متا ۵
۵
کوه جؤر موعیظه
1 ایتأ روج عیسا بیدِه ایتأ پیله جِمئیت جمَ بوستٚد. بأزون ایتأ کوه جؤر بوشؤ و بینیشت، و اونی شأگردأنٚم اونی دؤر جمَ بوستٚده. 2 بأزین شورو بوکوده اوشأنَ آمؤختٚن و بٚفرمأسته:
خوشبختی رأز
3 «خوشأ بحألٚ اوشأن کی روح دورون فِقِر ایسٚد#۵:۳ یونأنی: خوشأ بحألٚ اوشأن کی روحٚ دورون فِقِرٚد.، چونکی آسمأنٚ پأدیشأیی اوشأنٚ شین بِه.
4 «خوشأ بحألٚ غم بیدِکأن، چونکی دیلدأری گیرده.
5 «خوشأ بحألٚ اوشأنی کی فروتن ایسٚد، چونکی اَشأن زیمینَ ارث بٚرٚده.
6 «خوشأ بحألٚ اوشأنی کی عیدألت و اینصأفٚ رِه تشنه ایسٚد و اوشأنَ ویشتأیه، چونکی سِئرَ بٚده.
7 «خوشأ بحألٚ اوشأنی کی دیگرأنٚ رِه رحم کونٚده، چونکی اوشأنٚ رِه رحم بِه.
8 «خوشأ بحألٚ او دیلأن کی پأک ایسٚد، چونکی خودایَ تأنٚد بیدینٚد.
9 «خوشأ بحألٚ اوشأنی کی مردومٚ میأن صولح دکفتنٚ رِه تلاش کونٚده، چونکی اوشأن خودا زأکأن دؤخأده بٚده.
10 «خوشأ بحألٚ اوشأنی کی خُبی کودن و عیدألتٚ رأ دورون اَذِت و آزأر دینٚده، چونکی آسمأنٚ پأدیشأیی اوشأنٚ شین بِه.
11 «خوشأ بحألٚ شومأن، هر وخت کی مردوم شٚمٚره رخشنَ گیرد و شٚمٚره ستم بوکونٚد و دروأره‌یٚ شومأن دورُغ بٚگد و هرجور نأجورٚ گب دروأره‌یٚ شومأن، خوشأنٚ زٚوأنٚ رو بأوٚرٚد اَنٚ وأسی کی شومأن جٚه من پیروی کونیدی. 12 خوشحأل بیبید، چونکی آسمأنٚ دورون ایتأ پیله پأدأش شیمی رأفأ ایسأ. بدأنید کی قدیمٚ پیغمبرأن اَمرأیم هطؤ بوکودٚده.»
نمک و نور رِه آمؤختٚن
13 «شومأن جهانٚ نمکیدی. ولی اگه نمک خو خأصیت و مزه‌یَ جٚه دٚس بٚده، چوطؤ وأستی اونی خأصیت و مزه‌یَ اونَ وأگردأنِن؟ دِه هیچی رِه بٚکأر نأیِه، جغرز اَنکی فیشأده بٚبه و مردوم اونَ لقد دٚمٚج بوکونٚد.
14 «شومأن جهانٚ نوریدی، هچین ایتأ شهرٚ مأنستَن کی ایتأ تپّه رو نٚهأ و نشأ اونَ چومأنٚ جَا، جیگأ دٚئنٚ. 15 هطؤیٚم چرأغَ روشن نوکونٚده کی ایتأ کأسه جیر بٚنٚد، بلکی اونَ چرأغ پأیه رو نَهَد کی خأنه دورون همٚتأنٚ رِه، نور دتأوٚه. 16 اَطؤیی، وئألید شیمی خورومٚ کردکأرأن نورٚ مأنستَن مردومٚ رو دتأوٚه، کی اوشأن اَ کردکأرأنٚ بیدینٚد و شیمی آسمأنی پئرَ ستأیٚش بوکونٚد.»
آمؤختٚن تورأتٚ جَا
17 «خیأل نوکونید کی بأمؤم موسا تورأت و قدیمٚ انبیأ بینیویشته‌یأنَ جٚه بین ببرم و بأطیلَ کونم، بلکی بأمؤم تأ اوشأنَ انجأم بدم. 18 رأس‌رأسِی شٚمٚره گم کی آسمأن و زیمین جٚه بین نٚشٚده، مگه هو زمأت کی تورأتٚ همّه، حتّا اونی کوجه‌دأنه قیسمت، دأنه بٚدأنه انجأم بوبوسته بی. 19 بأزین اگه اینفر کوجه‌ترین حوکمَ توجه نوکونٚه و البأقیأنٚم بأموجه کی هوطؤ بوکونٚد، اون آسمأنٚ پأدیشأیی دورون جٚه همه کوجه‌دأنه‌تر دؤخأده بِه. ولی هرکی خودا حوکمأنَ ایطأعت بوکونٚه و اوشأنٚ بأموجه، آسمأنٚ پأدیشأیی دورون پیله‌دأنه دؤخأده بِه.
20 «شٚمٚره‌یٚم اَ هوشدأرَ دٚهٚم: تأ شیمی دیندأری، یوهودٚ دین عألیمأن و فریسیأنٚ دیندأری جَا بِیتر نٚبه، هیوخت آسمأنٚ پأدیشأیی دورون نتأنید بیشید.»
آمؤختٚن در موردٚ زرخٚ بوستنٚ
21 «بشتأوسته دأرید کی اَمی قدیمٚ نسلأنَ بوگفتٚده کی "قتل نوأکودٚن و هر کی‌یٚم قتل بوکونه، موحأکمه بِه". 22 ولی من گم کی حتّا اگه تی برأرٚ جَا برزخَ بی، موحأکمه بی و اگه اینفرَ بی‌عقل دؤخأنی، دادگأ دورون وأ جوأب پس فأدی. اگه تی ریفِقَ بی‌حورمتی گب بزنی، جهندمٚ آتش تی حقه.
23 «پس اگه خأیی ایتأ حیوأنَ پیله معبدٚ مذبحٚ رو قوربأنی بوکونی، هو دٚم تٚرَه خأطر بأیِه کی تی ریفِق تی جَا دیلخوره، 24 حیوأنَ هویه قوربأنی جیگأ سٚر وِلَ کون و بوشو تی ریفِقٚ جَا بٚخأ کی تٚرَه بٚبخشه و اونٚ اَمرأ آشتی بوکون و بأزین بیأ و تی قوربأنی‌یَ خودایَ پیشکش بوکون. 25 هروخت کی اینفر تی جَا شیکأیت دأره و تٚرَه دادگأ بردأندره، رأ دورون، تی موشکیلَ اونٚ اَمرأ فیصله بٚدٚن، نوکونه کی تٚرَه قأضی‌یَ بیسپأره، و قأضی‌یٚم تٚرَه مأمورٚ دٚس فأدٚه و زندأن دکفی 26 و اگه اَطؤ بٚبه، زندأنٚ دورون مأنی و تأ دینأرٚ آخرَ فأندی، نتأنی بیرون بأیی.»
آمؤختٚن در موردٚ زٚنأ کودن
27 «بشتأوستید کی بوگفتٚده "زٚنأ نوکون." 28 ولی من گم کی حتّا اگه شهوت و هوسٚ اَمرأ ایتأ زنأکٚ فأندٚری، هو موقع تی دیلٚ دورون اونی اَمرأ زٚنأ بوکودی. 29 پس اگه تی رأستٚ چوم بأعیث بِه لغزش بوخوری، اونَ بٚکن و فیشأن، چونکی بِیتره تی جأنٚ ایتأ قیسمتَ، جٚه دٚس بدی، تأ اَنکی تومأمٚ تی وجود جهندمٚ میأن تأوٚدأ بٚبه. 30 و اگه تی رأستٚ دٚس بأعیث به لغزش بوخوری، اونَ وأوین و فیشأن، چونکی بِیتره تی جأنٚ ایتأ قیسمتَ، جٚه دٚس بدی، تأ اَنکی تومأمٚ تی وجود جهندمٚ میأن تأوٚدأ بٚبه.»
آمؤختٚن در موردٚ طلأقَ گیفتن
31 «هطؤیٚم بوگفتٚده کی "هرکی خو زنَ طلأقٚ ده، وأستی اونَ ایتأ طلأقنأمه فأدٚه" 32 ولی من شٚمٚره گم، هر کی خو زنَ جغرز خیأنٚت#۵:۳۲ یونأنی وأژه میأن تأنه زٚنأ، نأپأکی جینسی، زنأشوئی دورون خیأنٚت کودن و یا نأمشروع ایزدوأج کودن مأنی بٚده. هرچی دِه وأسی طلأقَ ده، او زنأکٚ زٚنأ کودنَ بأعیث بِه و هرکی ایتأ طلأقٚ دأ زنأکٚ اَمرأ ایزدوأج بوکونه، اونم زٚنأ بوکوده.»
آمؤختٚن در موردٚ قسم خوردن
33 «وأزم بشتأوسته دأرید کی اَمی قدیمٚ نسلأنَ بوگفتٚده: " دورُغٚ قسم نوأخوردن و هر زمأت خودا نأمٚ اَمرأ قسم بوخوردی، اونَ وفأ بوکون." 34 ولی من گم: هیوخت قسم نوأخوردن، نه آسمأنَ کی خودا تخت ایسٚه 35 و نه زیمینَ کی اونی پأ جیر نٚهأ، و نه اورشلیمَ کی او پیله پأدیشأ شهر ایسه؛ هیتأ جٚه اَشأنَ قسم نوخورید. 36 خودتٚ سٚرم قسم نوخور، چونکی نتأنی ایتأ مویَ سیأ یا سیفیدَ کونی. 37 "بله" یا "نه" فقد او چی ایسه کی وأستی بیگی. جٚه اَن ویشتر گب زِئن، شیطان کأره.»
آمؤختٚن در موردٚ اینتقأم فأگیفتن
38 «بشتأوستید کی بوگفتٚده خطأکأرٚ آدمٚ موجأزأت، وأستی، او آسیبی کی فأرٚسأنه بو اَمرأ، موطأبٚق بٚبه، ینی "چوم، چومٚ عوض، و گأز، گأزٚ عوض". 39 ولی من گم کی شریرٚ آدمٚ روبرو نوأ ایسأن! اگه اینفر تی دیمٚ رأستٚ ورَ چٚک بٚزِه، اویتأ وٚرم وأگردأن اونی طرف. 40 اگه اینفر تٚرَه دادگأ فأکشأنِه کی تی قٚبأیَ تی جَا فأگیره، تی عبأیم اونَ فأدٚن. 41 اگه ایتأ رومی سروأز تٚرَه دستور بٚدأ کی ایتأ بأرَ ایپچه اَشتر اوشتر بنی تو اونَ ویشتر بٚنه اوشتر. 42 اگه اینفر تی جَا ایچی بٚخأسته، اونَ فأدٚن و اگه تی جَا قرض بٚخأسته، اونَ دٚسٚ خألی اوسه نوکون.»
آمؤختٚن دروأره‌یٚ دوشمنأنَ محبت کودن
43 «بشتأوستید کی گده: "تی همسأده‌یَ دوس بٚدأر" #۵:۴۳ لاویأن ۱۸:۱۹.و تی دوشمنٚ اَمرأ دوشمنی بوکون. 44 ولی من گم کی شیمی دوشمنأنَ دوس بٚدأرید، و اوشأنی رِه کی شٚمٚره جفا کونٚده، خورومٚ دوعأ بوکونید. 45 اگه اَطؤ بوکونید، آسمأنی پئرٚ رأس‌رأسِی زأکأنٚ مأنستَن انجأم بدأیید. چونکی اون خو آفتأبَ هم بدأن و هم خُبأنٚ رو دٚتأوأنه و خو وأرشٚم هم دوروستکأرأن و هم شرورأنٚ سٚر وأرأنه. 46 اگه فقد او آدمأنی‌یَ دوس بٚدأرید کی شٚمٚره دوس دأرٚده، اَ کأرٚ رِه چی پأدأش فأگیریدی؟ مگه خرأبٚ بأجگیرأنٚم هه کأرَ نوکونٚده؟ 47 اگه شیمی ریفِقأنٚ اَمرأ فقد مهرٚوأن بیبید، الباقیأنٚ اَمرأ چی فرق کونید؟ ینی بُت‌پرستأنم هه کأرَ نوکونٚده؟ 48 پس شومأن وأستی کأمیل بیبید، هوطؤیی کی شیمی آسمأنی پئر کأمیل ایسٚه.»
Currently Selected:
متا ۵: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran