EZRA 9
9
Ezra gi Yuda Anghoid mo, Yo' Lo, xo' ziri Yo" se' Lo Khyoo:
1Hau: moo" joem dangain" ziri bain koid thang: ri Israela byumyu" yi da" vhujhung: dayham" re" wigi ngoo ri byumyu" yi khainjung yi yo' Levi yigi yhoem: kyoo" cang" mungdain: nghoid da" Amon- Moba- Egutu- Khanan- Hiti- Perizi- Yebusi yo' Amori mungdain: joem moo nyid da" byumyu" yi yo' ayo" gang: goo" lo: za: nyangnu" gi hau: byumyu" yi koid da" avoid avhu: khyoo: ri bo koid nyid ago". 2Yuda yuggi yigi tungbau byumyu" myiyi: yi yo' lo, xo' yoomo Mangso da" gyeung" shang: byumyu" yigi agyeing" ashang: bue" nyid bye: zi nghoid. Vhujhung: yi yo' moo" voin bang: gi yooboo koid da" vhujhung: yi bue" nyid ga: tid kyoo" ago". 3Ngoo hau: ziri shau" gyo: uri ngoo gi yoem: shoin: wigi nga" byimi ri lang: ceig. Nga" xam:- nhoid mei: joem ri lang: myo, pyam wigi nheig koug zhoung: too" bye: zi nghoid. 4Ngoo gi hau: joyoo moo myen" thang: xoin" ngei" wa shid re" byumyu" yi ngoo ri re" zheing: foem: zhung: to" da" ayo, ju" sho' nheig koug zhung: too" shi" zi nghoid. Nyangnu" dangain" gi pyoung" she: loo" shoug" jang" mo doem tau" loo bang: da" yooboo yo' sen: khyoo: ri Israela byumyu" yi da" Mangsoo khasu" tid to" ga: zi si' yoomo gyoug nyid boem ago".
5Myen" thang: xoin" ngei" wa shid re" ayo, ju" lo uri ngoo gi ngoo nheig koug zhung: jo, da" joyoo mo to' wigi nga" byimi jeug ri xo' void ci: lho: nga" Aseing Mangso jhang khyoo: nga" lo, ri tu: yeung to" wigi ngoo poid thug thoug lho: akyu" mho' nyid bye: zi nghoid. 6Ngoo mho' zigi «O" Mangso ngoo gi re" shidkhoin" mo vhuloem avoem" tu: yeung too" loo: sho' nyang: sho' bye:. Ngoonu" yooboo gi ngoonu" vhuloem tho' myhang: sho' boem loo bye:. Hau: zigi mougkhung: myhang nyang: myhang: jo, bye:. 7Ngoonu" phoug" phyid" da" pyaid mo akhid" nyid" ju" sho' re" byumyu" yi nghoid da" ngoonu" gi yooboo gye" myo: sho' koid bye: zi nghoid. Ngoonu" yooboo yoomo ngoonu" gi said toem" pyam zi shoug" wa shid re" lhoid zoo: lhoid shug zi shoug" wa shid re" tungbau: khokham lo, khoug: moo thung: byu khyo" wigi ngoonu" khokham yi yo' ngoonu" khainjung yi shu" lo" zi shoug" bye:. Ngoonu" gi akhid" nyid" ju" sho' sho' gye" phu" bang: bue" loo" bye:. 8O" ngoonu" Aseing Mangsoo we" akhid" daso' shi" za: nang ngoonu" ri nheig khyeug shoomyen: wigi ngoonu" dayham" ri join koid jang" mo loid byoin loo nhang: ziyo' hau: gyeung" shang: joyoo moo laloem lanyu: nyid nhang: bye: zi nghoid. Nang ngoonu" ri join koid jang" mo loid byoin loo nhang: ziyo' ngoonu" ri pyaid seig doem byid: bye: zi nghoid. 9Ngoonu" join yi nghoid loug we' nang ngoonu" ri join moo" zoo" khyoo: anhang: kaid nghoid da:. Nang gi ngoonu" ri Persi khosen shidkhoin" mo myonhoo: ngilang: yoo" wa shid re" we' byo, yoin" lo" da" Mangso Noku Yhoem: Moo" ri doem koid wa shid re" we' Yuda mung" yo' Yerusalem voogung moo laloem lanyu: nyid wa shid re" we' amyeing" byid: bye:› 10-11Nghoid loug we' akhid" gi O" Mangsoo we"- Bain bui" bye: thang: ri ngoonu" ci: yo" tid loo: wa lha". Ngoonu" gi akhid" dalheing: re" dei zoo: yi nghoid da" lapi: yi khyo" wigi ngoonu" ri byid: da" amyeing" dang: joem ri atam" gyoo: acang yi bui" bye: zi nghoid. Nyangnu" gi ngoonu" ri nyhang" lo" seing: wa da" mung" gi yung: lho' gyeung" shang: nyid zi anghoid. Ciwim ga: ri houg moo nyid da" byumyu" yigi avid avhu: da" akyang" yo' mung" dathang: mo dathang: byeung" jo, zi nghoid» ga: tid. 12Nyangnu" gi ngoonu" ri «Nyhang" gi hau: mung" moo nyha" zoo: du yi pyaid boin: ju" sho' pyo: pyo: yo" nyid wa shid re" nyhang" gi hau: byumyu" yi yo' myiyu yoobyen khyoo: age koid. Nya" da" oungdoid khyoo: yo' ngei pyoo: yug yoo khyoo: ri ashoo: goo"» ga: tid zi nghoid. 13Khanham we' ngoonu" shoid da" youg: noo yooboo shid re" dam shoug" ziri yu" ri nang ngoonu" Mangsoo gi ngoonu" kham' eung: da" dam ri khyo' nyhoem' byid: wigi kangso' dei wa da" akhang" byid: too" bye: zi nghoid» ein: ziri ngoonu" yo" si' bye:. 14Hau: thang: ri khasu" wigi ngoonu" gi re" Dang: theing khoin" ri atam" gyoo: lho:. Hau: akhyeing" byumyu" yi yo' myiyu yoobyen yo" koid wa la". Ngoonu" hougsu" koid nghoid rigi dayug ri we' kangso' adei nhang: loo: za: ngoonu" dangain" bang: ri doem: loo" sho' nang koid wa anghoid la". 15Israela byumyu" yi da" Aseing Mangsoo nang gi nyeung veung" zi nghoid loug we' ngoonu" ri nang kangso' dei nhang: loo bye:. Ngoonu" gi re" jhang khyo: ri" wa shid re" akhang" ayoo" loug ngoonu" da" yooboo joem ri toungbain: wa shid mo re" shid khyoo: re" lo.
Currently Selected:
EZRA 9: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.