Jã 5
5
Jeju yoot de kï ngerokoinjør
(Oo Jã 7:19 teen 24; 9:1 teen 17)
1Go nyagt'n non, juipg awïn þebo Jerusalemt kï n'ðan nah lod mad. Jeju awt ho. 2Kam þebo Jerusalemt, nderrbe kï tabit batgt, mankaar mad kï tøa i Betesda kï ta Hebre to tit; kuj girr gang mi ðan tit nõ. 3Girr kujgt'n non, ngémõig ngãi be ton tit, ta mankaart: Mundog, mootg, kï ngérokoinjørg to ngoon yee man. 4Kïtø malaika lo Bïraþe mad, kaglo mad a ðisï, and kam mankaart, bur mana. Ngemõi'n a ud kam mant'n non dasa go yeeat a ne, a yoot; ke neni în mõi kï titbãi. 5Ku ngémõigt'n ton ta mankaart nõ ye, de mad kï mõi ðaa þal dømïta gidaijijoo tot nõ. 6Lon Jeju ooa to ber kï køtïn, na ger kad mõi ðaa kaglo ngãibe ye, ndïjea an: I ndig kad i yoot e? 7Ngemõi tura an: Bïraþe, de lom kï kad un lam kam mankaart lon man yeen goto na lon m'ndï m'ag þaitø a ne, de mad and nõmt.
8Jeju ela an: I þai dõ un nyatoi, na i þaning. 9Kïtajigt, de'n non yoot, ad þai dõ un nyaton, na þaning. Na tit kan hã nya'n non ða nya kï ndø taakò ye, 10kïbog lo juipg elïn de'n Jeju yoota anan: Ndø 'nten i ndø taakò, i goðobat al kad un nyatoi. 11De'n non turd an: De'n yootïm nõ la elïm an: Un nyatoi, na i þaning.
12Deg'n non ndïjena anan: De'n eli an: Un nyatoi na i þaning ye, i nõ a?
13Na de'n yoot ye, ger de'n yootïn nõ al, kïta Jeju tee kø ku degt'n ðan lot'n non. 14Ndø madt, Jeju ndøda kam kuj ndub Luwaht, na ela an: Oo dø maj. Tajigla î kï yoot, ot ða majal gog ta, na þeta kõ kï tøi în ðai ye, tel ðai gog tø. 15De'n non aw el kïbog lo juipg kad i Jeju la yootïn ye. 16Kïtø 'nten, kïbog lo juipg awïn ne kï ta kï Jeju, kïta yoot de'n non kï ndøø taakò. 17Na Jeju turd an: Bøwm ndï ða kïla mbã tajigla, mî kaa m'ndï m'ða kïla ho. 18Lon juipg oon dø ta 'nten ye, kïbog lod sahn ðob tøla, i kïta tøi'n tøi dø ndøø taakò hã kïðabe al, na i kïta kel'n ndï el an: Luwah i Bøw koojïn, ho oo ron asï na derir kï Luwah.
Tøg Ngon Luwah
19Jeju tee tan eldïn ta 'nten an: M'elsï kï tïga wakïsï i rota. Ngon asï ða nya mad kï døn al. Na a ða nya'n oo Bøwïn lo ðat tã, nyag tube'n Bøw ndï ða ye, Ngon kaa ne, ða titbe ho. 20Kïtø Bøw tar ngon, ad øja nyag tube'n ndï ða; a øja kïlag kïbobo'n oo nõ, kad ða. Na ta a yasï biw. 21Tit'n Bøw ndï ad ngékoig bain lo koit, na ad'd kumkajir ye, titbe tø ho la Ngon ndï adïn kumkajir îgïn hã ndig kad'd ho ye. 22Bøw ndï gangta dø det mad al, na la takïgang tube ji Ngont. 23Kïtøkad deg tube øsïngon Ngon, tit'n ndï øsïn ne gon Bøw ye be. Bøw la, la Ngon ye, de'n ndï øsïgon Ngon al a ne, ndï øsïgon Bøw kï Ngelaa al tø. 24M'ndï m'elsï kï tïga wakïsï, rota, de'n ndï oo dø ta lom, na ndï adkamïn ngelam a ne, ngah kumkajir kï mbãkïnõt; a gangïn ta døat al, na tee ta koit kï kumkajirt. 25M'elsï kï tïga wakïsï i rota, dø kàd a ðe nõ, na tajigla ðe woi, ngékoig a oon dø ndï Ngon Luwah, na îgïn oon dø ndïa ye, a þain ndïn kï død dõ. 26Tit kan Bøw în kï tøg kad deg kumkajir ye, titbe tø la ad ngonïn tøg kad deg kumkajir ho ye, 27na ad ngonïn tøg gangta dø degt kïta i ngon de. 28Adïn nyag 'nten yasï al, kïta kaglo ndï ðe nõ, lon ngékoig'n dubïnd a oon dø ndia, 29a teen kam døþadgt, îgïn ðan maj a þain lo koit kïta kumkajir, na îgïn ðan majal ye, a þain lo koit kad gangïn ta dødt.
Deg man naj kïmaj dø Jejut
30Jeju el tø an: Mî m'asï ða nya mad kï døm al, m'ndï m'gangta kïgo tat'n m'oo dø ta Bøwt, na ta kï m'gang i goðobat, kïta m'ndï m'ða kïgo ndigt lom al, na kïgo ndigt lo ngelam tã. 31Îla m'ndï m'manaj dø romt mî kïþe a ne, titbãi deg a gerïn kad ta lom i rota a? 32Na de mad i nõ, ndï manaj dømt, na m'ger manaj loa kï ma dømt i rota. 33Na în, i lan deg ro Jãt, na Jã manaj dø rotat. 34Na mî taa ne, m'sah kad de tã mam naj al, na m'ndï m'elta titbe kad i ngahn ne kaj. 35Jã i tit horr døg kï unj njoinjoi, na i ndigïn ða ronel dø kunjat kaglot kï sîbe. 36Na mî taa, m'ndï kï naj kï mã kïbo tøi lo Jã'n mã dømt kïta kïlag'n m'ða, Bøwm la adïm tøg kad m'ðadïn ye, kad deg gerïn kad i Bøw la lam ye. 37Bøw, în hã lam, mamnaj tø, i în oon dø ndia nja kïða al ho, oon takuma nja kïða al ho. 38I ngomïn tag loa kamsït al, kïta adïn kamsï ngona'n la nõ al. 39I ndï oon tag kïndang lo Luwah kïta oo anan a i ngahn kumkajir kï mbãkïnõt kamt. Na i rotag kï ndang lo Luwah'n non la ndï mamïn naj ye. 40Be kaa ne, i ndigïn ðe romt kad i ngahn kumkajir kï jeje al. 41M'ndï m'sah køsïgon kokïro degt al. 42Na m'gersï, tar Luwah goto kamsït. 43M'ðe kam tø Bøwmt, na i hømïn kï rosït al, na îla de mad kïðang ðe kam tønt kï køsïdøn a ne, a i høna kï rosït, 44Titbãi a asïn kad kamsï Luwah îgïn i ndï ndigïn ngah køsïgon kokïro degt, na i sahn køsïgon kï þai kokïro Luwaht kïðabe al a? 45Ot gaan kan, mî m'a m'lata døsït nõ Bøwmt. Na i Moij în i ndan kamsï døat nõ la a la ta døsït ye, 46Ni adïn kamsï Moij jeje a ne, ni a admïn kamsï ho, kïta Moij ndangta kam maktubt dan døm. 47Na tit kan i taan tag kï ndang lo Moij al ye, titbe ho la, i taan tag lom al ho ye.
Currently Selected:
Jã 5: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.