Apastil Nani Sturka 24
24
Pal ai tânka Félix mawanra aisisa
1Yu matsip ningkara, prîs tara Ananías, Ju wihtka almuk nani, bara layar kum nina Tértulo ba kira, Sesaria ra wan. Naha nani sut wihta tara mawanra wan, Pal dahra kwahkaia. 2Pal ba brih balan ba ra, Tértulo lika mahka dahra kwahki, naku aisin Félix ra:
—Man ra tingki luki banhwisna, puri wihtka tara sma ba, âiyapah, kupi kumi sin banhwisna, man sinskam tara lâka ba kat dîa dîa wan kuntrika want kan ba aitani kat sa. 3Naha diara nani sut na, yang nani piua bani brisna plis bani ra, puri wihtka Félix; baha mita yang nani bui man ra tingki uya lukisna. 4Sakuna piuam uya maikrika tikaia apia ba tâwan, mamkabisna kupiam yamnika ba kat yang nani ra wiria ai wali kama. 5Naha waitnika lika uya saura pali kan yang nani sakri, Ju nani sut tasba aiska ra ba kupia turbisa, witin na sin Nasarin nani tâ uplika kumi sa. 6Tempel pali ba sin sauhkaia trai munan, baha tâwan yang nani mita witin na alkri. [Lâika kat lâka daukaia luki banhri. 7Sakuna suldiar nani kiaptinka Lisias bui dimi taibi pali wan muni, yang nani mihti wina dakban.] 8Bamna man mita makabi walma, bâra lika tânka ba pain kaikma, nahki diara nani sut yang nani aisisna ba kasak pali sapa.
9Ju nani bahara kan ba sut bila, baha diara nani aisi ba lika kasak pali sa. 10Bamna wihta tara ba Pal ra sain yan aisaia, bara Pal bila:
—Pain pali lukisna, tâinka ba param saki man mamwanra aisaia, kan yang pain kaikisna nahki man naha nisanka purara mani ailal wihta tara aimakisma ba. 11Baha tânka ba man pali mita kaikaia sma, nahki yu 12 baman luan sa, yang lika Jerusalem ra balri Gâd ra puri sunaia. 12Ju nani mita ai kaikras, yang tempel ra upla wal blahwi, apia kaka maisa kapi kapri, witin nani Ju nani priaska watla ra bara plis wala nani ra sin apia. 13Naha uplika nani daihra kwahki na, kumi yang tâinka ba param sip mai wibia apia. 14Sakuna diara kasak ba latan mai wisna: yang damiki nani Gâdka dukia daukisna Yabal Raya natka bâk, witin nani mita baha yabalka aihka baku kulki ba. Bamna kasak lukisna dîa dîa Moses lâka ra ulban ba, bara prapit nani ulbanka ba sin. 15Bara witin nani na wal baku Gâd wina diara bîla kaikisni; pruan nani ba kli buaia sa, upla pain nani, upla saura nani sin. 16Baha mita sika yang kupi lukanka tânka ba klin brisna, Gâd mawanra bara upla nani mawanra sin.
17“Mani ailal plis wala nani ra baman tauki katna ba wina, yang pali tasbaya ra kli balri, upliki nani ra prisant yaia, bara sakripais sin daukaia. 18Naha diara na dauki kapri piua, Ju tila nani Asia wina balan ba mita tempel ra kapri ai kaikan, Moses lâka ba kat pat wîni klin daukri kan, upla ailal âpu kan ba piua ra, bara bin sin âpu kira. 19Bamna baha uplika nani sika naiwa nâra bal man ra daihra kwahkaia kan, yang maipara diara bri kan kaka.#Ap St 21.17-28. 20Apia kaka, naha nani nâra banhwi na yarka aisabia, Ju lâka dadaukra wihtka nani mawanra katna ba ra, dîa pât kum yang ra sakan sapa. 21Naha bîla dukiara kaka lika, witin nani tilara katna ba ra yang bîli baikra karna wini naku aisari ba: ‘Naiwa man nani lâ ra ai dingkram na lika, pruan nani kli buaia ba dukiara kasak lukisna ba tâwan sika.’#Ap St 23.6.
22Félix lika kristian lâka tânka ba pain param walan kan, bara witin aidrubanka ba takaskan, sakuna win:
—Kamandanti Lisias balbia ba ra, man nani tânkam ba kau walamna.
23Bamna Félix ba kiaptin adar yan, Pal ba main kaiki bri kabia, bara pri swibia, ai uplika nani ra sin sans yabia witin wal aisi kaia.
24Yu tila nani luan ra, Félix ai maya Drusila ba wal balan, witinka Ju mairin kan, bara Pal ba paiwan witin nani ra, Jisas Kraist ra kasak lukaia tânka ba dukiara aisabia wisi. 25Sakuna Pal aisin ai rayaka wapni bri kaia tânka dukiara, wan wîna alki takaskaia lâka bara naika lâ tara yua ra lâ tara ba dukiara sin. Bamna Félix sibrin taki, win:
—Nanara man mahka was, sakuna ani piua yang sans bri kamna ba ra, kli mai paiwamna.
26Félix luki kan Pal mita lalah yabia lanhkbia dukiara; baha mita aima ailal paiwi kan witin wal aisaia. 27Baku mani wâl luan, bara Porcio Festo ba Félix watlika ra wihta tara aimakan. Félix ba Ju nani wal pain kaia wisi, Pal ba silak ra ban swin.
Currently Selected:
Apastil Nani Sturka 24: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua