Marko 5
5
Cáng dvchøp vsv̀ng dvba:nò we
Mat. 8:28-34; Luk. 8:26-40
1Wemèpvng àngmaq nø tìnúngmè kupa Gerasen rvgaq sv̀ng tuq ráì. 2Kùngshí kèní Yesu léshì daqì weó, mvmv́ng cáng dvchøp we vsv̀ng tiqgǿ nø lóngdùng dvgv̀m dang kèní dì ráì nø̀, Yesu sv̀ng vhǿma:tnà. 3Àng nø lóngdùng dvgv̀m gòng yv́ng vl nø̀, àng sv̀ng kagǿí gø dóng mvdá:ngò høq íe. Shv̀m mvngbǿ:ngí gø dóng màshvla. 4Àng sv̀ng nø mvme kvt shv̀m mvngbǿ:ngí hí wur dù:ngò nìgø, mvngbǿngrì peqpeq ra:tnòe. Àng sv̀ng dóng dá:ngò vsv̀ng kagǿ gø màvl. 5Àng nø vyáng yaqdø̀ng kadvgvp gø, mvrè yv̀ng nv̀ng dvgv̀m gòng taq vwúshì sórí vkiq nø̀ lóngra:tní àngwawa tutshì nø̀ vle.
6Vrúm kèní Yesu sv̀ng à:ngí yv̀ng bǿà kvt kvlv̀ng ráì nø̀, Àng mv́rdv̀ng yv́ng pvnciq tushìe. 7Vrá, shaqmèí vkiq sórí, “Vháng vtvng Gvray Àngcèpè Yesué, Nà nø ngà nv̀ng pà singlv́m vle má? Ngà sv̀ng mèdèkøngànø̀ng wvng Gvray bø̀ng taqkèní nímshø̀nge,” a:lòe. #Mak. 1:24 8Àng wedø røtshì we nø Yesuí, “Mvmv́ng cáng nà, yapè kèní èlúshì,” wa nø̀ vl bǿà rvt íe.
9Yesuí àng sv̀ng, “Nà bø̀ng kadø ètǿshìe?” wa rø:tnò ke, wepèí rá, “Ngà bø̀ng nø Loksok ǿngàe. Kadø íe wani nøngmaq nø mvme íshàe,” a:lòe. 10Vrá, àngmaq sv̀ng wemóng kèní mvkwanlv́m rvt Yesu sv̀ng kórshìe.
11Àngmaq shvnvng mvrè yv̀ngø waq tiqrénùng rvnúlvm nø̀ vle. 12Cángrì nø Yesu sv̀ng, “Waqré vdòng góng dèzv́rshà,” wa kórshìe. 13Yesuí dvzv́r bǿà kvt, mvmv́ng cángrì lúshiá:mì nø̀, waqré taq zv́ngshìá:mì. Waqré nø vníkíng go dv́ngte í we, dv̀ngdár dangdang shvrøtshìá:mì kvt, tìnúngmè vdòngø vløp nø̀ shìá:mì.
14Waq roqshúrì vtná:mì nø̀, mvrìng nv̀ng gùrhøm vtv́r rvgaq yadang dvshvng bǿà. Wekvt kadødø í dá:rì we sv̀ng yv̀nglv́m rvt, vsv̀ngrì dì ráì. 15Yesu yv́ng àngmaq tuq ráì kvt, cáng loksok dvchøp dá:rì pè nø bèlaq gwashì nø̀ vrǿng làshv̀ng rung we sv̀ng àngmaqí yv̀ng bǿà kvt, àngmaq svre lú:ngì. 16Cáng dvchøp dá:rì pè nv̀ng waqrì kadødø íá:mì we sv̀ng yv̀ng bǿà rìí rá àngmaq sv̀ng bø̀ná:mì tvrà shvngbe dvtáòe. 17Wekvt vsv̀ngrìí àngmaq rvgaq kèní lúshìlv́m rvt Yesu sv̀ng kórshìe.
18Kùngshí vdòng sv̀ng Yesu zv́ngshìá:mì dvgvp, to cáng dvchøp dá:rì pè nø àng gø zv̀nvtnø̀ng wa Yesu sv̀ng røtshìe. 19Íwe Yesuí, “Mø̀í. Nà chø̀m nv̀ng nàmaq rvprì yv́ngsv̀ng èlo nø̀, Gvrayí nà dvpvt kadvngshì ring dø èwáa bǿì rì nv̀ng, nà sv̀ng kadv́ngte mèré we tvrà àngmaq sv̀ng dèshvngá:mò,” a:lòe. 20Wekvt wepè dìá:mì nø̀, Yesuí àng dvpvt kadvngshì ring dø wáa bǿà rì, Dekapoli#5:20 “Dekapoli” wa kà nø “Tiqcé Wamà” sv̀ng wae. rvgaq dvsha:ngò nìnø, vsv̀ng shvngbe dà á:mì.
Yeruí Yesu goa:tnà we
Mat. 9:18-26; Luk. 8:40-56
21Yesu nø yapa sv̀ng kùngshí taq vrá léshì ráì nø̀ tìnúngmè shvnvng shini v́ldv̀ng wa ke, vsv̀ng loksok lokga Àng yv́ngsv̀ng kø̀m ráì. 22Wekvt Yeru tǿshì we júrøt chø̀m øpshú tiqpè dì ráì nø̀, Yesu sv̀ng yv̀ng bǿà kvt Àng hí shvnvng kǿng kupshìe. 23Yeru nø Àng sv̀ng, “Ngàcèmè nø shaq dvtlv́m dv́nshìe. Àng zǿm long nø̀ cúnshì lúnlv́m dvpvt, èdi ra nø̀ àng mvdv̀m wur èhapshì ra,” wa mvdø̀ng mvdaq kórshìe.#Mak. 7:32 24Wervt Yesu nø àng nv̀ng dìá:mì. Vsv̀ng loksok lokgaí gø Yesu mèpvng cà:nò nø̀ Àng sv̀ng shvgøra:tnà.
Shvwi vyø we svmaré dvba:nò we
25Tiqcé vnínǿng døp shvwi vyø nø̀ za we svmaré tiqmè gø vbáe. 26Wemè nø cìsvra mvmegǿ wur taq dvshàlv́m gvzà vhǿ:mò mvdv̀m, àng v́laò dv́ngte shvngbe bé á:mì nìgø zǿm we màvl. Dvshàshà záyv̀ng rvnaq mvnshìe. 27Yesu tvrà à:ngí tá bǿà nø̀, vsv̀ng loksok dvhø̀hø̀ shvløtshì ráì weí, Yesu mèpvng lap kèní dì ráì nø̀ Àng bèlaq sv̀ng shu:pmòe. 28Kadø íe wani àng nø, “Ngàí Àng bèlaq sv̀ng wa shup lúnònø̀ng gø ban longe,” wa dvda:mòe. 29Wela:ngí ni àng shvwi vyø lòng vtvngá:mì nø̀, àng góng taq za lòng gø zǿmá:mì we dǿmshì bǿì.
30Yesu nø Àng góng kèní jórnònggùn búngá:mì we sv̀ng chàng dǿmshì bǿì nø̀, vsv̀ng loksok dvhø̀ø wv́l poshì sórí, “Ngà bèlaq sv̀ng kagǿí èshupme?” wae. #Luk. 6:19
31Wekvt coqcv́nrìí Àng sv̀ng, “Vsv̀ng loksu:kngí Nà sv̀ng shègør we Nàí gø èyà:ngò ke, ‘Kagǿí èshupme?’ wa nø̀ kadø wa èrøtshìe má?” a:lòe.
32Ínìgø, Yesuí nø Àng kaq shup bǿà gǿ sv̀ng yv̀nglv́m dvpvt, gùrgùr dvjaq ma:nòe. 33Svmaré wemè nø, àng góng taq baná:mì we sv̀ng sháshì bǿì rvt svre vdv̀n sórí dì ráì nø̀ Àng mv́rdv̀ngø kǿngkupshì sórí kadø íá:mì we shvngbe dvtáòe. 34Yesuí àng sv̀ng, “Ngàcèmèá, nà kv́mnø:tní nà sv̀ng dèban bǿì. Pàmvrà èlovm. Nà záyv̀ng zǿm bǿì,” a:lòe.
Yeru àngcèmè dvzunaò we
35Àng wedø shø̀n la:ngí, júrøt chø̀m øpshúpè chø̀m kèní vsv̀ng dì ráì nø̀, “Nvcèmè shìá:mì. Svrapè sv̀ng dvshá mèluni,” a:lòe.
36Àngmaq shø̀nkà Yesuí tá bǿà chàng Yeru sv̀ng, “Mèsèreni, kv́mdv̀ng èwa,” a:lòe.
37À:ngí Piter, Yaku nv̀ng Yaku àngnvmpè Yohan wa mø̀í nìnø, dvgá kagǿ sv̀ng gø Àng mèpvng zv́n màdvzá:rò. 38Júrøt chø̀m øpshúpè chø̀m sv̀ng àngmaq tuq ráì nìnø, vsv̀ng vhaqshì we nv̀ng ngø da we sv̀ng À:ngí yv̀ng bǿà. 39Vdòng sv̀ng gòngá:mì ke, À:ngí werì sv̀ng, “Pàwá nàhaqshìnø̀ng nø̀ èngǿnø̀nge má? Cv̀mrémè nø shì we mø̀í, yøp we íe,” a:lòe. #Yoh. 11:11 40Wervt àngmaqí Àng sv̀ng vhøòe.
À:ngí àngmaq shvngbe sv̀ng vngám lap léshì dvzá:rò dá:ngí, cv̀mrémè àngpè àngmè ó, Àng nv̀ng tiqdø zv̀n we coqcv́nrì wa shø:lò nø̀ cv̀mrémè vyà:lò yv́ng gòngá:mì. 41À:ngí cv̀mrémè wur zø̀:mò sórí, “Talita kum,” a:lòe. (Yakà nø, “Cv̀mrémèá, Ngàí vlvtnø̀ng, èkungshì,” wa kà íe). #Luk. 7:14 42Cv̀mrémè nø wela:ngí ni søt kungshì nø̀ die. Àngmaq vtvng kèní dà á:mì. Àng bat nø tiqcé vnínǿng íe. 43Yesuí yalòng kagǿ sv̀ng gø màdvtálv́m àngmaq sv̀ng dvká:mòe. Vrá, “Cv̀mrémè sv̀ng v́mlv́m tiqpv̀npv̀n èzínø̀ng,” a:lòe. #Mak. 1:44
Currently Selected:
Marko 5: GSM
Highlight
Share
Copy
Want to have your highlights saved across all your devices? Sign up or sign in
© 2024, Rvcv́ngcè Kàru Gomidi Kristu Shvngø̀mré. All Rights Reserved.