Marcos 6
6
So' Jesús huét'a di' Nazaret
(Mateo 13.53-58; Lucas 4.16-30)
1So' Jesús ca'aidi, v'iỹílaxa ga'me lañoqo', náictapee'to saua' lasoxoñii's. 2Joca'li ỹivíta so' nolo' 'me mataxaqui, qana'chi dapaxaguenataxanóoue jeso' lemáxaqui na' judiopi. Qaa'le ỹátaqta jalcote na' siỹaxadipi 'me naquiáxatapega. Qana'chi ỹátaqta qoỹ'aalátapeec. Qana'chi 'enapega't so'me siỹaxadipi:
—¿'Te hua'ague ga' ỹachiỹoxot'ague ỹima da' laỹátenaxanaxac da'me dójo' siỹaxaua? qataxa ¿jái'chi da'me dójo' naỹátenaxanaxac 'me qoỹanem, qataxa jen'me sa qoỹauanápiỹi 'me ỹí'et? 3Qá'a da'me 'chi ỹ'étac jen' 'epaq, lec'óxot jaso' María, qataxa laqáỹa so' Jacobo, José, Judas qataxa so' Simón. Qataxa naua' laqáỹa' ỹauo' netra'ñína.
Qana'chi qoỹoqolguétetac so'me. 4Qaláxasa so' Jesús 'enaaco':
—Ỹima na' siỹaxadipi ỹátaqta ỹichoxoden ga' l'aqtáxanaxanec ñi' Dios, qaláxasa na' l'acháqadiaxau'pi, qataxa jaga' l'emeelaséỹaxaua sa ỹichoxoden.
5Chan'eesa so'me sa ỹa'uo ga'me ỹí'et na'me sa qoỹauanápiỹi. Jaldáta da' 'uo na' huaselelégue na' leuaxaicpi da' n'óota qa'en, qaláxasa sa huosái'isa. 6Chan'eesa so' Jesús ỹátaqta ỹ'aalátapeec so' siỹaxadipi, qá'a sa d'amaqtenataxan. Ỹim, qana'chi jec da'me quétaỹi na' noicpi 'me sa qaỹáaque da' dapaxaguenataxáatac.
So' Jesús ỹama' saua' lasoxoñii's da' d'aqtaxa'n
(Mateo 10.5-15; Lucas 9.1-6)
7Joca'li ỹim, qana'chi ỹiỹáxanoovlo saa'me doce lasoxoñii's, qana'chi ỹama', doos'ape 'e'n. Qana'chi ỹanema saa'me da' lañoqtaxanaxa'j, qaidi ỹichiỹódedapegueegue na' né'ecpi nataqtáqaic. 8Qataxa huaqatalo saa'me, qaidi 'ená'te 'uo ga' ỹáchi' na' ladi'j, na'chigáta ga' lase'l. Qataxa sa 'te ỹáchi'j ga' loxoqui', qataxa ga' nese'ne', qataxa jaga' lemena'. 9Qataxa da' ỹauo'oi naua' lapela'te, qataxa 'oonolec ga' nesomaxaqui, sa 'te dos ga'me ỹachit'ape. 10Qataxa 'enapegalo' saa'me, 'enaac:
—'Ami qomle ỹivíta da' 'aunoxoñíi'uo gamachaqaiga 'emec, qana'chiga 'ovíit'a, ỹataqtelégue da'me 'oquíi'ỹai ga'me 'aléua. 11Qataxa qomle 'uo ga' huá'a da' sa 'te 'ami ỹilo'ogueta, qataxa sa 'ami naquiáxanalo, qana'chi 'oquíi'ỹai ga'me, qaláxasa 'anichiỹoqoidíñi qomle na' 'enáaỹaxa naua' 'adapia'chídii', da'me na'chi n'anaxat da'me ga' siỹaxadipi mai'chi nasouaxatela't. Ỹátaqta da'me 'ami s'axátetapeema da'me qomle ỹivíta ga'me p'áteegue nolo' qomle nimitáaque na' nasouaxasetpi ñi' Dios, qana'chi sa huosái'isa qomle da' ne'uaxánaguec na'me Sodoma lé'ec qataxa so' Gomorra, sa 'ená'am qomle ga' ne'uaxánaguec qoỹin jen'me siỹaxadipi 'me sa 'ami ỹacóneeta.
12Qaama'le saa'me 'éque', na'chi d'aqtaxaatem na' siỹaxadipi, qaidi ỹaxadéegue naua' loico. 13Nataq'en jalcote na' né'ecpi nataqtáqaic na' ỹichiỹódedaiỹi, qataxa jalcote na' leuaxaicpi ỹ'ameedec na' aceite, qana'chi ỹiméegue qoỹin.
Da' nalaataguec qoỹin so' Juan 'me chiláxanataxanaxaic
(Mateo 14.1-12; Lucas 9.7-9)
14Qana'chi so' net'a Herodes ỹivid'ot da' ỹaỹáten ỹima dójo', qá'a sóxote ỹaỹáten ỹima na' siỹaxadipi da'me n'aqtaguec so' Jesús. Qana'chi so'me Herodes 'enaaco':
—Séetapega naqaida da'me Juan 'me chiláxanataxanaxaic da' ỹitaxa n'iỹílaxaseguem, too'chaqaale 'uo da'me lañoqtaxanaxac.
15Qataxa 'uo na' 'enaac:
—Séetapega naqaida da' Elías 'me l'aqtáxanaxanec ñi' Dios.
Qataxa 'uo na' 'enaac:
—Séetapega l'aqtáxanaxanec ñi' Dios da', 'ená'am so'me huá'au l'aqtáxanaxanec ñi'me.
16Qaa'le so' Herodes joca'li p'iquilégue dójo', qaama'le 'enaaco':
—Da'me naqaida da' Juan 'me samaxasoxolégue ca'li da' qoỹicháxaỹi na' laqaic, da'me ỹitaxa n'iỹílaxaseguem.
17Qá'a so' Herodes damaxasoxolégue joca'li da'me qoỹicoñi' so' Juan qoỹicoñidec so' cadéena, qoỹanáaue jaga' cointáxanaxaqui, ỹasouaxat jaso' Herodías. Jaso'me loua joca'li so' Felipe jeso'me laqaỹasa so' Herodes. Qaláxasa so' Herodes deuootáxanec joca'li, qaama'le 'en loua. 18Chan'eesa so' Juan 'enapéga joca'li so' Herodes, 'enaac:
—Sa ỹiỹamaxañi da' 'aneuótec jañi'me loua so' 'adaqáỹa.
19Qana'chi jaso'me Herodías ỹátaqta niquiỹá'a so' Juan, chan'eesa sétaaque da'me ỹalaat, qaláxasa sa ỹaqanatet. 20Qá'a so' Herodes ỹaỹáteeta da' so' Juan ỹátaqta 'ónaxaic da' lasoxoc, qataxa huosóta, chan'eesa d'oỹalégue. Tadeeto' so'me sa ỹasenem jaso'me da' 'uo ga' 'éet'ec so' Juan. So' Herodes, temaqaidi da'me sa demachi'sailo naa'me l'aqtaxanaxaco so' Juan, qaláxasa na'chi 'ená'am noqopita da' naquiáxana. 21Qaláxasa jaso' Herodías huáaue qa'en so' nolo' 'me so' Herodes ỹí'et so' liqui'ỹáxac da' de'quelégue so' lañoxoqui. Qana'chi ỹiỹaxa't so' letau'pi net'alpi, qataxa na' huataxanaq let'alpi, qataxa na' saliaxanqapi 'me l'acháqa' di' Galilea. 22Qana'chi jaso' lec'oqte jaso' Herodías ỹinoxonóoue ga' huá'a ga' niqui'ỹáxac, qana'chi dasot. Qana'chi da'me lasotaxac jaso'me ỹátaqta taỹi lauel so' Herodes qataxa so'me liqui'ỹáxau'pi. Chan'eesa so' net'a Herodes 'enapego' jaso'me 'eet'oi:
—Ga'me táchii'ña ga'me 'aviỹáxanaaque, jaỹim 'am sanem.
23Qana'chi ỹan da' l'aqtac da' 'enapéga ỹipaquíchiỹi da' ỹanégue gamachaqaiga qoỹiỹáxanaaque, temaqaidi da' 'uootaxa táchiinỹi laiñi na'me 'aléuapi 'me ỹilótapegue' so'me. 24Qana'chi jaso'me p'áiỹi, qaama'le ỹachimaxata jaso'me lat'e, 'enaac:
—¿Jái'chi ga' siỹáxanaaque?
Qaama'le 'enaaco' jaso'me lat'e:
—'Aviỹáxane'uo qomle na' laqaic ñi' Juan 'me chiláxanataxanaxaic.
25Chan'eesa jaso'me 'añole pasá'a qaa'le v'iỹílaxa'uo ga' huét'a so'me net'a. Qana'chi 'enapego', 'enaac:
—Sétaaque da'me naỹi da' jaỹim 'auanem ga'me coqui, 'auachánỹi ga' laqaic ñi' Juan 'me chiláxanataxanaxaic.
26Qana'chi so' net'a ỹátaqta daquico. Qaláxasa da'me sóxote ỹan so' l'aqtac da' 'enapéga ỹipagaqchíichiỹi, qataxa naquiáxachiỹi joca'li so'me liqui'ỹáxau'pi. Chan'eesa qaa'le qaỹa 'te lep'áxac da'me ỹ'iláxatac ga'me qoỹiỹáxane'uo. 27Qana'chi ỹiquelól'ac so' net'a da' ỹamaq so' 'oonolec nesoxonec da'me nedóuo ga' laqaic so' Juan. 28Qaama'le jec so' nesoxonec da' taỹá'a jaso' cointáxanaxaqui. Qana'chi ỹicháxaỹi so' laqaic so' Juan, qana'chi nedo't, ỹachítanỹi so' coqui. Qana'chi ỹanem jeso'me jaso'me 'añole. Qana'chi jaso'me ỹanem jaso' lat'e.
29Qana'chi joca'li dip'iqui na' quétapegue' so' Juan, qana'chi qoỹ'iiná'uo so'me ló'oquiaxac, qana'chi qoỹidóiỹi da'me, qaidi qoỹisiiñi.
So' Jesús ỹiqui'ỹáxan so' cinco mil siỹaxadipi
(Mateo 14.13-21; Lucas 9.10-17; Juan 6.1-14)
30Mané'e cana'le ỹim dójo', qana'chi so' Jesús nasoỹa'ato saua' lamaxa's. Qana'chi saa'me ỹ'axátetr'apeguem so'me ỹima na'me ỹ'étetr'ac qataxa na' dapaxaguenataxáatrapec. 31Qana'chi so' Jesús 'enapegalo saa'me, 'enaac:
—'Aỹaláỹi, cadá'ac da' ñimataxáỹi, qótaxai'ỹa ga' totelégue 'aléua.
Qá'a ỹátaqta jalcote na' siỹaxadipi nemenapega't da' naỹapee'ualo saa'me, qana'chi saa'me qaỹa 'te ledáqa't da' cha'li di'qui'. 32Qana'chi so' Jesús nedot'eto saua' lamaxa's da' 'éque', nédanỹi jaso' licota da'me tata ga' totelégue 'aléua. 33Qaláxasa jalcote joca'li na' ỹauáat'egue so'me da' 'ec, qataxa qoỹaateton so' Jesús. Qana'chi 'uáu'a ga' qotaỹá'a 'aléua ỹima na'me chiỹoxoguelo naua' noiqa laqáỹa', qana'chi 'uáichi't joca'li maliaxa sa ỹivididi't saa'me. 34Qana'chi so' Jesús mané'e ca'li nenótee'guesop jaso' licota, qana'chi ỹiláaue so' jalcote siỹaxadipi. Qana'chi ỹátaqta 'uo da' lichoxodénataxanaxac, qá'a 'ená'am jan' n'aanaxate 'me qaỹa 'te nouatoqo't. Qataxa huá'a da' 'ecot da' jalcote na' ỹapaxaguenec. 35Joca'li ma'le jávit, qana'chi saua' lasoxoñii's naqaloxodéde'uo so'me. Qana'chi 'eedápega 'eeta'salo:
—Sóxote jávit, qataxa jen' souqát'a totelégue. 36N'óota da' 'aunapéga na' siỹaxadipi da' qaidi talégue naua' n'ónaxadi qataxa naua' noiqolqa 'me sa qaỹadapiỹi, na'chi neuodéna ga' jaloq, qá'a jen'me siỹaxadipi qaỹa 'te ỹalic.
37Qaláxasa so' Jesús 'enaaco':
—'Ami 'me 'auañiim ga' jaloq na' siỹaxadipi.
Qana'chi saa'me 'enapega'tjo':
—¿Qo'li sañoxotaq qo'mi da' semenaq jaga' doscientos denariopi da' ñiuodénaqaaque ga' jaloq, da' qaidi siqui'ỹáxanaq na' siỹaxadipi?
38Qana'chi so' Jesús 'enapegalo saa'me, 'enaac:
—¿Jái'chi laỹóqte' gaua' 'anqódii' pan? Ỹa 'analoqchiñii'.
Joca'li ma'le qoỹaỹáte'n saa'me huo'oi, qana'chi qod'aqtaxanem, qoỹinaac:
—Cincole diaua' pan, qataxa doosolqa diaua' níỹa'.
39Qaama'le 'enapéga so' siỹaxadipi da' ñíiñi, ỹimapega't qa'en, napeelégue na' 'auaqapi dadála. 40Qaama'le ñíiñi so' siỹaxadipi, niỹaqá'a di' huá'a na' cien qataxa na' cincuenta. 41Qaama'le so' Jesús lasaq'alo saua' cincole pan qataxa saua' dos níỹa', na'chi ỹilosée'mec na' piỹem da' netamenot ñi' Dios, na'chi necolaxachidíñi saua' pan qataxa ỹanoovlo saua' lasoxoñii's, qaidi saa'me ỹaadóoue so' siỹaxadipi. Nataxa 'éet'ec ỹanóoue ỹima so' siỹaxadipi saua' doosolqa níỹa'. 42Ỹima nalóteegue, qana'chi dequé'e, qataxa nodáxaicpi. 43Qataxa joca'li ỹim, qana'chi nesaxaỹilo saua' doce jan' nadetáxanaxaqui 'me n'oxona so' n'iỹóxotpi jaso' pan qataxa saua' níỹa'. 44Qaa'le so'me ỹalic saa'me pan, ỹóvi' cinco mil siỹaxadipi.
So' Jesús petalégue so' noxop
(Mateo 14.22-27; Juan 6.16-21)
45Ca'li ỹim dójo', qana'chi so' Jesús ỹiladelóo'te saua' lasoxoñii's, nédanỹi qa'e'n jaso' licota da' p'áideta jaso' peróna ỹic'átra di' noic Betsaida. Qana'chi jeso'me qapiỹáñi da' nichoxotétapegooue na' siỹaxadipi. 46Ca'li ỹim da' nichoxotaxac, qana'chi jec tasée'mec so' qasoxonaxa da' netamen. 47Joca'li ma'le pí'ỹaq, qana'chi jaso' licota ma'le huánỹi na' laiñi jaso' peróna, qaa'le so' Jesús maliaxa huetalégue so' l'añaxa, 'oonolaac. 48Qana'chi ỹila'aguelo saa'me lasoxoñii's da' sa 'eelóo'te da' delícotaxaat'ape, qá'a saa'me ỹátaqta dasotr'eguet so' laỹat. Qana'chi ca'li ma'le ỹá'agueteda, qaama'le jec so' Jesús da' ỹic'ataxaso'malo saa'me, petalégue na' noxop. Qana'chi so'me tema'le napactalóo'te. 49Joca'li qoỹila'ague da' petalégue na' noxop, qana'chi qoỹíitapega da' nepaqal. Na'chi saa'me ỹ'alaqaỹilo, 50qá'a ỹiméda saa'me da' ỹilód'a, qana'chi ỹátaqta d'oi'. Qaláxasa so' Jesús 'enapegalo saa'me, 'enaac:
—¡'An'añaxachii qomle, na'chaỹim, 'ená'te 'au'óỹii!
51Qaama'le so'me huenóchiinỹi jaso' licota 'me qonétanỹi, qaama'le v'iiỹet so' laỹat, qana'chi saa'me ỹátaqta 'uo da'me loqolánaqa', qataxa da' l'aalaxa'j. 52Qá'a saa'me maliaxa sa ỹaỹáte'n joca'li ga' náỹi jaso' pan, qá'a naua' liquidiaqtel saa'me ỹátaqta sa nelodéegue.
So' Jesús n'óota qa'en na' leuaxaicpi di' Genesaret
(Mateo 14.34-36)
53Qana'chi n'iỹílaxata, ỹ'áxasoxodeta jaso' peróna da' ỹic'ádeta di' 'aléua Genesaret. Huá'a, qana'chi qoỹicoñi' jaso' licota, qoỹaat'ot so' loxogue. 54Mané'e ca'li 'chi huenótree'guesop jaso' licota, qana'chi so' siỹaxadipi ỹaateton so' Jesús. 55Qana'chi so' siỹaxadipi jec da' quiilo naua' 'ale'u, qana'chi qondóuo na' leuaxaicpi huetalóo'te qoỹi'n naua' letala'te da' qondá'a ga' qoỹaỹáten da' huét'a so' Jesús. 56Qana'chi ga'me táte'uo so'me na'me noicpiolec, 'uootaxa na'me noic t'ádaicpi, 'uootaxa naua' n'ónaxadi, qana'chi qoỹacha'ñiilo naua' nadíco jen' leuaxaicpi. Qana'chi qonachoxodenot so' Jesús da'me ỹaséeta da' 'chi qoỹipoteuó'o na' lapoto lai. Qana'chi ỹima na'me ỹipoteuó'o so'me, qana'chi ỹiméegue.
Currently Selected:
Marcos 6: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.