Libait Lâka 7
7
Lâ krikanka nani ba mana sakripaiska daukaia ba lâka
1“Pâtkira takan ba mana kli aibapaia sakripaiska nani dauki ba, daukanka holikira pali kum sa. Bamna sakripaiska nani ba naku daukaia smalkan: 2Baha pâtka mana ikaia daiwra ba, daiwan iki angkaia yabi ba pliska ra bri si, nana dakbia; bara tâlia ba ni altar pura bara tnaya kir ba sin srikbaia. 3Daiwra wâika dusa batanka ba,#7.3 Lalma tasbaya ra sîp wainhka tara nani bâra kan, wâika batanka bri kan, wîna sin manis, baha sât sîpka wainhka ba dukiara aisisa. biara bilara batanka nani ba sut sâkbia, 4kiskamka wâl ba, batanka nani bahara alki ba, nina dusa ra batanka ba, âuya purara batanka nani alki ba sut, kiskamka nani aikuki sakaia sa. 5Bara prîs baha dukia nani ba altar purara Dawan ra yamni kulki prisantka dauki angkbia. 6Bara prîs nani sut ba baha ba piaia sip sa, sakuna plis holikira kum ra daukaia sa, kan baha ba diara holikira pali kum sa bamna.
7“Pâtkira takan sakripaiska ba bara saurka lâka daukan sakripaiska ba wâlsut, tânka kumi baku sa, sakripaiska ba nahki smalkanka ba sin wâlsut tânka kumi baku sa. 8Baku natka ra sin, baha prisantka upla kum dukiara daiwan kum iki aiska angki sakripaiska dauki ba, daiwra taya ba witin briaia sa. 9Baku sin, barli mâ nani wina prisant dauki yabia, prisantka dikwa ra bara brit angkaia pânka ra angki bri aula ba sin, prîs sakripaiska dauki ba dukia kabia. 10Baha daukan ba baku natka ra, batana laya wal plun mâ sâtka nani ba sin akbi daukan lâwan ba, baha sut ba Eran kiamka nani ra yabia, witin nani yui aikuki baku ai tilara bribia.
Waihla ba wal kupia kumi daukaia sakripaiska ba
11“Naha sika wal kli uplika takaia sakripaiska nani daukaia, Dawan ra brih aula nani ba smalkanka: 12Baha sakripaiska daukaia brih aula ba, Dawan ra tingki wiaia lâka daukaia sa kaka, naha diara wala nani sin brih balaia sa: plawar îs mangkras, oliv batana laya ra akbi brit daukan ba, dus wahia nani îs mangkras batana laya ni srikban ba, plawar mâ pain nani batana laya ra akbi brit daukan ba; 13baha nani ba Dawan ra tingki wiaia, kli wal uplika takaia sakripaiska daukaia ba sut asla dauki bri balbia, îs mangki dauki angkan britka nani ba sin. 14Prisant nani sâtka kumi bani Dawan ra yabaia brih balan ba, baha bani wina wirâ bribia, Dawan ra prisantka yabia, bara kli wal uplika takaia kupia kumi daukaia, tâlia ni srikbaia sakripaiska ba lika, prîs daukaia kabia.
15“Baha Dawan ra tingki wiaia kli wal uplika takaia prisantka daukaia brih balan daiwra wîna ba, baha yua ba mahka piaia sa, wîna pîs lupia kum sin yauhka piaia swiaia apia sa. 16Sakripais wala, upla kum witin daiwan kum bri balan diara kum daukaia dukiara, Dawan wal aisi pramis takaia, witin aisin ba ai bîla kat daukaia dukiara, baha sika sakripais kum witin ai kupia brinka wina daukaia aula ba. Bara baha daiwra wîna ba sin, baha yua ba sut piaia, ban sakuna wîna ba ban pura luan kaka, baha lika ban sip sa tâka ba yauhka kat piaia. 17Sakuna sakripais daukan wîna ba piras yu yumhpa kat bri kan kaka, baha lika sut pali ba mahka angkaia sa. 18Upla kum Dawan wal kli ai uplika takaia sakripaiska daukan daiwra wîna ba, pat yu yumhpa alkan bara upla kum ban baha ba brih pibia kaka, sakripaiska daukan lâka ba bahki kulkan kabia, daiwra wîna ba sin saura takan kulkan sa ba ra. Baha wîna pîsa uplika ba, baha saurka ba kulkuya.
19“Diara kum tâski kulkan ba ra wîna ba kangbia kaka, baha wîna ba piaia apia sa, sakuna angkaia sa.
“Dawan lâka ba kat, sunu takan uplika nani ba lika, baha wîna ba piaia sip sa.
20“Upla kum tâski kulkan ba, Dawan wal kli wan uplika takaia sakripaiska daukan wîna ba wina pibia kaka, bara baha wîna pat Dawan dukia yaban kan sa kaka, baha uplika ba upla wala nani tila wina mawan ba tikbia.
21“Dawan lâka kat diara kum upla wîna ra, daiwan wîna ra, apia kra diara wala kum ra tâski kulkan ba, upla kum baha tâskika ba kangbuya ba ra, Dawan wal kli wan uplika takaia sakripaiska daukbia, Dawan ra yaban daiwra wîna ba wina pibia uplika ba, upla nani tila wina ai mawan ba tikbia.”
Daiwan tâlia bara batanka ba nahki daukaia lâka
22Dawan ba Moses ra aisi, naku win:
23“Naha lâka nani na Israel luhpia nani ra wis: Witin nani bîp wainhka batanka, sîp bara guts batanka nani ba wirâ lupia sin piaia apia sa. 24Daiwan pruan nani, daiwan wail mita ikan daiwra batanka ba lika sip sa, diara wala daukaia dukiara ban briaia, sakuna piaia lika apia.
25“Daiwan wîna aiska angki, ai prisantka Dawan ra yabaia bri balan daiwra wîna ba wina, ani uplika batanka ba pibia kaka, uplika ba upla wala nani tila wina mawan ba tikaia sa.
26“Ani tasbaya ra man nani wih iwma ba ra, daiwan pâli nani tâlia bara daiwan wapi tauki nani ba tâlia pipara bara sin dipara. 27Ani daiwra tâlia pibia bara dibia uplika ba, mawan ba upla tila wina tikbia.”#Bla St 9.4; Lib 17.10-14; 19.26; Kli S 12.16,23; 15.23.
Prîs briaia dukia ba
28Dawan ba Moses ra aisi, naku win:
29“Israel luhpia nani ra wis, ani uplika Dawan wal kli wan uplika takaia sakripaiska daukaia, ai prisantka nani brih aula ba, Dawan kaiki ba ra bri balaia sa. 30Upla kum ai prisantka Dawan kaiki ba ra, angkaia pliska ra bri aula ba, prisant yabaia lâka ra nahki dauki yabaia win ba kat daukbia. Witin daiwra lamkuka ba, batanka ba sin ai mihta ni alki brih, Dawan mawanra balbia. 31Prîs ba, baha batanka nani ba brih altar ra angkbia, sakuna lamkuka ba lika, Eran bribia ai kiamka nani ba aikuki. 32Baha daiwra nani kuhma aihkika ba lika, prîs wark daukuya ba bribia, Dawan wal kli wan uplika takaia warkka dauki bamna. 33Kuhma aihkika wala ba, prîs ra yabia, witin brih batanka ba bara tâlia ba ni kli wal uplika takaia sakripaiska ba daukbia. 34Israel luhpia nani yang wal kli ai uplika takaia sakripaiska dauki ba, daiwra lamkuka ba prisantka kum yang brisna, bara kuhma kum ba prîs Eran bara luhpia nani ra mana baku yabisna, Israel luhpia nani sakripais daukuya ba piua bani, baha kuhma kum ba prîs ra yabi kabia.”
35Dawan mita Eran ba paiwi prîs lâka ra mangki ai yamnika yan yua ba wina, Dawan ra pain kulkan lâka yabaia prisantka angki dauki ba pata wina, witin ra bara ai luhpia nani ra sin pata ba yabaia lâka mangkan ba naha nani sa. 36Dawan mita win Israel ra wiaia witin nani prîs luhpia nani ra sin plun yabi kabia. Prîs mangkan ba yua wina, baha lâka ba upla nani purara kahban kan ba, piu bani baku dauki kaia, aisika nani ba naha lâka ai luhpia nani ra smalki ban kaia.
37Naha lâka nani sika smalki yaban ba daiwan wîna aiska angki sakripais daukaia ba, plun mâ sâtka nani wina prisantka dauki yabaia ba, upla saura daukan pâtkira takan ba ai dara walan bara ai sakripaiska daukaia ba, Dawan dukia yabaia prisantka ba, bara witin wal kli ai uplika takaia sakripaiska ba sin dauki kaia. 38Naha lâka nani sut na, Sainai Ilka ra Dawan mita Moses ra smalki yaban, bara upla iwras tasbaya ra Israel luhpia nani impakan. Bara Dawan ra naha prisantka nani yabaia lâka nani ba, Moses bui witin nani ra smalki kan.
Currently Selected:
Libait Lâka 7: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua