LUKA 5
5
Cangzoo: Yiri Khe: Shed" Da" Khyoo:
(Mat 4:18-22; Mar 1:16-20)
1Dalheing: ri Yesu gi-Genesared gyid thoem" yam moo yab jo wigi byu phung: yi gi Mangso da" mungdang: ri tam" gyoo: wa ga: Yesu da" nam moo nyhen" jhab go" lo. 2Hau: da" uri Yesu gi gyid yam moo tei" to" da" lhid' eig khyab, ri myang kaid. Ngoo: kuang mo, gi hau: lhid' khoug: mo gyo" lho: nyangnu" da" goin ri ced" shang: go" nyid. 3Yesu gi hau: lhid' eig khyab, mo Simun da" lhid' moo do, lo" lho: lhid' ri gyid yam mo dajhi ku" kang" kaid wa shid' re" Simun ri tid. Hau: thang: ri zhoung: lho: byu phung: moo" ri tarha" kho" kyo.
4Houg: su" bain kho" kyoo" lang" gi gyid no jang" khyoo: gu: yhi: ge' ngoo: kuang wa shid' re" Re" da" goin ri we' re" byen cang" yi da" goin ri we' khyo' kaid ge" ga: Simun ri tid.
5Simun gi Aseing: we" hid: moo gi ngoonu" damyen goin" yoem: kaid kuang nghoid loug we' ngoo: dadu: we' ayo" boem. Nghoidsho' loug we' Aseing: tid zi yo' dakhyoo" ti"- goin joem ri ngoo khyoo wa" ga: tid. 6Nyangnu" gi goin ri khyo' kaid lang" su- ngoo: myoo" sho' yo" zhoung" lhoung yu yoomo goin joem lang" alug lug jeug lo. 7Houg: yoomo re" pang" yu wa shid' re" gootu: da" lhid' mo nyangnu" da" ngoo: kuang byen cang" yi ri lo, fe: khe: nyid ago". Houg: bang: we' re" lho: lhid' eig khyab, goin" jang" moo ngoo: byeung" wigi lhid' lang" alug lug noeb lo. 8Hau: khyoo: Simun Peteru myang lang" gi Yesu da" khyid: yang: moo goeb no" lho: Aseing Yesu we"- ngoo gi yooboo shoid vhang: su: nghoid. Nga" jang" mo thu' loo" we' ga: mho' tid.
9Simun yo" bo ri" bang: dangain" mo gi nyangnu" shau" du" yu da" ngoo: ri myang lho: dazheung: moug go" nyid lo. 10Simun da" ngoo: kuang byen cang" nghoid da:- Zebedi da" nya: zoo: tang Yaku yo" Yohan eig yug we' houg: su" nyang: dabo mung" go" nyid. Yesu Simun ri tid zigi agyug goo"- akhid" mo wigi Nanu" gi byu kuang mo, bue" loo" wa" ga: tid.
11Houg: bang: gi lhid' joem ri gyid yam moo zheung: tei" to" lho: yo" da" ziyoo dangain" she: pyam too" kho" wigi Yesu da" thang: moo zheing: cang lo" boem bye.
Manggam: Noo Ri Ge Loo" Nhang: Da" Khyoo:
(Mat 8:1-4; Mar 1:40-45)
12Danyid" ri Yesu gi Voo moo" davoo moo nyid. Hau: voo moo dagung goin" manggam: noophu" ci: su: dayug nyid. Nyang: gi Yesu ri myang lang" goeb pid' lho: Aseing: nang nau rigi ngoori yo" ge loo" nhang: we" ga: mho' tid.
13Yesu gi lo, ri yhoin" kaid lho: hau: yug ri zang" tain byid. Hau: lho: ngoo nau nang ge san loo" re" ga: tid. Hau: uri nyang: hau: youg da" manggam: noo gi ge san loo" bye. 14He: khyoo: hang" ri we' atid kyoo" ga: hau yug ri zau" kaid lho: Yesu gi nang gi khainjung agyi yi jhang khyoo: yhe: lho: re" gung ri pya shug we'. Re" da" noo ge loo" bye da" khyoo:- nyangnu" da" shid' moo sagsi: bui" wa shid' re" Moshe tid to" da" xoin" ri we' to' byid: we ga: pyeung: kaid.
15Nghoidloug we' Yesu da" lu dang: gi lhupyo tho' moo je lhupyo lo". Houg: su" nghoid yoomo byu phung: moo" gi Yesu da" mungdang: ri tam" gyoo: wa ziyo'- nyangnu" nya: da" noophyoo" ze: gi nhang: wa shid' re" ju" re" nyid boem. 16Nghoidloug we' Yesu gi nya: thung" jo, ziyo' dakhyoo"-dain" pyoid' yoo khyoo: vang lo" lho: akyu" mho' nyid.
Gung Shid: Su: Ri Doem Ge Loo Nhang: Khyoo:
(Mat 9:1-8; Mar 2:1-12)
17Nyid" da" nyid" moo Yesu tarha" kho" nyid uri Galile mung" yo" Yuda mung" voo khang" moo" mo mo, we' Yerusalem voo mo we' zheung: jure" boem. Pharishe" yi yo" tarha" sara: yi gi jhang jang" moo zheing: zhoung: jo, ago". Noophyoo" aja: ja: ri ge loo" nhang: wa da" yoem: so' gi Yesu moo bo jo. 18Hau: uri byu daphung: gi gung joem: shid: da" byu dayug ri dangzuang mo dang go" re. Hau: noo su: ri yhoem: khoug: moo dang vang lo lho: Yesu da" shid' khoin" moo khyo, too" wa ga: gye" yoem: kaid nyid ago". 19Houg: nghoid loug we' Byu phung: moo" ri ayo" kho' vang loo" yoomo yhoemkhung: tho' khyoo do, lo" lho: va: khyam" ri yu pyam wigi noo su: ri dangzuang yo" dage" mo, phung: gung moo Yesu shid' khoin" moo khyo' kaid boem. 20Yesu gi houg: bang: da" loem" jeing" khyoo: ri myang lang" gung joem: shid: su: ri byu nang we"- re" yooboo ri khyoid pyam byid: bye. ga: tid.
21Tarha" sara: yi yo"- Pharishe bi gi He: yug gi hang" nghoid la". Nyang: gi Mangsoo ri shoid da" dang: tid nyid bye. Mangsoo mo led lho: yooboo ri hang" yo" se' khyoid pyam byid: wa ga: myid yu" nyid boem.
22 Aseing Yesu gi houg: bang: houg: su" myid nyid ziri si' yoomo nanu" ci: yoomo houg: su" myid nyid go" lha". 23Re" yooboo ri khyoid pyam byid: bye: ein: je tid lei la". Houg: su" za: anghoid joyoo mo to' lho: so" loo" we' ein: tid wa je lei la". 24Nghoidloug we' byu da" nya: zoo: gi Mougmyid mo yooboo ri yo" khyoid pyam byid: ziri nanu" ri si nhang: ba ga: tid lho: gung joem: shid: su: ri nga" dang: tam" gyoo: we' too we' Re" da" dangzuang ri vu lho: yhoem: khyoo: loo" re'- ga: amyeing" byid: kaid.
25Hau: yug gi houg: jang: byu yi shid' khoin" mo to' lo" lho: nyang: leung jo, da" dangzuang ri vu wigi Mangso da" jeju" ri coung" nghei zoore"- yoem: khyoo: loo" khari" bye. 26Byu dangain" mo, gi soo" soo" gyoug dain yu" mau" boem wigi Mau" pho" moo" khid" nyid ngoonu" myang bye ga: tid go" lho: Mangso ri coung" byid: boem.
Levi Ri Khe: Yu Khyoo:
(Mat 9:9-13; Mar 2:13-17)
27Hau: thang: ri Yesu gi Kaperna-um voo mo thu' lo" ri kheing" khyu: da" yung" moo Levi ga: su: dayug zhoung: jo lang" zi lo" myang. Nyang ri Yesu gi nga" thang: cang we' ga: tid. 28Nyang: gi yoo" mayoo" she: pyam kho' lho: Yesu thang: moo cang loo" bye.
29Hau: thang: ri Levi gi nya: yhoem: moo Yesu ri kham: yu da" pui" zeing daloem: koid. Pui" re" being" voo yi moo kheing" khyu: mo yo"- gootu: being" voo we' myoo" sho' bo re" ago". 30Pharishe" yo" nyangnu" da" byen cang" zheing: nghoid da" tarha" sara: yi gi ciwim wigi nyangnu" gi kheing" khyu: mo, Phung: thu' to" da" yooboo yoo" mo, yo" dage" voem: shoin" zo: boem lha"» ga: nya: cangzoo: yi ri yooboo foin: juang" yi boem.
31Hau: uri Yesu gi yangzain: su: gi Doug Tha avho:- noo su: za: date: vho. 32Ngoo gi myonhoo: ngilang: yoo" mo nheigloem: thid wa shid' re" kho" kyoo" wa ein: jure" zi anghoid. Yooboo yoo" mo, ri khi: wa ein: dare" ga: tid.
Zoo: Noem Zeung: Da" Dang: Myid:
(Mat 9:14-17; Mar 2:18-22)
33Byu dayham" gi Yohan da" cangzoo: yi yo"- Pharishe" yi da" cangzoo: yi gi zoo: noem zeung: da" khyoo: yo"- Akyu" mho' da" khyoo: ri atheing: loo: lhoung: koid: nyid ago". Houg: nghoid loug we' Yesu da" cangzoo: yi gi dazo: dashug go" nyid boem- nhung: lha"» ga: tid boem.
34 Aseing Yesu gi loxo' pui" moo phoo seig danyid nyid gi being" voo yi ri zoo: noem zeung: nhang: wa la". 35Houg: su" nghoid loug we' loxo' phoo seig ri nyangnu" jang" mo shu" yu wa da" ayo, bidnyid ju" loo wa. Houg: lang" nyangnu" gi zoo: noem zeung: boem wa zi nghoid ga: tid.
36 Aseing Yesu gi dangtu' khyo" hang" we' pain" seig mo ceig yu lho: pain" xoug" cu' yo" phoo: wa thung" aboo. Houg: su" phoo: nghoid rigi pain" seig yoin" loo" wa zi anghoid- pain" xoug" yo" pain" seig adu goo" wa zi nghoid. 37Hau: tho' moo gootu: zabyid yhid aseig ri shooyid thug xoug" moo kaid wa thung" ajo,- to' kaid nghoid rigi shooyid thug gi boug gyam: lo" lho: zabyid yhid gi yau shoin: pyam' wa. Shooyid thug we' yoin" loo" wa. 38zabyid yhid aseig gi shooyid thug aseig moo dakaid ja: nghoid. 39Hau: tho' moo zabyid yhid axoug" ri shug bye: su: gi zabyid yhid aseig ri anau shug. zabyid yhid axoug" za: date: ge ga: lhoung tid boem ga: wigi tid kyo.
Currently Selected:
LUKA 5: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.