Jã 10
10
Terrta dø ngéngombatgt
1Rota rota la m'ndï m'elsï ye: De'n ndï and kïnga batgt kï tabit al, na ndï and kï ta ðob kïðang a ne, i ngéþoog, kï ngekumðob tø. 2Na de'n ndï and kï tabit a ne, i ngéngombatg. 3Ngengom tabit ndï tee ada; batg oon dø ndia, ndï kun bat lon kïðen kï tøa. Ndï ørrd ta ðob kïtïga. 4Lon tee kï kïlong kïtïga tube woi ye, so nõdt, batg a ndulon goa kïta gerïn dø ndia. 5A ndulon go de kï mbah al, na kãi la a ãina kïta gerïn ndi de kï mbah al.
6Jeju eld terrta 'nten, na gerïn girr ta'n eld nõ al.
Jeju i Ngengombatg kïmaj
(Oo Jã 14:6; Esa 40:1; 1 Pie 2:24 teen 25)
7Jeju tel eld an: Rota rota la m'ndï m'elsï ye, mî la mî tabit batg ye. 8Tubeg'n hã ðen nõmt în ngéþoog kï ngékumðob tø. Na batg oon dø ta lod al. 9Mî la mî tabit ye, îla de mad and kïtakulïm a ne, a aj, a and ho, a tee ho, na a ngah lo kulïn. 10Ngeþoog a ðe kïndang al, na mba þoog, kï ja kø kï nuj kø tã, na m'ðe kïtakad batg ngahn kumkajir, kï ngahn kumkajir kï to mbuj tø. 11Mî ngéngombatg kïmaj; ngéngombatg kïmaj ndï ad ron kïta batg.
12Na ngeðakïla kï lo nart, kï i ngéngombatg al, kï batg în loa al ye, îla oo bisïkolo a ðe a ne, tî nya batg na ãi, ad bisïkolo ðe urr dødt hød, na tïnda tînd tø. 13Ngeðakïla kïlo nart a ãi, kïta i ngeðakïla nar ad ta õ kama kïta batg al. 14Mî ngengombatg kïmaj. M'ger kï lomg, kï lomg tø germïn. 15Tit'n Bøw germïn, mî tø m'ger Bøw ho m'ndï mad rom kïta batg tø. 16M'aw kï bat madg nõ tø sumba kad m'ðe sed, a nelïn mbid kïdø tat lom, a în þut kïða, ngengomd a i kïða tø. 17M'ndï m'ad rom kad m'tel m'ta, kïta 'nten la Bøw ndï tarmïn ye. 18De mad kï asï tølïm goto, na mî kïþe la m'ndï m'ad rom kï kamndig ye. M'asï kad mad, m'asï kad m'tel m'ta gog tø. Îla i nya'n Bøw elïm kad m'ða ye.
19Lon Jeju elta ye, kø Juipg so gonat al. 20Kïmadg ngãibe kudt anan: Aw kï ndil kïmajal, kur døa oi kïtøði i ndï oon ne dø ta loa a?
21Kïmadg anan: Tag'n non i takel de kï ngekaw kï ndil kïmajalg e? Ndil kïmajal asï tee kum mundog e?
Juipg ndigïn ta lo Jeju al
(Oo Jã 5:26 teen 27; Jã 20:28 teen 29; Rom 8:35 teen 39)
22I dønah kult, i kaglo ða nah kïtaa i nah nda kuj ndub køtkokïða kad Luwah kam þebo Jerusalemt. 23Jeju a ndia kam kuj ndub Luwaht girr dawt lo Salomõ. 24Juipg lan na gugïn døa, elna anan: Mbã ðïngãt a ad kï nyata kam kïða sekïrre a? Îla î Krist a ne el i ørrj nat ad j'oo.
25Jeju turd an: M'elsï woi, na admïn kamsï al. Kïlag'n m'ndï m'ða kam tø Bøwmt la ndï mamïn naj ye. 26Na admïn kamsï al kïta în ku batg lom al. 27Batg lom ndï oon dø ndïm, m'gerd, ndï ndulon gom tø. 28M'ndï m'ad'd kumkajir kï mbãkïnõt, a nujïn kø kï nja kïða al bat, de kï asï tad jimt goto. 29Bøwm'n adïmd i kïbo tøid tube, de kï asï tad ji Bøwt goto. 30Mî kï Bøw jî kïða.
31Kïtø 'nten juipg tel øin ne mbalg kï n'tïlana ne. 32Jeju turd an: M'øjsï kïlag ngãibe kïmaj kokïro Bøwt, na kïla ði kudt la hã i ndï tïlamïn ne kï mbal a? 33Juipg turïna anan: Kïtø kïla mad kïmaj hã kï ndï kï tïlain al, na kïta i ndï elta kïmal dø Luwaht; kïta î kï de i ndï tel roi Luwaht; 34Jeju turd an: Ndangïn kam mberkïndat losï; m'el m'an în luwahg ale? 35Kï gerïn maj ta'n ndangïn kam maktubt kïkunjðang ye a to lo tont mbãkïnõt. Kïtø Luwah elta kï ngékelta kï tant maði an: În luwahg. 36Kïtøði i ndï elïn anan m'ndï m'elta kïmal dø Luwaht lon m'el m'an mî Ngon Luwah? Mî taa ne, Luwah køtïm, ndam køtko kïða ho lam døningt tø ho. 37Îla m'ndï m'ða kïlag lo Bøw al a ne, ot kadmïn kamsï. 38Na îla m'ndï ða kïlag loa a ne, ke admïn kamsï al kaa ne, adïn kamsï kïlag'n non, kïtakad i gerïn køikøi tø, Bøw ndï kammt, mî tø m'ndï kam Bøwt.
39Kïtø 'nten sahna kï n'høna, na tee jidt kø.
40Jeju tel aw gog gid bah Jurdët, lot'n Jã ða ðaa deg baptemt dasa. Jeju ndït nu. 41Deg ngãibe ðen roat anan: Jã ða nyakøj kï ya mad al, na nyag tube'n Jã el dan dø de'n ðan ye i rota. 42Deg ngãibe taan ta loa lot'n non.
Currently Selected:
Jã 10: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.