́dan̄ ta kum mban̄g kə́ Juda tə́ ní rāān̄ yá̰a̰. 25Tɔdɔ̄ de kə́ Jerusalem gə̄ əya̰mə̄n̄ kɔ̄ɔ́, nin̄-tunə̄n̄ yá̰a̰ adə̄n̄ nə́ɓā kə́ rang gə̄. Yá̰a̰ malang ń rāān̄ ní adə̄m̄ wōn̄g ngá̰ý. Wōn̄g ń rāām̄ kə ɓē ń toō ní i wōn̄g kə́ ngá̰ý adə̄ a tetə láẃ alé. 26Banī mban̄g kə́ Juda ń əlasí koō taḿ tə́ ní tá āw̄ ə́daniī na yá̰á̰ ń mā Kɔ́ɔ̄ɓē Nə́ɓā yā Israel m-ə́dan ní n toó: Ḭ̄ ōō najə̄ kə́ kem makətūbə̄ ń toō tə́ majə. 27Najə̄ kə́ dɔ Jerusalem tə́ ō, dɔ de kə́ kemeé gə̄ tə́ ō ń m-ɔ̄r̄ kemeé ní ḭ̄ ī-nēl̄ mbīí majə ōoń, tɔdɔ̄ najə̄ ní tōr̄ kemií adə̄ ī-tél kə rɔ̄í kə̄ nang tə́ ta kumḿ tə́ ō, ī-*rə́yā̰ kūbə̄ gə̄ kə́ rɔ̄í tə́ ō, ī-nōō kə man̄ kumií ō. Ní mā Kɔ́ɔ̄ɓē m-ə́daī na m-ōō ndūí. 28Ā óy yā kaw̄ gō kaaí gə̄ tə́. Ba ā āw̄ ɓádá i kə kem sɔlɔ́. Kumií a a̰a̰ yá̰á̰ kə́ to kum kaȳ aĺ ń m-ā m̄-rāā yā rāā kə ɓē kə́ Jerusalem ō, kə de kə́ kemeé gə̄ ō ní alé.
Josias tél əhɔ madə̄ naā kə Nə́ɓāá gogə́ rang
(Á̰a̰ī 2 Mba 22.20b—23.3)
Hilkia ngol ngé tun̄ yá̰a̰ gə̄ nin̄ kə madə̄n gēé reē ədan̄ mban̄g Josias najə̄ ní. 29Anī ni ɓāŕ kum kɔ̄ɔ́ gə̄ malang kə́ Jerusalem ō, kə́ Juda ō, 30ba aw̄n̄ kem kújə yā Kɔ́ɔ̄ɓē tə́, naā tə́ kə de kə́ Jerusalem gə̄ ō, de kə́ Juda gə̄ ō, ngé tun̄ yá̰a̰ gə̄ ō, ngán Lebi gə̄ ō, de gə̄ malang, kə́ bo gə̄gē, kə́ dūú gə̄gē. Gō tə́ anī mban̄g un ndūn kə̄ dɔɔ́ tə́dań najə̄ gə̄ kə́ kem makətūbə̄ madə̄ naā ń əngen̄ kem kújə yā Kɔ́ɔ̄ɓē tə́ ní adə̄ de gə̄ malang. 31Ni-ra kə njan kə́ dɔɔ́ dɔ loo yān kə́ kḭḭ kə̄ dɔɔ́ tə́ ba əhɔ madə̄ naā kə̄ Kɔ́ɔ̄ɓē ni gḛy kun gō tó Kɔ́ɔ̄ɓē ō, gḛy rāā gō míndə gə̄ ń Kɔ́ɔ̄ɓē əda ní ō, gḛy rāā yá̰a̰ gə̄ ń ndū najə̄ yā Kɔ́ɔ̄ɓē əda ní ō, kə ngarā̰ kemən mámák ō, kə rɔ̄neé ō. Ni-gḛy rāā yá̰a̰ gə̄ kə́ tām̄ yā madə̄ naā tə́ ń ndangən̄ kem makətūbə̄ ń toō tə́ ní. 32Mban̄g rāā adə̄ de kə́ Jerusalem gə̄ malang ō, Benjamḛ gə̄ ō, əhɔn̄ madə̄ naā kə Kɔ́ɔ̄ɓēé. Loo ń noō tə́ de kə́ Jerusalem gə̄ tél a rāān̄ i yá̰a̰ gə̄ ń ndū najə̄ gə̄ kə́ dɔ madə̄ naā yā Nə́ɓā yā kaadə́ gə̄ tə́ əda ní. 33Josias bā ta yá̰á̰ kə́ to yḛr kum gə̄ ń de gə̄ a rāān̄ dɔ nang kə́ Israel tə́ ní kɔ̄ɔ́ ō, ra kə de kə́ kem ɓēé gēé ta rɔȳ Kɔ́ɔ̄ɓē Nə́ɓā yādə́ ō. Adə̄ dan ń Josias ndi kə kumneé ní nin̄ tūrə̄n̄ gidədə́ kɔ̄ɔ́ ta Kɔ́ɔ̄ɓē Nə́ɓā yā kaadə́ gə̄ tə́ alé.
Currently Selected:
2 YÁ̰A̰ GƏ̄ 34: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.